Гонконглик машҳур актёр, Осиё ва Ғарб киносида ўзига хос ўрин эгаллаган Чоу Юнфат жорий қил 18 май куни туғилган кунини нишонлади. Актёр “Ёлланма қотил”, “Анна ва қирол”, “Ёрқин келажак” ҳамда “Кариб денгизи қароқчилари: Дунёлар чегарасида” фильмларидаги образлари билан машҳур.
Акторлик фаолияти давомида Чоу юздан ортиқ киноларда суратга тушди, умумий гонорарлари миқдори 720 миллион доллардан ошди, бироқ Чоу Юнфат бу пулдан деярли фойдаланмади.
Камбағал оиладаги болаликдан кино юлдузгача
Чоуга тақдир болалигидан кулиб боқмаган. У 1955 йилда Гонконг яқинидаги чекка қишлоқда туғилган ва эрта болаликдан оғир кунларни кечирган. Унинг отаси нефть танкерида ишлаган, онаси эса уйда дим-сам (хитойча таом) тайёрлаб сотган. Ёш Чоу ота-онасига ёрдам берар: мол боқар, боғларни суғорар, ер чопар, онаси билан кўчада савдо қилар эди.
Кейин улар оилавий Гонконгга кўчиб келишди. Оиланинг тўнғич фарзанди бўлган Чоу ўсмирлик даврида мактабни тарк этишга мажбур бўлди, бу унинг танлови эмас, балки зарурат эди. Унинг ҳар бир куни ягона мақсад: озгина бўлса-да пул топиш билан бошланар эди. Ёш йигит фаррошлик қилди, почта тарқатди, кафеларда идиш-товоқ ювди. У виждонига зид бўлмаган ҳар қандай ишга тайёр эди, аммо барибир пул етмасди.
1973 йилда ҳаммаси ўзгарди: Чоу тасодифан TVБ телеканалида актёрлик маҳорати курси учун саралаш имтиҳони бўлаётганини кўриб қолди. Унинг ҳеч қандай тажрибаси, уқуви йўқ эди, лекин Чоу қашшоқликдан шу қадар чарчаган эдики, омадини синашга қарор қилди ва бу уриниш самара берди. У кастингдан ўтиб, кичик бир рол олди ва ниҳоят биринчи марта меҳнати учун яхши ҳақ олди.
Бу воқеадан кейин у актёрлик курсларига ёзилди, келажакдаги касбини чуқур ўргана бошлади, янги телесериалларга синовдан ўтди. Узоқ вақт Чоу фақат эпизодик ролларда ишлади. 1986 йилда у таниқли режиссёрнинг эътиборига тушди ва Жон Вунинг “Порлоқ келажак” фильмида бош ролни ижро этди. Мазкур фильм ҳақиқий портлаш бўлиб, Чоуни юлдузга айлантирди.
Бир йил ўтгач, у режиссёр Ринго Лем билан ишлай бошлади ва “Оловдаги қамоқхона”, “Оловдаги шаҳар” каби лойиҳаларда янада кўпроқ танилди. Кейинчалик “Ўйинчилар худоси”, “Туғма ўғри” каби фильмлар Чоуни Осиё киносининг энг яхши актёрларидан бирига айлантирди.
1998 йилда у “Ёлланма қотиллар” триллери, “Анна ва қирол” тарихий-романтик драмасида иштирок этди. Жоди Фостер билан жуфтлик гавдаланган фильм томошабинлар ва танқидчилар томонидан илиқ кутиб олинди.
Сахийлик ва матонат
Чоу Юнфат машҳурлик ва шуҳрат чўққисига чиққанида ҳам дабдабали ҳаётга берилмади. У бойлигини кўз-кўз қилишдан воз кечди, оддий ҳаёт тарзини афзал билди. У жамоат транспортидан фойдаланади, ресторанларга бормайди, уйда овқатланади ва қимматбаҳо буюмларни харид қилмайди.
Актёрнинг ҳисоб-китобларига кўра, Чоунинг шахсий харажатлари бир ойда 150 доллардан ошмайди. Гардеробидаги кийимлар янгиланмайди, фақат жуда эскириб қолганида алмаштирилади. Унинг рафиқаси Жасмин ҳам бу турмуш тарзини тўлиқ қўллаб-қувватлайди. Улар бирга хайрия жамғармаси ташкил қилишган ва мунтазам равишда муҳтожларга ёрдам бериб келишади. Чоунинг фалсафасига кўра, бойлик фақат яхшиликка хизмат қилгандагина қийматга эга.
Севги синовлари
Фильмларда Чоу Юнфат доимо кучли ва жасур қаҳрамонлар ролини ижро этади, аммо актёрнинг камера ортидаги ҳаёти идеал бўлмаган. Унинг илк муҳаббати актриса Кенди Ю эди. Бу муносабатлар узоқ давом этган, лекин улар ажралган. Кейинчалик яна бирга бўлишга уриниб, расман турмуш қуришган, бироқ никоҳ бир йилдан ортиқ давом этмаган.
Актёрнинг кейинги муҳаббати актриса Иди Чан эди, уларнинг муносабати беш йил давом этган. Чоунинг онаси Иди Чанни қабул қилмади, актёр эса онасига қарши чиқишга журъат топа олмай, Иди билан ҳам ажрашган.
1983 йилда Чоу Жасмин Тан билан турмуш қурди. Тўйларидан беш йил ўтиб, Жасмин ҳомиладор бўлди. Шифокорлар ҳеч қандай хавф ҳақида огоҳлантиришмаган бўлса-да, туғруқдан бир ҳафта олдин чақалоқ ҳаракатдан тўхтади. Улар интиқлик билан кутган қизалоқ киндик ўқига ўралиб, вафот этди. Орадан узоқ йиллар ўтгач ҳам оила фарзандли бўла олмади.
Бугунги кунда Чоу Юнфат сураткашлик билан шуғулланади ва яқинда ўзининг янги фотосуратлар кўргазмасини тақдим этди.
Изоҳ (0)