Кино олами фақат қизиқарли сюжет ва актёрлар ўйини билан эмас, балки юракни титратадиган мусиқалари билан ҳам ёдда қолади. Баъзан биргина саундтрек бутун фильм руҳини очиб бериши, саҳналарга чуқур маъно қўшиши ва томошабинни ўша лаҳзаларга қайта-қайта олиб бориши мумкин. Йиллар ўтган бўлса-да, айрим қўшиқлар ҳануз тингловчи қалбини жунбишга келтиради. Қуйидаги рўйхатда нафақат кино, балки мусиқа тарихини ҳам ўзгартирган ўнта афсонавий саундтрек жамланган.
“Мy Heart Will Gо On” — “Титаник” (1997)
Селин Дион ижросидаги баллада “Титаник” фильмининг юраги бўлди. Фожиа ва ғамга тўла бу қўшиқ Жек ва Роузнинг абадий севгисини ифодалайди. Жеймс Ҳорнер басталаган оҳанг фильм давомида янграб, воқеаларга янада кўпроқ драматизм қўшади. Машҳур қўшиқ “Оскар” ва “Грэмми” мукофотларини қўлга киритган.
“Eye оf the Tiger” — “Рокки 3” (1982)
Survivor гуруҳи томонидан Силвестр Сталлоненинг илтимосига биноан ёзилган бу рок-гимн ирода ва ҳаёт синовларини енгиб ўтиш ҳақида. Рокки Балбоанинг жанговар руҳини айнан шу қўшиқ очиб беради.
“Stayin’ Alive” — “Шанба оқшоми васвасаси” (1977)
Bee Gees гуруҳининг бу диско-ҳити бир неча авлоднинг севимли куйига айланди. У Тони Манеронинг қадамларига ритм беради ва 70 йиллардаги Нью Йорк муҳитини акс эттиради.
“I Will Always Love You” — “Тансоқчи” (1992)
Дастлаб Доли Партон томонидан ёзилган бу қўшиқ Уитни Ҳьюстон ижросида янгича кўриниш олди. Унинг кучли ва юракни титратадиган овози фильм қаҳрамонлари орасидаги севги драмасини мукаммал акс эттирди. Қўшиқ дунё бўйлаб хитга айланди, мукофотларга сазовор бўлди ва кино тарихидаги энг таъсирли саундтреклардан бирига айланди.
“Тhe Imperial March” — “Юлдузлар жанги: империянинг жавоб зарбаси” (1980)
Композитор Жон Уильямс томонидан яратилган бу қўшиқ Дарт Вейдер образининг мавзусидир. У биринчи эшитишда таниладиган, куч ва хавфни ифодаловчи мусиқадир.
“Lose Yоurself” — “8 миля” (2002)
Эминем ижросидаги бу қўшиқ қўрқувлар, қатъият ва имконият учун кураш ҳақидадир. У фильм учун махсус ёзилган бўлиб, камбағалликдан чиқишга ҳаракат қилаётган ёш рэпер ҳақидаги сюжетга мос келади. Трек “Оскар” мукофотини олган.
“Тimе” — “Ибтидо” (2010)
Ҳанс Зиммернинг бу гипнотик композицияси фильмда вақтни асосий душман ва иттифоқчи эканлигини ҳақидаги ҳисларни кучайтиради. Унинг секин-аста кучайиши айниқса фильм финалида кучли таъсир қилади.
“Мrs. Robinson” — “Битирувчи” (1967)
Симон & Гарфункел дуэти ижросидаги бу қўшиқ ёшлик инқирози ва жамият қоидаларига қарши курашнинг саундтрекига айланди. Қўшиқ бош қаҳрамоннинг ҳаёт йўлидаги танлови ва бетартиблик ўртасидаги курашини ажойиб ифодалайди.
“Don’t You (Forget About Ме)” — “Нонушта клуби” (1985)
Simple Minds гуруҳи ижросидаги бу қўшиқ 1980 йиллардаги ёшлар маданиятининг рамзига айланган. “Нонушта клуби” (Тhе Breakфаст Club) фильми учун махсус ёзилган ушбу саундтрекда ёлғизлик, ўзини англаш ва тенгдошлар орасида ўрнини топиш каби мавзуларни теран очиб беради.
“He’s a Pirate” — “Кариб денгизи қароқчилари” (2003)
Жек Читтак образининг мусиқаси денгиз саргузаштлари руҳи билан тўла жўшқин куйдир. Фильм қаҳрамони каби ёдда қоладиган ушбу мусиқий асарни композитор Клаус Баделт ва Ҳанс Зиммер ҳамкорликда яратган.
Изоҳ (1)
Энг зури - "Хороший, плохой и злой " даги саунтрек!!!