Том Ҳарди Esquire U.K. журналига берган интервьюсида саломатлиги энди аввалгидек бўлмаслиги ҳақида айтди. Йиллар давомида суратга олиш майдонларидаги жанглар актёрга ўз таъсирини кўрсатмоқда.
“Мен тиззамдан икки марта операция бўлдим, умуртқа диски чуррасига учрадим, яна ишиасга ҳам чалиндим (катта ўмров нерв — ишиад нервнинг яллиғланиши ёки сиқилиши натижасида пайдо бўладиган оёқдаги оғриқли ҳолат)”, деди Ҳарди.
Актёрнинг сўзларига кўра, у плантар фасциит (товон билан оёқ қисми оралиғидаги плантар фасция деб аталувчи пайнинг яллиғланиши) касаллигига ҳам учраган:
“Буларнинг бари қаердан пайдо бўлди? Нега? Нима учун?! Бундан ташқари, сонимдаги пайни чўзиб олганман. Бутун танам парчаланиб кетгандек гўё. Менимча, аҳволим яхшиланиши даргумон”, дея якунлади у.
Британиялик актёр, продюсер ва сценарий муаллифи Том Ҳарди ўзининг кучли характерли роллари билан танилган. У 1977 йил 15 сентябрда Лондонда туғилган. Ҳардининг актёрлик фаолияти театр саҳнасидан бошланган бўлса-да, у кино оламида ҳам тезда муваффақият қозонди. Унинг катта ютуқлари орасида “Ёвуз рицар: Афсонанинг қайтиши” фильмидаги Бейн, “Телба Макс: Ғазаб йўли” фильмидаги Макс Рокатански, шунингдек, “Веном” трилогиясидаги бош роллари машҳур.
Том Ҳарди жисмонан ўзига доим талабчан бўлган ва экстремал ролларга тайёрланишда танасини ҳам, иродасини ҳам аямаган. У кўп марта фильм учун танасини ўзгартирган: мушак массасини тўплаган, оғир машғулотларни бажарган, кураш ва жанг санъатлари билан шуғулланган. Актёр “Омон қолганлар”, “Жангчи” ва “Веном” трилогиясидаги суратга олишлар вақтида кўплаб жароҳатлар олган.
Изоҳ (0)