Кўпчилик Жеки Чанни ҳазилкаш, чаққон ва ҳар қандай вазиятни кулгига айлантира оладиган актёр сифатида танийди. Унинг аксарият фильмлари томошабинни қувонтиради, кулдиради ва завқлантиради. Бироқ актёрлик ва каскадёрлик маҳорати билан тан олинган Жеки Чан томошабинни йиғлатишга ҳам қодир. Унинг фильмографиясида бутунлай бошқача — жиддий, драматик, кўз ёшларни тия олмайдиган роллар ҳам мавжуд.
“Муҳожир” (2017)
Фильмнинг бош қаҳрамони Цюан Вьетнам уруши фахрийси бўлиб, Лондоннинг жанубий ҳудудда ресторан очади ва фахр билан қизи қандай қилиб гўзал ва ёш аёлга айланишини кузатади. Унинг тинч ҳаёти қизининг террорчилик ҳужумида ҳалок бўлиши билан издан чиқади. Полиция ҳаракатларидан норози бўлган Мин адолатни ўзи тиклашга қарор қилади. Унинг изланишлари уни Шимолий Ирландия сиёсатчиси, собиқ IRA аъзоси Лиам Хеннессига (Пирс Броснан) олиб боради. Мин ўзининг ҳарбий тажрибасидан фойдаланиб, қизининг ўлимида айбдорларни топишга ҳаракат қилади. Жеки Чан бу сафар суперқаҳрамон, кулгу устаси эмас, балки синган одам образида намоён бўлган.
“Синдзюку воқеаси” (2009)
“Синдзюку воқеаси” драматик триллери актёрнинг одатдаги комедик ролларидан кескин фарқ қилади. Фильмда у Японияда яшаётган хитойлик муҳожирнинг мураккаб ва фожиали ҳаётини тасвирлайди.
Фильм воқеалари 1990 йилларда Токиода содир бўлади. Асосий қаҳрамон — Тецуо (Жеки Чан), Хитойдан Японияга келган муҳожир бўлиб, у йўқолган севгилиси Сю Сю (Сю Цзинлей)ни излаб келади. Аммо Сю Сю энди япониялик якуза бошлиғи билан турмуш қурган. Тецуо эса яшаш учун жиноят дунёсига кириб, якуза гуруҳларига қарши кураш олиб боради. Бу фильмда Чан мураккаб характерли қаҳрамонни ижро эта олишини кучли актёрлик билан намоён қилади.
“Сўнгги империянинг қулаши” (2011)
Бу тарихий фильмда Жеки Чан фақат актёр эмас, балки режиссёр сифатида ҳам ўзини намоён этган. Фильм Хитой тарихидаги энг муҳим воқеалардан бири — Синхай инқилоби ҳақида. Асосий эътибор Хитойда монархиянинг тугаши ва республика тузумининг ўрнатилиши жараёнига қаратилган.
Чан образи — генерал Хуанг Син, мамлакат келажаги учун курашаётган инқилобчи. Сюжетга кўра, Хитой аҳолисининг оғир шароитда яшаши, коррупция, чет эл босқинчилиги ва Цинг сулоласи ҳукмронлигига қарши норозиликлар кучайиб боради. Инқилобчилар етакчиси Сун Яцен бошчилигида республикачилар Цинг сулоласига қарши кураш бошлайди.
Изоҳ (0)