2025 йилда машҳур оила вакили ўзининг биринчи “Оскар” ҳайкалчасига сазовор бўлди. Унинг рақобатчилари орасида Юра Борисов ҳам бор эди. Акасининг соясидан чиқиб, ўз йўлини топган бу актёрнинг ижодий фаолияти қандай ривожланган?
Ҳозирда Киран Калкинлар оиласининг энг машҳур вакили — 30 йил давомида бу унвон Маколейга тегишли эди. Бироқ Киран ҳам бу вақт ичида салмоқли фильмография ва нуфузли мукофотларга эга бўлди. Бундан ташқари, “Ҳақиқий оғриқ” фильми Калкиннинг ягона аҳамиятли асари эмас.
Акасининг соясида
Бўлажак актёр 1982 йил 30 сентябрда Нью Йоркда телефончи аёл ва Бродвей актёри оиласида дунёга келди. Оила бошлиғи Кристофер Калкиннинг молиявий қийинчиликлари ва рўёбга чиқмаган орзулари уни фарзандларига умид боғлашга мажбур этди. У ёшлигиданоқ болаларини кастингларга олиб борар, бироқ фақат Маколейдагина истеъдод борлигига ишонарди.
Киран илк бор икки ёшида Манҳеттен театри саҳнасига чиқади. 1995 йилда ота-онаси ажрашгач, ака-укаларнинг онаси Патрисия собиқ эрини тўнғич ўғли карьерасининг барбод бўлишида айблайди. Оилавий муносабатлар мураккаблигига қарамай, Киран онаси билан яқин алоқада қолади.
Оламшумул машҳурлик юкини кўтара олмаган акасининг тақдири Киран Калкинга катта таъсир кўрсатади. Ҳатто карьераси юқорига чиққанда ҳам, у шовқин-сурондан қочиб, театр пардаси ортида яширинишни маъқул кўради. Киран 40 ёшигача ҳаётини кино билан боғлашни исташига ишончи комил эмасди. Бироқ у саноат тенденциялари ортидан қувламасдан, секин-аста ўз муваффақият йўлини яратди.
“Уйда ёлғиз” (1990)
Бош ролга Маколей Калкин тасдиқланади. Муваффақиятдан илҳомланган Кристофер Калкин бошқа фарзандларидан ҳам фойдаланишга уринган бўлса-да, режиссёр фақат 6 ёшли Киранни танлайди. “Уйда ёлғиз” фильмида ёш актёр Кевиннинг амакиваччаси ва оиланинг энг кичик аъзоси Фуллер Маккалистер ролини ижро этади.
Албатта, барча шуҳрат акасига насиб этади, аммо Киран учун бу рол катта кинога қўйилган илк қадам бўлиб, шу пайтгача у рекламаларда суратга тушиб юрарди. Киран Фуллер ролига “Уйда ёлғиз 2” фильмида қайтади, бу фильм ҳам катта муваффақият қозонади.
“Келиннинг отаси” (1991)
Маколейдан фарқли ўлароқ, Киран оиласи томонидан ҳеч қандай босимни ҳис қилмаган. Отаси ўғлида истеъдодни кўрмаган, унинг фильмлардаги иштироки учун миллионлаб гонорар талаб қилмаган. Айнан шу нарса Киран Калкинга акасининг тақдиридан қутулишга имкон беради, чунки акасининг Голливуддаги карьераси тез орада тўхтайди. Киран иккинчи даражали, баъзида эса ҳатто учинчи даражали роллар билан қаноатланади.
Унинг болалар фильмографиясидаги энг эътиборга лойиқ лойиҳалардан бири “Келиннинг отаси” бўлди. Бу Кираннинг кинодаги иккинчи роли эди. Стив Мартин ва Даян Китон иштирок этган комедия катта муваффақият қозониб, БМИ кино мукофотига сазовор бўлади. Томошабинлар Калкин келиннинг укаси ролини аъло даражада ижро этганини таъкидлайди. Бу иши учун у “Ёш ижодкор” мукофотига номзод этиб кўрсатилади.
“Виночилар қоидалари” (1999)
Иккинчи жаҳон уруши авж олган пайтда АҚШ шимоли-шарқидаги болалар уйида фожиа юз беради. Гомер Уэллснинг тарбияланувчиларидан бири (Тоби Магуайр) шифокор ёрдамчиси бўлиб ишлайди. Кенди (Шарлиз Терон) ва унинг фронтга кетаётган севгилиси билан учрашгандан сўнг, у дунёни кўриш вақти келди деб қарор қилади. Киран Калкин Гомерга қаттиқ боғланган энг ёш етимлардан бири — Бастер ролини ўйнайди.
Бастер образи экранда кўп кўринмаса-да, “Оскар” мукофотига сазовор бўлган “Виночилар қоидалари” фильми чиққандан сўнг, Киран мустақил санъаткор сифатида тилга олинади. Кейинчалик уни фақат Маколей билан боғламай қўйишади.
“Чўкаётган Игби” (2002)
Ўсмирлик даври ҳақидаги трагикомедияда бош ролни ижро этиш Киран Калкин учун катта ютуқ бўлди. Ёш Игби Нью Йоркнинг юқори табақаси ва оиласига қарши бош кўтаради. Йигит исёнкор кайфиятда, бироқ киноя ортида ёлғизлик ва тушунилишга бўлган иштиёқ яширинган. “Чўкаётган Игби” фильми Киранга драматик актёр сифатидаги истеъдодини намоён этиш имконини берди. Бу иш унга кўплаб мукофотлар келтирди, шунингдек, у илк бор “Олтин глобус”га номзод этиб кўрсатилди.
Калкиннинг хотирлашича, айнан ўша пайтда ўзини биринчи марта ҳақиқий актёр сифатида ҳис қилган: у персонаж характерини қандай ривожлантириш ва суратга олиш майдонида ишлаш нимани англатишини тушуна бошлаган. Бу беш ҳафта унинг учун актёрлик курслари ўрнини босади. Худди шу йили Киран яна бир лойиҳада — “Хавфли ўйинлар”да қатнашади. Аммо муваффақият чўққисида Калкин танаффус олишга қарор қилиб, ўзини театрга бағишлайди.
“Қоғоз одам” (2009)
Ёзувчи Ричард Данн (Жефф Даниэлс) бесцеллер яратишни орзу қилади, аммо унинг китоблари кўп уринишларга қарамай, харидоргир эмасди. Кутилмаганда у Эбби (Эмма Стоун) билан танишиб қолади. Эбби унинг дўстига айланади ва ижодий инқирозни енгишга ёрдам беради. Киран Калкин Эббининг хаёлий дўсти ролини ижро этади, у Эббига яширинча ошиқ эди.
“Қоғоз одам” фильми актёр учун кинога шов-шувли қайтиш бўлмайди, бироқ унга Эмма Стоун билан танишиш имконини беради. Севишганлар икки йил бирга бўлишади, сўнг ажралишади. Шундай бўлса-да, актёрлар дўстона муносабатларини сақлаб қолишади ва “Муви 43” комедиясида бирга суратга тушишади. Ўша пайтга келиб Калкин аллақачон Жазз Чартонга уйланганди.
“Ҳақиқий оғриқ” (2024)
Муваффақиятли актёрликдан истиқболли режиссёрликка ўтган Жесси Айзенбергнинг фильми амакиваччалар — Девид ва Бенжи ҳақида ҳикоя қилади. Улар бувиларининг уруш пайтидаги бошидан кечирганларини билиш мақсадида Польша бўйлаб саёҳатга чиқишади. Кутилмаганда омадсиз Бенжи роли Калкинга кўплаб совринлар ва танқидчилар эътирофини келтиради. “Оскар”дан ташқари, актёр “Олтин глобус”, BAFTA, Актёрлар гилдияси мукофоти ҳамда Critics Choise Awards мукофотларини қўлга киритади.
Дастлаб Айзенбергнинг ўзи бебош ака ролини ўйнашни режалаштирган, бироқ лойиҳа продюсери Эмма Стоун уни режиссёрликка эътибор қаратишга ишонтиради. Киран Калкин номзодини “Ворислар” сериалининг катта мухлиси бўлган Айзенбергнинг синглиси таклиф этади. Жессининг ўзи Кирани фақат “Уйда ёлғиз” фильмидаги роли орқалигина биларди.
Эътиборли жиҳати шундаки, Калкин суратга олишлардан бир йил олдин шартнома имзолаган бўлса-да, сўнгги дақиқаларда хотини билан узоқ вақт кўришолмаслиги сабабли иккилана бошлайди. Шунда Стоун айёрона усул қўллаб, агар Киран рад этса, “Ҳақиқий оғриқ” лойиҳаси барбод бўлишини айтади. Бу суҳбатдан сўнг актёр ҳеч иккиланмай Польшага чипта олади.
Айтганча, Киран “Оскар” маросимида нутқ сўзлар экан, агар ғолиб бўлса, рафиқаси унга тўртинчи фарзанд совға қилишга ваъда берганини мамнуният билан айтиб ўтди.
Изоҳ (0)