Ёш кинорежиссёр Муҳаммадали Самадов суратга олган “Осиё” фильми дунёнинг турли нуқталарида ўтказилган кўрик танловларда иштирок этиб, уларнинг 17 тасида ғолиб деб топилди. Режиссёр “Дарё”га берган интервьюсида пулсизлик сабаб бу фильмни қийинчилик билан суратга олгани ва тегишли ташкилотлар томонидан ёш режиссёрлар қўллаб-қувватланмаслиги ҳақида куйиниб гапирди.
— “Осиё” фильмини институтда ўқиб юрган вақтим суратга олганман. Қишлоқда туғилиб ўсганим учун бундай шароитда яшаётган қиз-аёллар тақдирига бефарқ эмасдим. Бир йил давомида сценарий устида ишлаб, диплом ишим учун курсдошларим билан бирга уни суратга олганмиз. Жуда зўр олинган демайман, аммо аввалдан бизда халқаро кўрик танловларда иштирок этиш нияти бўлган. Яширмайман, бу фильмни қарз ҳавола қилиб суратга олганман. Шу боис унда рассом ва гримёр иштирок этмаган. Агар “Ўзбеккино” томонидан қандайдир молиявий кўмак бўлганида, бундан ҳам яхшироқ натижага эришган бўлардик. Менинг хаёлим молиявий томонга кетмасдан, тўлиқ ижод ҳақида ўйлаган бўлардим.
Мен ишонаман, Ўзбекистонда халқаро даражада кино оладиган ёшлар бор. Аммо уларга ижодий эркинлик берилмагани ва молиявий муаммолари сабаб юқори натижаларга эришишолмаяпти. “Ўзбеккино” бўлса 10 фоиз ижодкорга ёрдам беради, қолганлар эса ўз кунини кўриши керак. “Ўзбеккино” ёрдам берган тақдирда ҳам, ижодий ишга аралашади, энг аламлиси эса, унинг раҳбарлигида ўтирган инсонларнинг аксарияти ижодкор эмас. Улар фақат “Биз мана бундай ишни қилдик, планни бажардик”, дейишади, холос.
Икки марта Pitching кинофестивалида иштирок этдим. Рости, қатнашиб ҳафсалам пир бўлди. Институт пайтидан бошлаб бизга жамиятдаги муаммолар ҳақида фильм суратга олмасликни қулоғимизга қуйишади. Мана масалан, кўплаб халқаро кўрик танловларда ғолиб бўлган “Чой” фильмини ҳам бу танловга қабул қилишмаган. Шокир Ҳолиқовни дунё тан олганидан кейин, уялганидан “Ўзбеккино” чақириб, тақдирлади.
Сир эмас, ёш ижодкорга пул йўқ, аммо буюртма фильмларга пул топилади. Буюртма фильмнинг мавзуси аниқ белгилаб қўйилган, аммо ижодда бундай бўлмайди. Бюджетга ажратилаётган пул халқнинг пулими, демак, фильм ҳам халқнинг дардини олиб чиқиши керак. Суратга олинганидан кейин кассасини оқламайдиган фильмлар кимга керак? Яширмайман, бир марта буюртма асосида фильм олиб бердим. Қўлдан ўтгунча эгасига етгунча тарзида ишланган фильм шунча вақтдан бери ётибди, бирорта фестивалда иштирок этаётгани йўқ.
Ёш кинорежиссёр сайтлар орқали халқаро кинофестивалларда иштирок этяпти. Қувонарлиси, ғолиблар ҳам кўп. Нима учун “Ўзбеккино” ҳеч бўлмаса, уларнинг хорижга бориб, тақдирлаш маросимида иштирок этиш харажатларини қопламайди? Бу фахр-ку, наҳотки шу борада ҳам ёшларни қўллаб-қувватлолмайди. Жуда кўп ёшлар фестивалда ғолиб бўлиб, унда иштирок этолмаган, уларни номма-ном айтиб беришим мумкин. Талаба амал-тақал қилиб, минг долларга кино оляпти, ҳеч бўлмаса уни юзага чиқариш керак-ку.
Яширмайман, маблағим йўқлиги учун икки ярим йилдан буён кино ололётганим йўқ. Мобилографлик қилиб, тирикчилик қилиб юрибман. Мен-ку амакимдан қарз олиб бўлса-да, кино олибман, аммо ёш режиссёрлар орасида синиб қолаётганлари кўп.
Кейин яна бир жиҳат, бадиий кенгашда фақат адабиётшунос ва комик актёрлар эмас, ҳақиқий режиссурани тушунадиганлар ўтирсин. Мен Аюб Шаҳобиддинов, Ёлқин Тўйчиев, Шокир Ҳолиқовларни улар қаторида кўришни истайман, дейди ёш кинорежиссёр Муҳаммадали Самадов.
Видеони тўлиқ ҳолда “Дарё”нинг YouTube саҳифасида томоша қилинг.
Изоҳ (0)