Экрандаги идеал партнёрлар реал ҳаётда доим ҳам бир-бирини тушуна олмайди. Қуйида суратга олиш майдончасида ўзаро келиша олмаган актёрлар жуфтлиги ҳақида гаплашамиз.
Дастин Ҳоффман ва Мерил Стрип
“Крамер Крамерга қарши” фильми жаҳон киносининг ҳақиқий дурдонаси саналади. Роберт Бентоннинг бу асари бешта “Оскар” мукофотига сазовор бўлган. Ажрашаётган эр-хотин ролини ўйнаган Дастин Хоффман ва Мерил Стрип ҳам мукофотларга сазовор бўлган. Сюжетга кўра, Жоанна (Стрип) ўзлигини топиш мақсадида кетишга қарор қилади ва эри Тед (Хоффман)ни бола билан ёлғиз қолдиради. Эътиборли жиҳати шундаки, бу фильм Мерил Стрип учун актриса сифатидаги карьерасининг бошланишидаги дастлабки ишлардан бири бўлган.
Хоффманнинг ўзи ҳам ўша пайтда хотини билан ажрашаётган эди. Жоанна Теддан кетмоқчи эканини айтган саҳнада Жастин ҳис-туйғуларини жиловлай олмай, ёш актрисага тарсаки туширади. Фильмнинг якуний версиясига қўл кўтаришсиз бошқа дубль киритилади. Бироқ Стрип бир неча бор интервьюларида суратга олиш жараёни жуда қийин кечганини таъкидлайди, чунки ҳамкасби баъзан ролга ҳаддан ташқари берилиб кетарди. Шундан сўнг Дастин Хоффман ва Мерил Стрип ҳеч қачон бирга ишламади.
Билл Мюррей ва Люси Лиу
“Чарли фаришталари” фильмининг суратга олиш жараёнида муҳит дўстона эмасди. Иш пайтида Билл Мюррей ҳамкасбларига кинояли фикрлар билдиришдан ҳеч тортинмасди. Баъзилар буни ҳазил деб қабул қилса, бошқалар хафа бўларди. Люси эса бунга тоқат қила олмади. Айнан суратга олиш жараёнида улар ўртасида жанжал чиқиб, сал бўлмаса муштлашувга айланаёзди.
Шундан сўнг Люси Лю актёрнинг устидан продюсерларга арз қилади. Натижада кейинги фильмда Мюррейнинг ўрнини Берни Мак эгаллайди.
Риз Уизерспун ва Винс Вон
Сет Гордоннинг “Тўрт Рождество” фильми юлдузлар жамоаси иштирокидаги ёқимли оилавий комедия ҳисобланади. Бироқ фильм устида ишлаш жараёнида барча ҳамкасблар оила аъзоларига айлана олишмади. Тўғри, баъзида қарама-қаршиликлар бир-бирини тортади, аммо Винс Вон ва Риз Уизерспун ҳолатида бундай бўлмади.
Актёрларнинг ишга ёндашувлари бутунлай турлича эди. Мукаммалликка интилувчи Уизерспун сценарий ва жадвалга қатъий амал қилишни талаб қиларди. Воген эса, аксинча, доимий равишда импровизация қилар ва кечикиб келарди. Риз ҳамкасбининг хатти-ҳаракатларидан шу қадар ғазабланадики, у билан севги саҳнасини суратга олишдан воз кечади. Барча келишмовчиликларга қарамай, фильм барибир экранга чиқади, аммо актёрлар бошқа ҳамкорлик қилмайди.
Кевин Смит ва Брюс Уиллис
Актёр ва режиссёр Кевин Смит Брюс Уиллиснинг ашаддий мухлиси бўлиб, у билан ишлашни доимо орзу қиларди. Орзу Уиллис бош ролни ижро этган ва Смит режиссёрлик қилган “Қўшалоқ КОПец” фильмида учрашганларида рўёбга чиқди.
Смит учун бу комедияни суратга олиш ҳақиқий қийноққа айланди. Уиллис лойиҳага мутлақо бефарқ муносабатда бўлди. Фильм устида ишлаганларнинг барчаси уни фақат гонорар қизиқтиришини тушунишди. “Чақилмас ёнғоқ” юлдузи реклама кампаниясида иштирок этишдан бош тортиб, ҳатто постерлар учун суратга тушишни ҳам хоҳламади. Фильмга бўлган бундай нафрат Смитнинг ўз кумирига бўлган ишончини йўқотишига олиб келди. У буни фаолиятидаги энг ёмон тажриба деб атаб, Уиллисни узоқ вақт давомида очиқчасига танқид қилди. Фақат Брюсга жиддий касаллик ташхиси қўйилгандан кейингина Смит юмшади ва кечирим сўради.
Шарлиз Терон ва Том Харди
Жорж Миллер XXI асрнинг энг муҳим фильмларидан бирини ортиқча муболағасиз суратга олди. “Телба Макс: Ғазаб йўли” фильми прокатда катта муваффақиятга эришди ва олтита “Оскар” мукофотини қўлга киритди. Бироқ суратга олиш жараёни ниҳоятда машаққатли кечди. Бунинг сабаби фақат саҳрода ишлашда эмасди.
Фильмда бош ролларни Шарлиз Терон ва Том Харди ижро этди. Уларнинг ҳамкорлиги танқидчилар томонидан юқори баҳоланди, аммо саҳна ортида ҳақиқий тўқнашувлар юз берди. Ўзининг профессионал интизоми билан танилган Терон Хардининг доимий кечикишларидан ғазабга келарди. Вазият Харди уч соатга кечикиб, ҳамкасби тўлиқ гримда қизиб кетган юк машинасида кутишга мажбур бўлганида чўққисига етди. Харди ўзининг муаммоли эканини ҳеч қачон яширмасди, аммо бу Шарлиз уни кечириши учун етарли эмасди.
Аммо Жорж Миллер суратга олиш майдонидаги вазият кескинлашгани фильмга ижобий таъсир кўрсатганини ҳам тан олади.
Изоҳ (0)