Olmaliqda bayram shodiyonasi: Olmaliq kon-metallurgiya kombinati 75 yoshda

Kuni kecha “Olmaliq kon-metallurgiya kombinati” AJ tashkil topganining 75 yilligi munosabati bilan “Metallurg” madaniyat saroyida rasmiy tadbir va bayram konserti bo‘lib o‘tdi. Unda yurtimiz va Toshkent viloyati faollari, kombinat ishchi xodimlari hamda unga hamkor tashkilot vakillari, xorijiy davlatlar elchilari qatnashdi.

Tadbir avvalida Prezident Shavkat Mirziyoyevning kombinat jamoasiga yo‘llagan bayram tabrigini O‘zbekiston Respubilkasi Bosh vaziri Abdulla Aripov o‘qib eshittirdi.

Ushbu sana munosabati bilan davlat rahbarining tegishli farmoniga muvofiq taqdirlangan 22 nafar ishlab chiqarish ilg‘orlariga Bosh vazir tomonidan “Mehnat shuhrati”, “Do‘stlik” ordenlari hamda “Shuhrat” medallarini topshirildi.

Tadbirning badiiy qismida konsert dasturi namoyish etildi.

— Barcha hamkasblarimni bugungi shodiyona bilan samimiy qutlayman, — deydi “Do‘stlik” ordeni sohibi, OKMK Shaxtaqurilish boshqarmasi boshlig‘i Zokirjon Abdullayev. — Konchilik sohasida shaxtyor bo‘lib ishlayotganimda 35 yil bo‘ldi. Eng katta baxt — bizga bildirilgan ishonch deb bilaman. Biz shaxtyorlar ma’danlarni saralab, yuzaga chiqaramiz va shu mehnatimiz orqali yurtimiz rivojiga o‘z hissamizni qo‘shyapmiz. Avvallari konchilik kasbiga qiziqish oz edi, biroq bugunga kelib kombinatda bo‘layotgan qator o‘zgarishlar va yirik loyihalar sababli minglab yoshlarning sohaga qiziqishi ortdi. Kombinat so‘nggi vaqtlarda barcha jabhada ancha ilg‘orladi. Shu qatorda, Shaxtaqurilish boshqarmasi oxirgi yillarda ikkita konni foydalanishga topshirdi. Yerosti konlarida esa ish jadal sur’atlarda ketmoqda.

— Kombinatdagi ish faoliyatimni 2007-yilda boshlagan bo‘lsam, salkam 20 yillik mehnat faoliyatim davomida ko‘plab o‘zgarishlarning guvohi bo‘lib kelyapman, — deydi “Shuhrat” medali sohibi, “OKMK” ilm-fan va innovatsiyalar bo‘limi yetakchi muhandisi Nargiza Bekbo‘tayeva. — Eng faxrlisi, olib borilayotgan islohot va yangiliklarning ishtirokchilaridan biri ekanligim. 4-Mis boyitish fabrikasining tamal toshi qo‘yilgandan so‘ng OKMK yaqin kelajakda mis sanoati gigantlari, qolaversa, rangli metallar ishlab chiqaruvchi yetakchi korxonalar qatoriga qo‘shilishi uchun mehnat jamoamiz bilan bor kuch-g‘ayratimizni safarbar qilib kelyapmiz.

Tadbir mehmonlari shu kuni yangi barpo etilayotgan 3-Mis boyitish fabrikasining qurilish jarayoni bilan ham tanishdi. OАV vakillari uchun tashkil etilgan press-turda kombinat tarkibidagi sanoat korxonalari va konlardagi ish jarayonlari haqida ma’lumot berildi.

Qarshiboyeva Umida — OKMK Boshqaruv raisining axborot siyosati masalalari bo‘yicha maslahatchisi — Axborot xizmati boshlig‘i:

— OKMK nafaqat O‘zbekistonda, balki Markaziy Osiyodagi eng yirik korxonalardan biri hisoblanadi va dunyodagi mis ishlab chiqaruvchi korxonalar 30 taligiga kiradi. Bugungi kunda 16 turdan ziyod mahsulotlar 20 dan ortiq davlatlarga eksport qilinadi. Kombinat O‘zbekistonning ikkinchi soliq to‘lovchisi va shu bilan birga, yurtimizdagi asosiy mis ishlab chiqaruvchi korxona hisoblanadi.

Kombinatda 35 mingdan ziyod ishchi xodim ishlaydi. Yiliga 148 ming tonnadan ortiq mis katodi, 90 ming tonna rux metali, shuningdek, oltin va kumush qimmatbaho metallari, molibden, volfram kabi noyob metallar ishlab chiqariladi. Hozirgi paytda 2030-yilgacha kombinatni rivojlantirish konsepsiyasi doirasida “Yoshlik-1” konini o‘zlashtirish” va 3-Mis boyitish fabrikasini qurish ishlari olib borilmoqda. Fabrika foydalanishga topshirilgandan so‘ng uch mingga yaqin ish o‘rinlari yaratiladi. Shu yilning 15-oktyabr kuni Prezident Shavkat Mirziyoevning Olmaliq kon-metallurgiya kombinatiga tashrifi davomida ushbu loyihaning ikkinchi bosqichi doirasida 4-mis boyitish fabrikasi qurilishiga start berildi. Bu loyiha orqali yiliga 146 ming tonna katodli mis va boshqa qimmatbaho metallarni olish quvvatlari yaratiladi. Fabrika va uning infratuzilmalarida uch mingdan ortiq kishi ishlaydi. Yangi fabrikaning ishlab chiqarish jarayonida yuqori texnologik, ekologik xavfsiz va tejamkor texnologiyalar qo‘llaniladi.

Olmaliq kon-metallurgiya kombinati tomonidan “Yoshlik-1” konini oʼzlashtirish” investitsiya loyihasining ikki bosqichi doirasida 4-Mis boyitish fabrikasi va uning infratuzilma obyektlari quriladi.Mazkur loyiha 2024-2028-yillarda amalga oshiriladi. Buning natijasida rangli va qimmatbaho metallarni ishlab chiqarish hajmi oshadi va yangi ish o‘rinlari yaratiladi.

Fabrikada yiliga 60 mln tonna maʼdan qayta ishlanib, 800 ming tonnadan ko‘proq mis kontsentrati ishlab chiqariladi.

OKMK sport majmuasida kombinat xodimlari, shahar aholisi va mehmonlar uchun bayram konserti bo‘lib o‘tdi.

Bayram tadbiri kombinat sportchilarining paradi bilan boshlandi. So‘ngra “Olmaliq kon-metallurgiya kombinati” AJ boshqaruv raisi, senator Abdulla Xursanov kombinat 75 yilligi munosabati bilan bayram tabrigini o‘qib eshittirdi.

Kombinatning 75 yilligi munosabati bilan bir guruh ishchi xodimlar 3-darajali “Konchilik shuhrati” ko‘krak nishoni bilan taqdirlandi. Mukofotlar Abdulla Xursanov tomonidan o‘z egalariga topshirildi.

Kombinatning barcha xodimlari va ularning oila a’zolari, shahar aholisi uchun kechki bayram konserti tashkil etildi. Estrada xonandalari Shohruxxon, Rayhon G‘anieva, Ruxsora Otajonova va “VIA Maroqand” hamda “Bojalar” guruhi, Toshkent viloyati filarmoniyasi, “Metallurg” madaniyat saroyi xonandalari eng sara qo‘shiqlari bilan barchani xushnud etdi.

Olmaliqda bayram shodiyonasi: Olmaliq kon-metallurgiya kombinati 75 yoshda

Izoh (0)

Mavzuga doir

Daryo.uz | Sizning muammoingiz yechimi