Қуйида Голливуд киноиндустриясида ишлайдиганларнинг ўртача маоши ҳақида маълумот берамиз. Аммо кимдир бундан бир неча баробар кўп, кимдир эса камроқ олиши мумкин. Бу нафақат тажрибага, балки инсоннинг қобилиятлари ва ҳамкорлик қилаётган компаниясига ҳам боғлиқ.
Муҳаррир
Муҳаррирсиз на кино, на телесериал ёки шоуларни тасаввур қилиб бўлмайди. У ёзилган сценарийни таҳрир қилиб, унга тузатишлар киритади. Ёдда тутингки, сценарийнавис ва муҳаррир — бу бир хил касб эмас. Аммо улар бир-бирисиз мавжуд бўла олмайди. Голливудда муҳаррирларнинг кўпчилиги ҳафтасига тахминан 4200 доллар маош олади. Лекин Disney каби йирик компанияларда муҳаррирлар ҳафтасига 20-25 минг доллар даромад олишади.
Кинопублицист (публицист)
Аслида кино ва сериаллар оламида публицистлар деб PR мутахассисларини айтишади. Улар нафақат реклама ва жамоатчилик билан алоқалар йўналиши бўйича, балки журналистика бўйича ҳам тегишли таълим олган бўлади. Улар янги маҳсулотларни омма орасида тарғиб қилиш учун масъулдир. Баъзилари ўзларининг кичик фирмаларини очиб, хизматлар кўрсатади ва бу орқали йилига тахминан 1 миллион доллар даромад олади.
Студия директори
Дастлаб студия раҳбари жуда катта даромадга эга бўлмаслиги мумкин, аммо бу ҳам қандай қарашга боғлиқ. Масалан, Paramount Pictures раҳбарига ёрдамчи излаётганда таклиф қилинадиган иш ҳақи 50 минг доллардан бошланади. Ўсиш учун имкониятлар, албатта, мавжуд. Студия директори ўртача ҳисобда тахминан 120 минг доллар даромад олади.
Юрист
Кино оламида ҳақиқий ҳуқуқшуносларсиз ҳеч нарса қилиб бўлмайди, чунки бирор актёр ёки бутун бир студия ҳам судга берилиши мумкин. Ҳар бир битим учун юристлар ўзларига 5 фоиз комиссия олишади, лекин мижозлардан соатлик ҳақ олинмайди. Улар йилига 175 мингдан 250 минг долларгача даромад олишади. Юқори маошли мутахассислар эса йилига 5 миллиондан 15 миллион долларгача ишлаб топади.
Режиссёр
Ридли Скоттдек таниқли режиссёрлар битта тўлиқ метражли фильм учун 20 миллион доллар ишлаб топиши мумкин. Аммо бошловчи режиссёрлар бундай катта даромадга эга бўлиши қийин, улар йилига атиги 1 миллион доллар, ҳафтасига эса 23 767 доллар миқдорида ойлик маош олади.
Каскадёр
Ҳаётини хавф остига қўйиб, соғлиғини қурбон қилиб, суратга олиш майдонида ишлайдиганларнинг маоши кунига 1200 доллар ёки ҳафтасига 4500 доллардан бошланади. Агар уларнинг маҳорати юқори бўлса ёки майдонда дуч келадиган хавф жуда катта бўлса, каскадёрларга кўпроқ пул тўланади.
Гримёр
Профессионал визажистлар одатда машҳур шахсни оммага тақдим қилиш учун 1000 дан 1250 долларгача ҳақ олади. Бундан ташқари, уларнинг агентлигини брон қилиш учун 20 фоиз миқдорида тўлов амалга оширилади.
Чироқ устаси
Чироқ усталари операторлар билан ишлайди ва керакли ёруғликни таъминлайди. Ўз меҳнати учун мутахассислар соатига камида 60,59 доллар олади, яъни ҳафтасига 3647 доллар ишлаб топади.
Юлдузнинг агенти
Дастлабки босқичда агентлик вакиллари йилига атиги 80 мингдан 100 минг долларгача маош олишади. Малакаларини оширганлар эса йилига 600 минг доллар даромад топиши мумкин.
Яқинда Pay Up Hollywood ҳаракати агентликларда ёрдамчи ходимларнинг маошларини бир оз оширишга ёрдам берган бўлса-да, кўпчиликнинг фикрича, ҳали ҳам жуда паст даражадаги ҳақ тўланади. Масалан, йирик агентликлардаги ёрдамчилар соатига 25 доллар, фастфудда ишловчилар эса 20 доллар маош олади.
Актёр
Актёрнинг маоши, аниқроқ айтганда — гонорари, унинг қанчалик талабгир ва машҳурлигига боғлиқ. Масалан, кичик Роберт Дауни Marvel’нинг янги фильмларида Доктор Дум ролини ижро этиши учун 80 миллион доллар олган. Райан Рейнолдс эса 30 миллион доллар олади.
Агар сериалларда суратга тушаётган актёрлар ҳақида гапирадиган бўлсак, уларнинг гонорари тахминан ҳар бир қисм учун 1 миллион доллар атрофида бўлади. Шунингдек, фақатгина 400 мингдан 600 минг долларгача оладиганлар ҳам бор. Сериаллардаги иккинчи даражали актёрлар эса энг кам ҳақ олади. Ўртача ҳисобда улар саккиз соатлик иш куни учун 216 доллардан кўп ололмайди.
Продюсер
Продюсер бўлиш жуда фойдали: улар муваффақиятли битимлар учун деярли ҳар доим еттита рақамли суммаларни олишади. Агар узоқ йиллардан бери ишлаётган мутахассислар ҳақида гапирадиган бўлсак, улар одатда 2 миллион доллар аванс, иш тугагандан сўнг қолган суммани олишади. Телевидениега келсак, сценарий ёзувчи сифатида параллел ишламайдиган ва студия билан шартнома имзоламаган продюсерлар пилот серия учун гонорар олмагунча бир тийин ҳам топишмайди. Бу гонорар одатда 15 мингдан 50 минг долларгача бўлади.
Сценарийнавис
Агар инсон фақат сценарийнавис сифатида ишласа ва лойиҳасини компанияларга соца, қораламанинг ўртача нархи 350 мингдан 500 минг долларгача бўлади. Машҳур муаллифлар қоралама сценарий учун 1 миллион доллардан кўпроқ даромад олиши мумкин. Якуний версия учун эса сценарийнавис бонус сифатида 150 мингдан 500 минг долларгача олади.
Бош директор
Турли студияларнинг бош директорларига гилдияларнинг иш ташлашлари ҳам таъсир қилмаган. Масалан, Netflix компаниясининг бош директори Тед Сарандос 2023 йилда 49,8 миллион доллар даромад олган. Disney компаниясининг бош директори Роберт Айгер ишга қайтган биринчи йилда 31,6 миллион доллар ишлаб топган. Ҳатто қийин аҳволда бўлган Warner Bros. Discovery компаниясининг раҳбари Девид Заслав ҳам 2023 йилда 49,7 миллион доллар даромад қилган.
Изоҳ (0)