Россия президенти Владимир Путин ва Америка Қўшма Штатлари етакчиси Дональд Трамп Аляскадаги учрашув якунида ҳеч қандай ҳужжат ёки келишув имзолашни режалаштирмаяпти. Бу ҳақда Кремль матбуот котиби Дмитрий Песков маълум қилди.
Кремль сўзчисига кўра, учрашувда Украина можаросини ҳал этишга оид масалалар муҳокама қилинади.
“Президент Путин ва Дональд Трамп гаплашмоқчи. Улар гаплашишга тайёр ва энг мураккаб масалаларни муҳокама қилади”, деган Песков.
Шунингдек, у учрашувда ҳеч қандай ҳужжат имзоланиши кутилмаётганини билдирди. Бироқ матбуот анжуманида Путин баёнот беришини айтди.
“Ҳеч нарса кутилмаяпти. Ҳеч нарса тайёрланмаган ва ҳужжат бўлиши ҳам даргумон. Аммо қўшма матбуот анжумани бўлишини ҳисобга олиб, Путин эришилган келишув ва муҳокамалар ҳақида баён қилади”, деган Песков.
Дмитрий Песков Украинадаги урушни мураккаб ва кўп қиррали ҳодиса деб атади. Шунингдек, европаликлардан муносиб жавобни кутиб бўлмаслигини таъкидлади.
Украина президенти Владимир Зеленскийнинг позицияси учрашув чоғида инобатга олинадими, деган саволга жавобан Песков ҳозирча музокаралар Россия ва АҚШ ўртасида кетаётганини айтди. Украина томони билан муҳокама эса кейинги босқичларга тегишли эканини қўшимча қилди.
Маълумот учун, Дональд Трамп ва Владимир Путиннинг Аляскадаги учрашуви Тошкент вақти билан 16 август, соат 00:30 да бошланиши режалаштирилган.
Изоҳ (0)