“Қиш сонатаси” қандай суратга олинган ва унинг актёрлари ҳозир нима билан банд? (фото)

Нафақат Осиё давлатларида, балки Европада ҳам “Корейс тўлқини”нинг илк даврини бошлаб берган “Қиш сонатаси” драмаси Юн Сок Хо томонидан суратга олинган ва KBS (Korean broadcasting system) телерадиокомпанияси томонидан 2002 йилда эфирга узатилган.

Сериал ҳақида қисқача маълумот

Сериал икки ёшнинг муҳаббати ва айрилиғи ҳақида ҳикоя қилади. Гарчи мавзу доимгидек севгига тақалса-да, режиссёрнинг ёндашуви умуман бошқача. Машҳур пианиночининг ўғли — фильм бош қаҳрамони Кан Жун Санг Чунчон қишлоғига кўчиб келади. Отасининг ўлими, онаси билан доимий келишмовчиликлар туфайли у ҳамиша ўзини керакциз деб билади.

Бир синфда ўқишни бошлаган Жун Санг ва Ю Жин ўртасида тез орада муҳаббат пайдо бўлади, кўп ўтмай Ю Жин Жун Сангнинг автоҳалокат туфайли вафот этганини эшитади. Орадан йиллар ўтади ва болаликдаги дўсти билан турмуш қуришга тайёргарлик кўраётган Ю Жин худди Жун Сангга ўхшаш инсонни учратади, лекин Ли Мин Хен исмли бу одам Ю Жинни эслай олмайди.

Драма KBS телеканалида максимал 28,8 фоиз ва ўртача 23,1 фоиз рейтинг билан эфирга узатилди.

Драма суратга олинган Нами ороли сайёҳлик марказига айланган

Драмадаги энг гўзал саҳналар Сеулдан 60 километр узоқликда жойлашган Нами оролида суратга олинган. 2001 йилда, яъни сериал чиқишидан аввал оролга йилига 270 минг сайёҳ ташриф буюрган бўлса, 2002 йилда бу кўрсаткич 650 000 га кўтарилди.

Бу ерга сайёҳлар Жун Санг ва Ю Жин хотирасига қўйилган ҳайкалларни томоша қилиш ҳамда ўша машҳур хиёбонда сайр қилиш учун ташриф буюрадилар.

Бош ролларни актёрлардан Пе Ёнжун ва Чҳве Жиу гавдалантирган

Ҳозирда бош қаҳрамонлар 52 ва 49 ёшда. “Қиш сонатаси” сериалига мувофиқ улар 30 ва 27 ёшда.

“Қиш сонатаси” 20 дан ортиқ давлатда муваффақиятли намойиш этилгандан сўнг, Пе Ёнжун энг талабгир актёрлардан бирига айланди. Бундан ташқари, у ишлаб чиқариш ва ресторан бизнесини йўлга қўйди ва молиявий барқарорликка эришди.

Унинг ёзувчилик тажрибаси ҳам омадли кечди: унинг корейс ошхонаси, тарихи ва маданиятига бағишланган “Корейс гўзаллигига саёҳат” асари бир неча тилларга таржима қилинди ва бесцеллерга айланди.

2006 йилга келиб Пе Ёнжун Корея шоу-бизнесидаги энг бадавлат шахслардан бирига айланди. New York Times уни “2,3 миллиард долларлик одам” деб атади. Бироқ Ёнжун тез орада актёрлик фаолиятини якунлади. У 2007 йилда сўнгги марта драмада бош ролни ижро этди.

Чҳве Жиунинг “Қиш сонатаси”дан кейинги фаолияти ўзгарувчан бўлди: унинг карьерасидан муваффақиятли лойиҳалар ҳам, омадсиз сериаллар ҳам ўрин олди. Шунга қарамай, актриса узоқ вақт давомида энг кўп гонорар оладиган корейс актрисаларидан бири бўлиб қолди.

Унга хориждан кўплаб мўмай таклифлар ҳам келиб тушди. Чҳве Жиу ҳозир ҳам кино саноатида ишлаб келмоқда. У сўнгги марта 2022 йилда “Учар юлдузлар” сериалида иштирок этди.

Драма барча давлатлар орасида Японияда энг юқори машҳурликка эришди

Япон тилига дубляж қилинган сериал 2004 йилнинг ёзида NHK телеканалида эфирга узатилди ва ўртача 14-15 фоиз рейтингга эга бўлди. Якуний эпизод эса баъзи ҳудудларда 23,8 фоизга етди. Ўзининг улкан муваффақияти туфайли драма яна бир бор йил охирида асл форматда, японча субтитрлар билан намойиш этилди.

NHK компанияси драма билан боғлиқ маҳсулотларни сотишдан 3,5 миллион доллардан ортиқ фойда кўрди. Япониялик қизлар Жун Санг образини гавдалантирган актёрнинг ашаддий мухлисига айланди. Ўша вақтдаги бош вазир Дзюнитиро Коидзуми “Японияда Пе Ёнжун мендан кўра машҳурроқ”, деган эди.

Пе Ёнжуннинг Японияга ташрифи чоғида уни кутиб олиш учун аэропортга 3000 га яқин мухлислар йиғилган эди. Тартибни сақлаш учун 350 нафар полициячи сафарбар этилган, бироқ тиқилинч туфайли бир неча киши шифохонага ётқизилган.

“Қиш сонатаси” — абадий севги мавзусига бағишланган фасллар тетралогиясининг бир қисмидир.

Уларга қуйидагилар киради:

“Куз эртаги” (2000)

“Қиш сонатаси” (2002)

“Ёз ифори” (2003)

“Баҳор таронаси” (2006)

Драмаларнинг барчаси режиссёр Юн Сок Хо томонидан суратга олинган.

“Қиш сонатаси” драмасиниг бир нечта адаптация версиялари мавжуд.

Мазкур драма асосида 2004 йилда Японияда “Қиш сонатаси” номли 26 қисмдан иборат аниме ишлаб чиқилган.

Бундан ташқари, сериал асосида PlayStation ва Nintendo учун турли видеоўйинлар ҳам яратилган.