O‘zbekistonda soliq to‘lovchilar 8 oyda 16 trillion so‘m soliq imtiyozlaridan foydalandi. Bu haqda Soliq qo‘mitasi axborot xizmati xabar berdi.
Ma’lum qilinishicha, 2024-yilning yanvar-avgust oylarida 138 661 ta tashkilot 16 trillion so‘m miqdorda soliq imtiyozlaridan foydalangan. Shu bilan birga:
- 2 927 ta korxona moliyaviy xizmatlar bo‘yicha 13,1 trillion so‘mlik QQSsiz operatsiyalar amalga oshirgan;
- 7 185 ta korxona 22,5 trillion so‘m miqdorida QQS nol stavkasini qo‘llagan.
Soliq turlari kesimida foydalanilgan soliq imtiyoz summalari:
- QQS – 8 trillion so‘m;
- foyda solig‘i – 2,3 trillion so‘m;
- yer solig‘i – 1,9 trillion so‘m;
- ijtimoiy soliq – 1,9 trillion so‘m;
- JSHODS – 884,7 milliard so‘m;
- mol-mulk solig‘i – 801,6 milliard so‘m;
- AOS – 139 milliard so‘m;
- suv resurslaridan foydalanganlik uchun soliq – 19,9 milliard so‘m.
Xalqaro ekspertlar xulosasiga asosan, QQS bo‘yicha moliyaviy xizmatlar va nol stavka hisobi alohida yuritiladi.
Bundan avval Korrupsiyaga qarshi kurashish agentligi O‘zbekistonda tashkilotlarning 2024-yil I yarim yillik yakuni bo‘yicha soliq va bojxona imtiyozlaridan foydalanganlik holatini tahlil qilgandi. I yarim yillik yakuni bo‘yicha foydalanilgan umumiy soliq va bojxona imtiyozlari jami 63,4 trillion so‘mni tashkil etgan. Ya’ni davlat tomonidan yaratilgan imkoniyatlar va berilgan imtiyozlar natijasida shuncha mablag‘ korxona va tashkilotlar ixtiyoriga qoldirilgan. 2023-yilda bu ko‘rsatkich 127,1 trillion so‘mni tashkil etgan.
Soliq imtiyozlaridan 132 059 ta tashkilot foydalangan, qo‘llangan jami imtiyoz summasi 39 trillion so‘mni, qo‘llangan soliq imtiyozlarining 82,2 foizi yoki 32,1 trillion so‘mi qo‘shilgan qiymat solig‘i (16 trillion so‘mi QQSdan nol darajali stavka) hisobiga to‘g‘ri keladi.
Navoiy kon-metallurgiya kombinati, Olmaliq kon-metallurgiya kombinati hamda bank-moliya tashkilotlaridan tashqari, eng yirik imtiyozdan foydalangan tashkilotlar qatoridan quyidagilar o‘rin olgan:
- Uzbekistan Airways AJ — 881,4 mlrd so‘m;
- “Navoiyuran” DK — 581,4 mlrd so‘m;
- “O‘zbekiston temir yo‘llari” AJ — 529,6 mlrd so‘m;
- Asia Trans Gas MCHJ — 453,7 mlrd so‘m;
- UzAuto Motors AJ — 281,8 mlrd.so‘m;
- Uz-Kor Gas Chemical MCHJ QK — 224,3 mlrd so‘m;
- Uzcard — “Yagona umumrespublika protsessing markazi” AJ — 145,7 mlrd so‘m;
- Uzbekistan Airports AJ — 145,1 mlrd so‘m;
- “O‘zbektelekom” AJ — 131,2 mlrd so‘m;
- “O‘zbekiston milliy elektr tarmoqlari” AJ — 121,4 mlrd so‘m;
- “Islom Karimov nomidagi Toshkent xalqaro aeroporti” MCHJ — 116,9 mlrd so‘m.
Izoh (0)