HeatWorld нашри хабар беришича, америкалик актёр Леонардо Ди Каприо италиялик модел Виттория Черетти билан турмуш қурмоқчи. Эндиликда 50 ёшли актёр қариликни ёлғизликда ўтказишни истамаяпти ва ниҳоят Голливуднинг энг машҳур бўйдоқлари рўйхатидан чиқишга тайёр.
Витторияни келин сифатида кўриш Ди Каприо учун жуда муҳим воқеа. У узоқ вақт давомида оила қуриш ҳақида ўйлаб келди ва ҳозирда бу қарорни имкон қадар тезроқ амалга оширишни истайди, дейилади манбада.
Инсайдерларнинг таъкидлашича, 26 ёшли Черетти актёрга аввалдан қатъий шарт қўйган: у оила қуриш таклифини узоқ вақт кутишга тоқати йўқ ва бу муносабатларнинг мантиқий ва якуний босқичи никоҳ бўлиши шарт.
Ди Каприонинг қарорига жиддий ёндашаётганининг исботи сифатида, унинг ташқи кўриниши ва турмуш тарзидаги ўзгаришлар қайд этилмоқда. Унинг сезиларли даражада озгани ва кечки базмларда камроқ иштирок этаётгани жуфтликнинг муносабатлари жиддий эканлигидан далолат беради.
Манбанинг таъкидлашича, Виттория Лео ҳаётига катта таъсир кўрсатган, шу сабабли актёр доимо уйдан ташқарида бўлишга эҳтиёж сезмаяпти.
Актёрнинг бу қарордан энг хурсанд одам Ди Каприонинг 82 ёшли онаси бўлди. У узоқ вақтдан бери набира кутаётганини яширмайди.
Маълумот учун, америкалик машҳур актёр, фильм продюсери ва экологик фаоллиги билан танилган Леонардо Ди Каприо 1974 йил 11 ноябрда Лос Анжелесда туғилган. У актёрлик фаолиятини болалигида реклама ва телесериалларда бошлаган, кенг оммага эса “Титаник” фильми орқали танилган. Шундан сўнг “Буюк Гетсби”, “Авиатор”, “Муқаддима”, “Лаънатланганлар ороли”, “Омон қолган” ва “Уолл стрит бўриси”нинг юлдузига айланган. Унинг бойлиги тахминан 260 миллион доллар. Гонорарлар жуда катта эканлиги боис ўзига орол, ҳашаматли уйлар, квартиралар сотиб олган ва дабдабали ҳаёт кечиради. Унинг “Юқорига қарама” фильмининг ўзи 30 миллион доллар даромад келтирган.
Кинодан ташқари, Ди Каприо экофаоллардан биридир. Актёрнинг жамғармаси табиатни муҳофаза қилиш ва иқлим ўзгаришига қарши курашга миллионлаб доллар маблағ йўналтиради.
Изоҳ (0)