Нургул Ешилчай турк кино ва театр оламининг энг порлоқ юлдузларидан бири. У ўзининг истеъдоди, бетакрор маҳорати ва экранда жонлантирган образлари билан томошабинлар қалбидан чуқур жой олган. Жорий йил 26 март куни 49 ёшга тўлган актриса санъатдаги фаолияти давомида ўнлаб фильмлар ва сериалларда иштирок этиб, халқаро кино майдонида ҳам эътироф этилган. Ушбу мақолада биз унинг ижодий йўли, шахсий ҳаёти ва санъатдаги ўрни ҳақида батафсил маълумот берамиз.
Болалик йиллари
Нургул 1976 йил 26 мартда Туркиянинг Афёнкараҳисар шаҳрида туғилган, сўнг тез орада ота-онаси Измирга кўчиб кетишган. Нургул исми “хушбўй” деган маънони англатади. Унинг исми “кўк чой” деб таржима қилинадиган фамилиясига мос келиши учун шундай номланган.
Бўлажак юлдуз мактабдан ташқари ўзига қўшимча даромад йиғиш учун попкорн сотиш билан шуғулланган. Ўша пайтда ҳеч ким унинг келажакда Туркиянинг энг машҳур актрисаларидан бирига айланишини билмаган.
Нургул актриса бўлиш учун махсус таълим олди: у Анталия театр мактабини, сўнг Эскишеҳир университетида актёрлик курсини тамомлади. Дипломни олгач, Ешилчай театр саҳнасини забт этишга киришди. У кўплаб спектаклларда, жумладан, “Гамлет”да ўйнаб, Офелия образини гавдалантирди. Маълум вақтдан сўнг унга телевидениедан кўплаб таклифлар келгани учун Нургул театрни тарк этишга қарор қилди.
Кино соҳасига илк қадам
Актриса кинодаги дебютини 1998 йилда “Ҳаммаси яхши бўлади” комедиясида суратга тушишдан бошлаган. Сўнг Нургул уч йил давомида “Иккинчи баҳор” сериалида Гулсум ролини ижро этди.
2001 йилда турк актрисаси бир вақтнинг ўзида иккита ролга таклиф олди: у Туркияда 60 йиллардаги ҳарбий тўнтариш ҳикоя қилинган “Шаршара” драмасида ҳамда “90-60-90” номли мелодрамасида иштирок этди. Кўп ўтмай Ешилчай “Қочаётган мумия” фильмида латофатли Фотима ролини ижро этди.
Актрисанинг биринчи бош ролдаги лойиҳаси “Ишкомли уй” драмасидаги Баҳар образи бўлди. Сериал Ўзбекистонда 2003 йилда эфирга узатилди ва минглаб томошабинларнинг қалбидан жой олди. 2004 йилда Нургул “Сўйла, Истанбул!” киноалманахида замонавий уйқудаги гўзал ролини ижро этган.
“Фаришталар ороли” мелодрамасини суратга олиш учун Нургул сочини қисқартириши керак эди, бироқ бир йилдан у гўзал узун сочлари билан “Вақтинчалик келин” сериалида намоён бўлди.
Сўнг актриса турк ва немис ижодкорлар ҳамкорлигида “Жаннат ёқасида” лойиҳада талаба ролини ўйнади. Фильм танқидчилар томонидан ижобий баҳоланди ва бир нечта нуфузли мукофотларни олди, жумладан, 60-Канн кинофестивалида “Энг яхши сценарий” номинациясида ғолиб чиқди.
Карьера чўққиси
2008 йилда Нургул Ешилчай телетомошабинларнинг севимлиси актрисаси сифатида Туркияда мустаҳкам обрў ва эътиборга эга эди. Кейинги йилларда чиққан “Севги ва жазо” фильми актрисани хорижда ҳам машҳурликка эришишига имконият берди. Тез орада актриса мамлакатдаги энг кўп гонорар олувчи санъаткорлардан бирига айланди ва кино соҳасида жадал ишлашда давом этди.
2016 йилда Нургул “Муҳташам юз йил. Кўсем империяси” фильмида бош рол — Кўсем султон образини ижро этди. Сериал нафақат Туркияда, балки дунёнинг бошқа мамлакатларида ҳам энг кўп томоша қилинган турк сериалларидан бири сифатида эътироф этилди ҳамда нуфузли мукофотларни қўлга киритди.
Ешилчайга Голливуд фильмида суратга тушиш ва рол учун сочларини кал қилиб олдириш таклиф қилинган, лекин у бунга рози бўлмаган ва ролни рад этган. Маълум вақт ўтиб актриса бундан афсусланганини тан олади.
Шахсий ҳаёт
Нургул Ешилчай оилали эркаклар билан ҳеч қачон дўст бўлмаслик ҳамда ўзганинг турмуш ўртоғига қарамаслик принципига қатъий амал қилар эди. аммо шундай бўлдики, актёр Жем Езер Нургул учун аввалги хотини Селин Делмендан воз кечди. Жуфтлик 2004 йилда турмуш қурди.
Жем аёли Нургулдан 17 ёш катта эди. оилада Осман Нежат исмли ўғил фарзанд дунёга келди. Аммо турмуш узоққа чўзилмади, орадан олти йил ўтиб улар расман ажрашди. Чунки Жем Нургулдан кино соҳасини тарк этишни талаб қилди, аммо актриса ўз касбини жуда яхши кўрар эди.
2018 йилда актриса продюсер Нежати Коджабай билан муносабат ўрнатди. Уларнинг алоқалари жиддий тус олди ва жуфтлик турмуш қуришни режалаштираётган эди, бироқ 2019 йилда коронавирус пандемияси бошланди ва тўй маросими ортга сурилди.
Нургул Ешилчай нафақат истеъдодли актриса, балки моҳир рассом ҳамдир. У рассомчилик санъати соҳасида ҳам кўплаб ютуқларга эга. Ҳозирда Нургул ижтимоий тармоқлардаги саҳифасини фаол тарзда олиб боради ва обуначилари билан кўплаб шахсий суратларини бўлишади.
Нургул Ешилчай бугунги кунда
Нургул ҳозирда ҳам турли фильмларда суратга тушишда давом этмоқда. Унинг сўнгги лойиҳаларидан бири “Видолашув мактуби”сериали бўлиб, унда оддий оилада улғайган Зиё исмли йигитни севиб қолган Аланур ҳақида ҳикоя қилинади. Аммо қизнинг бадавлат ва мансабдор ота-онаси бу муносабатларга қарши бўлади. Кўп ўтмай, йигит хайрлашув мактубини қолдириб, узоқларга қочиб кетади, лекин орадан 30 йилдан ўтиб, уларнинг тақдирлар чизиқлари кесишади ва ўтмишдаги барча ҳақиқатлар юзага чиқади.
Актрисанинг Ўзбекистонга ташрифи ва можаролар
2022 йил 15 сентябрь куни “Ўзбекистон” анжуманлар саройида “Ипак йўли дурдонаси” XIV Тошкент халқаро кинофестивали доирасида “Туркия киноси кунлари”нинг очилиш маросими ҳамда кино ижодкорлар иштирокида ижодий кеча бўлиб ўтган эди. Тадбирда киноюлдузлар, таниқли режиссёрлар, ўзбек санъати вакиллари, кўплаб турк киноси юлдузлари, жумладан Бурак Ўзчивит ва Нургул Ешилчай ҳам иштирок этди.
Аввалига Нургул Ешилчай саҳнадаги ўриндиқда ўзини қироличадек ҳис қилаётганини ва унга фақатгина тож етишмаётганини айтиб, ҳазил қилди. Сўнг журналист ва тадбир ташкилотчиси бўлган Шоира Рауфбоева ўзининг Facebookъдаги саҳифасига турк киноижодкорлари ўртасида рўй берган совуқ вазият, ўзбек ижодкорларига ўрнак бўлиши кераклиги ҳақида ёзиб қолдирди:
Туркиядан ташриф буюрган 9 та актёр саҳнага чиқиб, томошабинлар билан юзма-юз бўлишди. Лекин ўзбек “буракшунослари” ва Ешилчай мухлислари тадбирни ярмини уларни кутиб, кўчада ўтказишган, бошловчилар икки қайта тантана билан эълон қилишса-да, улар саҳнага чиқмаган. Ва ниҳоят Нургул Ешилчай саҳнани бир бурчагидан чиқиб, ўша ерда қотди. Ҳамюрт ҳамкасбларига назар ташлади-ю, икки қўлини чўнтагига солиб, ғоз туриб олди. Узатилган микрофонни ҳам қўлига олишни эп кўрмай, бошловчининг қўлидаги микрофонга эгилиб, “Салом, яхшимисизлар?” деб бошқа актёрлар ёнига бориб ўтирмасдан, саҳна ортига ўтиб кетди. Бурак-ку умуман кўринмади.
Алишер Узоқов ҳам туркиялик актёрлар Бурак Ўзчивит ва Нургул Ешилчайнинг Тошкент халқаро кинофестивалида ўз ҳамкасбларига нисбатан ҳурматсизлик қилганига муносабат билдирди:
“Ўша куни саҳнага ҳаммага етарли стул олиб чиқиб қўйилган ҳамда дастур бўйича турк актёрларининг ҳаммаси саҳнага бирма-бир чақирилиб, ўша ерда ўтириши керак эди. Нургул ва Бурак охирида чиқиши керак эди, лекин улар чиқмади. Саҳнада жуда катта тажрибали актёр ҳам бор эди, ъЭртуғрулъ сериалида бошқа қаҳрамоннинг отаси ролини ўйнаган 75 ёшли турк актёри Сердар Гокҳан ҳам бор эди. Нургул ва Бурак улар билан битта саҳнага чиқмаймиз, деди. Кейин ёши катта таниқли турк актёрлари совға-салом берилиб, саҳнадан туширилди ҳамда улар залдаги биринчи қатордан жой олишди. Шундан кейин Нургул Ешилчай саҳнага чиқиб, ўзини кўрсатди. Жуда ўзини оладиган актриса экан. Шунда 75 ёшли отахон актёр саҳнага чиқиб, томошабинларга “Сизлар буларнинг ташқи кўринишига, машҳурлигига қараб баҳо берманглар. Аввало яхши инсон бўлиши керак. Инсоннинг қалбига қараб баҳо беринглар”, дедилар. Мен уларнинг гапларига юз фоиз қўшиламан. Балки уларнинг саҳна ортида қандайдир келишмовчиликлари бўлгандир, лекин у нарса саҳна ортида қолиши керак эди. Томошабинларга нисбатан ҳурматсизлик қилмасликлари керак эди. Нургул Буракдан ўтиб тушадиган даражада оғир феъл-атворга эга экан”, деган эди Алишер Узоқов.
Изоҳ (0)