“Толибон” ҳаракати Афғонистондаги ягона кинематография ташкилоти ҳисобланган Afghan Film давлат киностудиясини тарқатиб юборди. Киностудия офиси ёпилди. Бу ҳақда манбаларга таяниб “Аму.тв” хабар берди.
“Толибон” бу борада расмий баёнот бермаган. Бироқ ходимлар муассаса тугатилгани ва фаолияти тўхтатилгани ҳақида огоҳлантирилган.
Афғонистонда бадиий ҳаёт бутунлай барбод бўлди. Афгҳан Фильм шунчаки бино эмас эди — у кинематографик хотирамизни асрашга масъул эди, деди хавфсизлик нуқтайи назаридан номаълум қолишни истаган кобуллик режиссёрлардан бири.
Муассасанинг ёпилиши “Толибон” томонидан Афғонистонда маданий ва кўнгилочар ҳаётнинг кенг миқёсда бостирилиб, аёллар ҳуқуқ ва эркинликларининг чекланиши шароитида содир бўлди. 2021 йил август ойида “Толибон” ҳокимиятга қайтганидан сўнг, жамоат жойларида қўшиқ айтиш, чолғу асбобларини чалиш, жонли мавжудотларни тасвирлаш ман этилди, санъаткорлар эса сургун ва таҳдидларга дучор бўлди.
Afghan Film киностудияси 1968 йилда шоҳ Муҳаммад Зоҳиршоҳ ҳукмронлиги даврида ташкил этилган. У 1970 йиллардаги кино хроникаларидан тортиб, республика давридаги тўлиқ метражли бадиий фильмларгача бўлган мамлакатнинг визуал тарихини сақлаб қолишда муҳим рол ўйнади.
Муассасада фуқаролар уруши ва 1990 йилларда “Толибон”нинг биринчи ҳукмронлиги даврида йўқ қилинишининг олдини олиш учун яширилган ёки контрабанда йўли билан чет элга олиб кетилган қимматбаҳо кино архиви ҳам сақланган.
2021 йилда республика қулашидан олдин Afghan Film Ахборот ва маданият вазирлиги ҳомийлигида фаолият юритган. Фаолиятининг сўнгги йилларида киностудия ўз коллекциясини модернизация қилиш ва рақамлаштириш бўйича лойиҳаларни амалга оширган.
Аввалги ҳукумат даврида Afghan Filmʼнинг сўнгги раҳбари Саҳра Каримий бўлиб, у 2021 йил август ойида “Толибон” Кобул устидан назоратни қўлга киритганида мамлакатдан қочиб кетган. Ўшандан бери киностудия эътиборга молик фаолият юритмаганди.
Изоҳ (0)