Эртаклар болалигимизнинг ажралмас бир қисмидир. Улар нафақат кўнглимизни кўтаради, балки яхшилик ва ёмонлик ўртасидаги кураш, меҳр ва жасорат каби абадий қадриятларни ўргатади. Аммо вақт ўтиши билан бу эртакларнинг қаҳрамонлари ҳам замон билан ҳамнафас бўлиб ўзгаради. Қуйида эски ва янги фильмлардаги эртак қаҳрамонларини солиштириб, улар қандай ўзгарганини кўриб чиқишга қарор қилдик.
Кикимора
Киноэкрандаги энг эсда қоларли кикиморалардан бири бу “Олтин шохлар” фильмидаги Вера Алтайская ижро этган Кикимора-Кухарочка образидир. У аввалига Баба Яга томон бўлади ва фильм охирида бош қаҳрамонларга ачиниб, Ягадан қочиб кетади.
“Болалар учун мўлжалланмаган кино” сериалида кикиморани Александра Ребёнок ижро этган. Бу қаҳрамон илгари бўлган ботқоқдаги ифлос махлуқдан бутунлай фарқ қилади. Кикимора замонавий, чиройли ва жозибали бўлган бўлса-да, ҳийлакор характерини йўқотмаган.
Баба Яга (Ялмоғиз кампир)
Баба Яганинг илк ижобий қиёфаси Борис Рицаревнинг “Қувноқ сеҳргарлик” фильмида намоён бўлган. Унда ушбу образни Валентина Сперантова ижро этган. У ҳали ҳам супургида учади, лекин аввалги ёвуз Баба Ягага фақат шу томони билан ўхшайди.
Замонавий фильмларда Баба Яганинг образи жозибадор ва самимий бўлиб бормоқда. Карен Захаров ва Армен Ананикяннинг яқинда суратга олинган фильмида Баба Ягани Людмила Артемева жонлантирган. Унинг образи ёвузликка қарши курашувчи ҳақиқий суперқаҳрамондир.
Кашей
Ўлмас Кашей образини биринчи бўлиб экранларда Георгий Миллар маҳорат билан яратган. Унинг қаҳрамони шафқатсиз, кучли ва даҳшатли ёвузлик тимсоли эди.
“Ёмғирдан кейинги пайшанба” фильмида Олег Табаков ижро этган Кашей эса бошқача кўринишда: бу энди қариган ва озиб кетган ёвуз эмас, балки ўрта ёшдаги, семизроқ ва тилларанг костюм кийган образдир.
2023 йилда чиққан “Балиқча амри билан” фильмида Фёдор Лавров ижро этган Кашей эса мутлақо бошқача: у меҳрибон, ўсиб улғайган қизини тушунишга ҳаракат қиладиган одамдир.
Василиса
Василиса образи илк бор 1939 йилда режиссёр Александр Роу томонидан суратга олинган “Гўзал Василиса” фильмида пайдо бўлган. Бош ролни Валентина Сорогожская ижро этган.
2023 йилги фильмда Василиса ташқи кўриниши ўзгармаган — силлиқ йиғилган сочлар, катта кўзлар. Бироқ бу қаҳрамон ўзига хосликка эга. “Балиқча амри билан” эртагида Мила Ершова Василисани кучли ва дадил қиз сифатида гавдалантирган. “Сўнгги баҳодир. Мерос” сериалида эса турмуш қурган ва икки фарзандни тарбиялаган Василиса билан танишамиз.
Қайсар малика
1938 йилда суратга олинган “Балиқча амри билан” фильмида малика Евеляни София Терентева ижро этган. 2023 йилги версияда малика Анфиса (Алина Алексеева) ўта инжиқ ва айёр образда тасвирланган. Унинг ҳийла-найранглари туфайли Емеля узоқ ва хавфли саёҳатларга чиқишга мажбур бўлади.
Марфуша
Инна Чурикова ижросидаги Марфуша образи ўзига хос, эсда қоларли ва ҳатто ҳазилкаш бўлишига қарамай, салбий персонаж бўлиб қолади. У ёнғоқ еяётган саҳнаси ва айтган иборалари кўпчиликнинг ёдида қолган.
Янги фильмда Марфуша ролини Виктория Серикова ижро этади. Бу сафар Марфа ва Настя рақиб эмас, балки энг яқин дўстлар бўлади. Улар қадимий сеҳрга қарши курашиб, Морозконинг юрагини эритишга ҳаракат қилишади.
Ёш баба Яга (Ёш ялмоғиз кампир)
Илк марта ёш Баба Яга образини “Олов, сув ва… мис трубалар” эртак фильмида кўриш мумкин. Бу гўзал қиз атиги 100 ёшда бўлади ва Кашейга турмушга чиқишни истайди. “Сўнгги баҳодир: Мерос” сериалида ёш Баба Ягани Юлия Пересилд ижро этган. "
Княз Гвидон
1966 йилда экранларга чиққан “Шоҳ Султон ҳақидаги эртак“ фильмида шаҳзода Гвидонни Олег Видов ижро этган. Бу классик асарларнинг энг чиройли экранга мослаштирилган намунасидир.
2026 йилда ушбу эртак ака-ука Андреасянлар томонидан янгича талқинда қайта суратга олинади. Унда шаҳзода Гвидон ролини Алексей Онежен ижро этади.
Оққуш-малика
Болаликдан таниш бўлган Оққуш-маликани 1967 йилда экран юзини кўрган “Шоҳ Султон ҳақидаги эртак” фильмида Ксения Рябинкина гавдалантирган. У нафақат кино актрисаси, балки профессионал балерина бўлган. Шунинг учун ҳам у сув устида сузаётгандек ҳаракат қилган.
Аммо 2021 йилда “Пушкин эртаклари. Катталар учун” сериалида ҳамма нарсалар ўзгарди. Воқеалар замонавий дунёда кечади. Шаҳзода Елисей — реп ижрочиси, олтин хўроз эса сунъий интеллектга айланган. Оққуш-малика (Олеся Судзиловская ижросида) эса сочсиз ва футуристик образда тасвирланган.
Карабас-Барабас
Совет даврининг энг севимли болалар фильмларидан бирида Карабас-Барабас образини Владимир Этуш қойилмақом ижро этган. Бу қаҳрамон қўғирчоқ театрининг эгалиги, қўполлиги билан ёдда қолган.
2026 йилда эса Карабас-Барабас ролини Фёдор Бондарчук ижро этади.
Изоҳ (0)