7 апрель куни гонконглик актёр, режиссёр, оператор, мусиқачи, каскадёр, жанг санъати устаси Жеки Чан 71 ёшга тўлди. Жаҳон киносининг тирик афсонаси фильмдаги ажойиб ролларидан ташқари хайрия ишларига ҳам катта маблағ сарфлаши билан томошабинлар ҳурматини қозонган. Қуйида актёр ҳақида энг қизиқарли факт ва янглиш фикрларни тўпладик.
Жеки Чаннинг ота-онаси шунчалик камбағал эдики, улар ҳатто ўғлини сотиб юбормоқчи бўлган
Актёр ҳақида тарқалган бу воқеа ҳақиқатдан йироқ. Жеки туғилган оила чиндан ҳам кам таъминланган эди ва улар уруш туфайли Хитойдан Гонконгга қочишга мажбур бўлди. Актёрнинг отаси Хитой ҳукуматига қарши бўлган Консерватив партиянинг махфий агенти сифатда ишлаган ва унга халқ душмани айблови қўйилган. Қамоқ жазосидан қутулиш учун Жекининг оиласи қочишга қарор қилади. Уларнинг ижарада яшаш ва фарзандининг туғилиши учун маблағи бўлмагач, атрофдагилардан ёрдам сўрашган. Шу тариқа Жеки Чанни чақалоқлигида сотиб юбориш ҳақидаги миф пайдо бўлган.
Актёр болалигида кўп марта таҳқирларга учраган
Бугунги кунда Жеки Чан актёр, режиссёр, UNICEFнинг эзгу ният элчиси, жанг санъати устаси ва каскадёр. Аммо у мактаб йилларида ўзини ҳимоя қила олмагани учун тенгдошлари томонидан камситилган: мактабдаги безорилар уни тинмай калтаклашади. Жеки ундан ёшроқ бўлган талабага ёрдам бериб, шахсий чегараларни белгилашни ўргангач, ҳаммаси ўзгарган:
“Камбағаллигим туфайли атрофимдагиларнинг тўлиқ нафратини ҳис қилганман — суратга олиш майдончаларида мени ҳақорат қилишарди, жиддий жароҳатлар олардим, лекин барча қийинчиликларга шикоят қилмасдан чидадим”.
Жеки Чан билан ҳеч қайси суғурта компанияси шартнома тузишни истамайди
Суғурта компаниялари актёр билан шартнома тузишдан қочади ёки доим ишни ортга суриб юради. Баъзилар Жеки Чанни тузатиб бўлмас мазохист деб ҳам атайди, чунки актёр фильмдаги барча мураккаб каскадёрлик ишларини мустақил бажарган ва турли жароҳатлар олишдан ҳеч қачон қўрқмаган. Ўзининг “Ҳеч қачон улғайманг” китобида Чан буни тан олади:
“Масалан Брюс Лини олайлик. У жароҳат туфайли вафот этди ва бутун умрга афсона бўлиб қолди. Мен “Мўжизавий аслаҳалар” фильмида вулқон ичига тушиб кетиб ҳалок бўлганимда ҳам афсонавий актёр сифатида барчанинг ёдида қолган ва ҳаётимга чиройли якун ясаган бўлар эдим. Инсонлар Жеки Чан севган иши билан шуғулланаётганда вафот этгани ҳақида гапирган бўлар эди. Лекин ростини айтсам, мен ўлишни, ҳатто нафақага чиқишни ҳам истамайман”.
Жеки Чан танасида синмаган суяклари қолмаган
“Олган жароҳатларимнинг саноғи йўқ: мен жағимни уч марта синдирдим, бурним, барча бармоқларим, тиззам, сон суяги ва қовурғамни ҳам синдирдим, бош суягимни операция қилдирдим”, дейди актёр.
Аммо бир жароҳат унинг умрига зомин бўлиши мумкин эди. 1991 йилда Югославияда суратга олинган “Мўжизавий аслаҳалар” фильмида актёр 12 метрли девордан дарахт шохига сакраши лозим эди. Биринчи дублда Жеки буни уддалади, аммо иккинчи дублда у боши билан тошга йиқилди ва зудлик билан касалхонага олиб борилди. Муваффақиятли кечган операциядан сўнг Жеки Чан яна суратга олиш ишларига шўнғиб кетди. Бироқ синган бурун, тишлар, эшитмай қолган бир қулоқ билан актёр яна ишга қайтишига ҳеч ким ишонмаган эди.
Жеки Чан уколдан қўрқади
Оқ халатли инсонлардан қўрқиши ҳақида актёрнинг ўзи тан олган:
“Ҳаммасидан кўра инексия юборишларидан қўрқаман. Баландлик, сичқонлар, илонлар менда қўрқув уйғотмайди, аммо шприцни кўришим билан оёқларим қалтирай бошлайди”, дейди актёр автобиографиясида.
Актёр Голливудни ёқтирмайди
Актёрнинг танилишига Голливуднинг ҳиссаси катта бўлса-да, Чан Америка фильмларини ёқтирмаслигини очиқ айтади. 2016 йилда кино саноатига қўшган ҳиссаси учун “Оскар” мукофотини олган бўлса-да, актёрнинг бундай фикр билдириши мухлисларни ҳайратга солади:
“Мен Жорж Лукас ёки Стивен Спилберг каби даҳолар билан ишласам ҳам, Голливудда машҳурликка эришмаган бўлардим. “Юра даври парки” фильмини эслаб кўринг. Энди у ерда рол ўйнаган актёрларнинг исмларини ёдга олишга ҳаракат қилинг. Томошабин фақат динозаврларни ва режиссёрнинг исмини эслайди. Аммо Осиёда ҳамма Жеки Чан фильмида Жеки Чанни кўриш учун келади. Фильм сюжети ёки сарлавҳаси қандай бўлиши муҳим эмас. Буни фақат Жеки Чан қила олади!”.
Аммо Голливуд уни жуда ҳурмат қилади
“Аждаҳо муҳрининг сири” фильмида 2 та афсонавий актёр — Брюс Ли ва Жеки Чан биргаликда суратга тушган. Актёрлар тасодифан бир-бирлари билан учрашиб қолганида ижтимоий тармоқдаги саҳифаларида юқоридаги суратни бўлишди. Чан бу ҳақда шундай деб ёзди: “Қадрдон дўстим билан учрашганимдан жуда хурсандман! У тирик афсона”. Арнольд Шварценеггер ҳам сурат билан бўлишиб, шундай деган: “Қадрдон дўстим ва қаҳрамонимни кўрганимдан хурсандман. У мен учун афсонавий актёр ва илҳом манбайимдир”.
Жеки Чан жуда сахий ва меҳрибон инсон
Юлдуз ўзини Хитойнинг ҳақиқий ватанпарвари деб билади. 1988 йилда у хайрия жамғармаси ташкил қилган ва ҳозиргача мамлакатнинг муҳтож аҳолисига ёрдам берди, талабаларга стипендия тўлашда кўмаклашади.
Жеки 50 нафар болани ўз қарамоғига олган ва 10 та етимни расман асраб олган. Хитойда актёрнинг Чан касалхонаси ишлайди. Мамлакат расмийлари унга жуда яхши муносабатда бўлиб, актёрга халқ қаҳрамони унвони берилган.
Хилма-хил ҳоббилари
Жеки бўш вақтини табиатда ўтказишни афзал кўради ва ундан ҳам яхшироқ — балиқ овлашни яхши кўради.
Актёрнинг яна бир ҳоббиси бу — автомобиллар. У пойга автомобилларини йиғишни яхши кўради: Lamborghini Aventador, Lamborghini Мурcиэлаго ва Bentley Мулсанне коллекциясидаги кам сонли машиналардан ҳисобланади.
Жеки Чан — ёмон ота
Актёр рафиқаси билан оилавий жанжал қилаётган пайтда икки ёшли ўғли Жейсини четга улоқтириб юборган. Яхшиямки, бола ерга эмас, диванга тушган. Бу воқеадан ҳали ҳам актёрнинг виждони қийналади. Кейинчалик у ўғлига кино саноатига киришига ёрдам беришга ҳаракат қилди. Жейси отасининг изидан боргандек бўлди ва ҳатто фильмларда бир нечта ролларни олди.
Жеки Чан ўғлини жуда эркаликда ўсган деб ҳисоблаган. У Жейсининг мустақил ҳаёт кечиришини, ўз кучи билан муваффақиятга эришишини истаган. 2014 йилда Жейси Чан гиёҳванд моддалар билан боғлиқ ҳолатда ҳибсга олинади. Бу Жеки Чан учун жуда оғир зарба бўлган. У бу ҳолатни очиқ танқид қилган ва ўғлига жазо муқаррар бўлиши кераклигини айтган. Шунингдек, Жеки Чан бир интервьюсида шундай деган:
“Агар у муваффақиятга эришмоқчи бўлса, менинг бойлигимсиз ҳам бунга эришсин. Мен унга мерос қолдирмайман”.
Бу сўзлар ота ва ўғил орасидаги совуқликни янада оширган.
Жеки Чан кўп йиллар давомида фильм, шон-шуҳрат ва иш билан банд бўлган. У оиласига кам вақт ажратганини ўзи ҳам тан олган. У фарзандларининг хатоларини кечиришдан кўра, уларга сабоқ беришни афзал кўрган.
Дарҳақиқат, кино юлдузининг никоҳсиз туғилган қизи ҳам бор, лекин Жеки Чан унинг тарбиясида иштирок этмаган. Этта Инг исмли қизи 1999 йилда таваллуд топган, унинг онаси Элайн Инг Гонконгда таниқли актриса ва гўзаллик танловининг ғолиби бўлган. Жеки Чан ва Элайн Инг ўртасидаги муносабатлар қисқа муддатли бўлган ва кўп ўтмай Этта дунёга келган. Чан бу муносабатни хато деб атаган бўлса-да, қизининг борлигини тан олган.
Этта болалигидан оммавий ахборот воситалари эътиборида бўлган. Бироқ Жеки Чан унинг тарбиясида иштирок этмаган ва моддий жиҳатдан ҳам қизига ёрдам бермаган. ДНК тестидан кейин ҳам Чан уни тан олмаган ва ўз таржимаи ҳолида қизи ҳақида гапирмаган.
Изоҳ (0)