Prezident Shavkat Mirziyoyev Olmaliq kon-metallurgiya kombinatining yangi mis boyitish fabrikasi qurilishini boshlash marosimida nutq so‘zlamoqda. Bu haqda davlat rahbarining matbuot kotibi Sherzod Asadov xabar berdi.
“Vatanimiz mustaqilligining 30 yilligi arafasida ezgu niyatlar bilan mana shunday ulkan loyihani amalga oshirishga kirishmoqdamiz. Bu muhim voqea nafaqat ushbu kombinat hayotida, balki mamlakatimiz sanoati tarixida yangi davr boshlanayotganidan yaqqol dalolat beradi”, — deydi davlat rahbari.
Ma’lum qilinishicha, kombinat tashkil etilganidan buyon o‘tgan 70 yillik davr mobaynida bu yerda 1,5 milliard tonna ruda qazib olinib, 6 million tonnadan ortiq mis, 3,5 ming tonna kumush va 850 tonna oltin ishlab chiqarilgan.
Bugungi kunda qariyb 40 ming nafar ishchi-xizmatchi mehnat qilayotgan Olmaliq kombinati mamlakat sanoatining chinakam lokomotivlaridan biriga aylangan. Respublikada ishlab chiqarilayotgan sanoat mahsulotining 7 foizi, eksport hajmining 15 foizi kombinat hissasiga to‘g‘ri keladi.
Shuningdek, davlat budjetiga tushadigan jami daromadlarning 8 foizini aynan ushbu korxona ta’minlaydi. Ayniqsa, keyingi yillarda kombinat faoliyati yuksak darajaga ko‘tarilib, mis ishlab chiqarish hajmi 1,5 barobarga ko‘paygan va 150 ming tonnaga yetkazilgan.
O‘tgan uch yil mobaynida kombinat konlarida umumiy uzunligi 206 ming metr bo‘lgan 475 ta quduq burg‘ulandi. Xalqaro miqyosda tan olingan xorijdagi laboratoriyalarda ushbu konlar rudasining 100 mingdan ortiq namunalari kimyoviy tahlillar asosida chuqur o‘rganildi. Ana shunday ilmiy tadqiqotlar natijasida, xalqaro baholash mezonlariga ko‘ra, bu yerdagi misning yalpi zaxirasi – mana shu raqamlarga alohida e’tibor berishingizni so‘rayman – 45 million tonnani, oltin zaxirasi esa 5 ming tonnadan ziyodni tashkil etishi aniqlandi.
Bu raqamlar esa dunyodagi eng yirik, noyob oltin va mis konlari aynan mana shu hududda joylashgan deb aytish uchun to‘la asos bo‘la oladi.
Shuningdek, bu yerda qazib olinayotgan ruda tarkibida kumush, molibden, selen, tellur, reniy va boshqa nodir metallar borligi ham aniqlangan. 2030-yilga borib mis mahsulotlariga bo‘lgan ehtiyoj kamida 40 foizga ortishi prognoz qilinmoqda. Ishonch bilan aytish mumkinki, Olmaliq kombinati ishlab chiqaradigan mahsulotlarga xalqaro talab uzoq yillar davomida saqlanib qoladi.
Ana shu holatni hisobga olib, 2017-yilda ‘Yoshlik-1’ konlari kompleksini o‘zlashtirish bo‘yicha amaliy ishlarni boshlagan edik.
O‘tgan 4 yil mobaynida barcha zarur geologik tadqiqotlar va 83 million kub metrdan ortiq hajmdagi qazish ishlari bajarildi. Mana endi, dastlabki bosqichda qiymati 2 milliard dollar bo‘lgan yangi uchinchi mis boyitish fabrikasini qurishni boshlayapmiz”.
Davlat rahbari qurilishi boshlanayotgan yangi fabrikaning salohiyati haqida ham to‘xtalib o‘tib, ushbu korxona 2024-yilga borib yiliga 60 million tonna rudani qayta ishlash imkonini berishini, ikkinchi bosqichda esa quvvatlar 160 million tonnaga yetishi yoki bugungi ko‘rsatkichdan 3 barobarga ko‘payishini ta’kidlagan.
“Ana shu ikki bosqichni amalga oshirish tufayli korxona 2028-yilga borib yiliga 400 ming tonna mis, 50 tonna oltin va 270 tonna kumush ishlab chiqarish quvvatiga ega bo‘ladi. Shu tariqa Olmaliq kombinati tog‘-kon metallurgiyasi sohasida dunyodagi eng yirik sanoat majmualaridan biriga aylanadi. Pirovard natijada kombinat ishlab chiqaradigan mahsulotlar hajmi 3 martadan ziyod ko‘payib, uning qiymati hozirgi 2,5 milliard dollardan qariyb 8 milliard dollarga yetadi.
Loyiha doirasida 11 mingta yangi yuqori texnologik ish o‘rinlari yaratiladi. Bu esa yosh yigit-qizlarimiz uchun geolog, muhandis, texnolog, loyihachi, dasturchi va boshqa zamonaviy kasb-hunarlarni egallash imkonini beradi. Bu ulug‘vor rejalar – tom ma’noda inqilobiy qadam, desak, to‘g‘ri bo‘ladi”, — deya qayd etgan Shavkat Mirziyoyev.
Izoh (0)