Tomoshabinlar kino yulduzlarini faqatgina shon-shuhrat va millionlab dollarlik gonorar bilan tasavvur qiladi. Ammo real hayotda ba’zida eng yirik va muvaffaqiyatli filmlarda rol o‘ynagan aktyorlar ham kutilgan darajada ko‘p haq olmaydi. Quyida juda katta daromad keltirgan filmlarda ishtirok etib, ammo nisbatan kam gonorar olgan 5 aktyor haqida so‘z yuritilgan.
Deniel Redkliff — “Garri Potter va hikmatlar toshi”
Rejissyor Kris Kolambus uchun eng qiyin vazifa — Garri, Ron va Germiona rollariga to‘g‘ri aktyorlarni topish edi. Kasting juda uzoq davom etdi va bir payt Kolambus Garri Potter roliga mos aktyorni topishga ishonchni yo‘qotdi. Shunda u Deniel Redkliffni topgan va uning ota-onasining rad javobidan so‘ng, eng yaxshi aktyorni topa olmasligini anglagan. Biroq omad Kris tomonda bo‘ldi va Redkliffning ota-onasi oxir-oqibat o‘g‘li “Garri Potter”da rol o‘ynashga ruxsat berdi.
Film byudjeti 125 million dollar bo‘lgan va 1 milliard dollar daromad keltirgan bo‘lsa-da, Deniel faqat 1 million dollar olgan. Keyingi filmda gonorari 2 millionga ko‘tarilgan, ammo bu ham asosiy rol uchun juda kam edi. Shunga qaramay, Deniel, Emma Uotson va Rupert Grint o‘sha paytda eng ko‘p haq olgan britaniyalik yosh aktyorlar bo‘lgan.
Jeymi Dornan — “Kulrangning 50 tusi”
Jeymi Dornan “Bir zamonlar ertakda” serialidagi ikkinchi darajali roli orqali ozgina mashhurlikka erishgan, keng e’tirofga esa “Qulash” seriali orqali sazovor bo‘lgan. Ana shu kichik, biroq yetarlicha jiddiy tajriba bilan u “Kulrangning 50 tusi” filmiga kirib keldi. Jeymi bu film haqida hech qachon iliq fikr bildirmagan, chunki u bosh qahramon obrazini yoqimsiz va o‘z shaxsiyatiga mutlaqo zid deb hisoblagan.
Film byudjeti 40 million dollar bo‘lgan, Jeymining gonorari esa atigi 100 ming dollar deb belgilangan. Aynan shu gonorar uni keyingi qismlarda qolishga undagan yagona sabab bo‘lgan. Agar to‘lov miqdori o‘zgarmaganida, Dornan loyihani tark etgan bo‘lardi — axir u mashhurlikni allaqachon qo‘lga kiritgan va boshqa takliflarni ko‘rib chiqishi mumkin edi. Biroq studiya uni qo‘ldan chiqarishni istamadi va gonorarini sezilarli darajada oshirdi. Natijada Jeymi keyingi ikki film uchun jami 10 million dollardan ortiq daromad oldi.
Jon Travolta — “Jinoyat haqidagi hikoya”
“Jinoyat haqidagi hikoya” filmigacha Jon Travolta allaqachon mashhur aktyor edi, biroq u karyerasi qulab borayotgan pallada bo‘lgan. Ilgari ommabop va talabgir bo‘lgan aktyorni birdaniga tanqidchilar nishonga oldi. U nafaqat omadsiz filmlarda, balki hit bo‘lgan kartinalarda ham muvaffaqiyatsiz rollar ijro etgan. Hech narsa yordam bermagach, Travolta yangi rollarni tanlashda ancha ehtiyotkor bo‘la boshladi va bir safar hattoki “Forrest Gamp” filmidagi bosh rolni rad etdi.
Buni tanlov deb bo‘ladimi? Ma’lum ma’noda — ha, chunki u aynan shu film bilan “Jinoyat haqidagi hikoya” orasida tanlov qilgan va natijada Kventin Tarantino kartinasini tanlagan. To‘g‘risi, u bu filmni past byudjetli va kichik auditoriyaga mo‘ljallangan “Telbalarcha itlar” uslubidagi loyiha deb o‘ylagan. Shu sababdan Travolta atigi 150 ming dollar gonorarga rozi bo‘lgan. Ammo oxir-oqibat u bu film orqali ancha katta yutuqqa erishdi — bu gal uning daromadi pulda emas, balki mashhurlikda o‘lchandi. “Jinoyat haqidagi hikoya” tufayli Jon Travolta yana shon-shuhrat cho‘qqisiga qaytdi.
Jon Hill — “Uoll-strit bo‘risi”
Jon Hill — faqat pul uchun rol tanlaydigan aktyor emas. Aftidan, u o‘zi uchun yetarli darajada mablag‘ topgan va endi rol tanlashda ko‘proq obraz va loyiha mohiyatiga e’tibor beradi. Agar biror narsa unga ma’qul kelmasa, eng istiqbolli loyihalardan ham voz kechishi mumkin. Masalan, Jon Hill rejissyor Mett Rivzning “Betmen” filmida rol o‘ynashi kerak edi, biroq yakunda bu rolga Kolin Farrell tanlandi.
Jonning nima sababdan filmda ishtirok etmagani aniq emas. Ayrimlar uning Pinguin emas, Zagadkachini o‘ynashni istaganini aytadi. Boshqalar esa unga Pinguin obrazi yoqmaganini, u bu personajni o‘zgartirishni xohlaganini ta’kidlaydi. Yana bir fikrga ko‘ra, masala gonorarda bo‘lgan: Jon 10 million dollar so‘ragan, bu esa Robert Pattinson olgan 5 million dollardan ham yuqori bo‘lgan. Ehtimol, bu uch sababning barchasi birgalikda rol tanloviga ta’sir qilgan.
Ammo aniq bir narsa bor: bir necha yil avval Jon katta gonorardan voz kechib, faqat Martin Skorseze bilan ishlash uchun rozi bo‘lgan. “Uoll-strit bo‘risi” filmi uchun u SAG (Screen Actors Guild) belgilagan eng minimal haq — 60 ming dollar olgan. Taqqoslash uchun, Leonardo Di Kaprio aynan shu film uchun 10 million dollar ishlab topgan, garchi ular ekranda deyarli doimo birga ko‘rinish bergan bo‘lsa ham.
Jon Kendi — “Uyda yolg‘iz”
Jon — professional va juda mashhur komik, u “Uyda yolg‘iz”ning birinchi qismida kichik rolni ijro etgan. Filmning byudjeti atigi 15-18 million dollarni tashkil qilgan, chunki studiya filmning katta muvaffaqiyatga erishishiga ishonmagan va hamma uni oddiy bolalar komediyasi sifatida ko‘rgan. Rejissyor Kris Kolambus studiyadan imkon qadar ko‘proq pul olishga harakat qilgan, studiya esa, o‘z navbatida, hamma narsada tejashni xohlagan, jumladan aktyorlarning gonorarlarini ham.
Jon Kendi o‘z roli uchun atigi 414 dollar olgan. Hatto suratga olish jarayonida Jon buni achchiqlanib aytgan bo‘lsa-da, baribir rolini juda yaxshi ijro etgan. Kris Kolambusning so‘zlariga ko‘ra, uning personajining deyarli barcha replikalari — bu improvizatsiya edi. Kendi filmning deyarli yarim milliard dollar daromad keltirganini bilib, hayratda qoldi. Jon studiyadan kompensatsiya talab qilgan, ammo bu ish qanday tugaganligi hali ham noma’lum, chunki Jon filmning chiqarilishidan 4 yil o‘tib vafot etdi.
Izoh (0)