Швейцарияда пластик чиқиндилар муаммосини ҳал қилиш бўйича музокаралар муваффақиятсиз якунланди

Бирлашган Миллатлар Ташкилоти доирасида Женева шаҳрида пластик чиқиндилар муаммосини ҳал қилиш борасида ўтказилган музокаралар муваффақиятсиз тугади. Бу ҳақда DW нашри хабар берди.

Манбага кўра, БМТ ҳомийлигида ўтказилган музокараларда 180 дан ортиқ мамлакат ва 600 та нодавлат ташкилот вакиллари Женевада пластик чиқиндиларга қарши глобал келишувни қабул қила олмади. Музокараларга раҳбарлик қилган Буюк Британиядаги Эквадор элчиси Луис Ваяс Валдивиэсонинг айтишича, келишув матни бўйича муҳокамалар давом этади. Валдивиэсо кейинги учрашувнинг аниқ санаси ва жойини айтмаган.

“Женевада пластик ифлосланишини глобал миқёсда тўхтатиш учун зарур бўлган битимни имзолашга имкон топилмади. Бу умидсизликка сабаб бўлди”, деган Германия делегати Ёхен Фласбарт. Фласбартнинг таъкидлашича, мамлакатлар позициялари ҳануз жуда фарқ қилса-да, келишувга эртами-кечми эришилади деган умид сақланиб қолмоқда. У Германия ва Европа Иттифоқидаги ҳамкорлари бунинг учун барча имкониятларни ишга солишини қўшимча қилган.

Женевадаги музокаралар 14 августда тугаши керак эди. Бироқ якуний келишувда 100 дан ортиқ мунозарали бандлар борлиги сабабли яна бир кунга чўзилган. Келишмовчиликка асосий сабаб Германия талаб қилаётган пластик ишлаб чиқаришни қисқартириш масаласи бўлган. Бунга нефть ишлаб чиқарувчи давлатлар, жумладан, Саудия Арабистони, Россия ва Эрон каби давлатлар қатъиян рози бўлмаган.

БМТга аъзо давлатлар 2022 йилда пластик чиқиндиларга икки йил ичида барҳам бериш мажбуриятини олган. Шундан сўнг, бошланган музокараларнинг биронтасида якдил келишувга эришилмади. 2024 йил декабрида Жанубий Кореянинг Пусан шаҳрида ўтказилган учрашувларда Германия ҳамда 100 дан ортиқ давлат келишувни қўллаб-қувватлади. Қарши чиққан давлатларнинг аксарияти нефть қазиб олиш ва пластик ишлаб чиқаришга хом ашё етказиб бериш билан шуғулланади. Оқибатда, музокаралар тўхтатилиб, муҳокамаларни Женевада давом эттиришга қарор қилинган эди.

Ҳозирда дунёда ҳар йили 400 миллион тоннадан ортиқ пластик ишлаб чиқарилади. Буларнинг ярми бир марталик маҳсулотлар ҳиссасига тўғри келади. Барча пластик чиқиндиларнинг 10 фоизидан камроғи қайта ишланади. Қолган қисми ёқиб юборилади. Шунингдек, пластиклар чиқинди полигонлари, океан ва тупроққа тушиб, табиат ҳамда инсон саломатлигига зарар етказади.

Дунёдаги пластикнинг учдан бир қисми Хитойда ишлаб чиқарилади. Яна 20 фоизи бошқа Осиё мамлакатлари ва Шимолий Америкага тўғри келади. БМТ маълумотларига кўра, Шимолий Америка ва Европа аҳолиси йилига ўртача 85–94 кг пластик истеъмол қилади.