Toshkentda fuqaroni IIV akademiyasiga o‘qishga kiritishni va’da qilgan shaxs ushlandi

Toshkent shahri, Qashqadaryo, Toshkent va Xorazm viloyatlarida OTMlarga o‘qishga kiritib qo‘yishni vaʼda qilgan shaxslar ushlandi. 

Xabar berilishicha, DXX xodimlari tomonidan IIV bilan hamkorlikda o‘tkazilgan tezkor tadbirda, Toshkent shahrining Yashnobod tumanida yashovchi, 1986-yilda tug‘ilgan shaxs o‘zining mansabdor tanishlari orqali Toshkent viloyatining O‘rta Chirchiq tumanida istiqomat qiluvchi fuqaroni IIV akademiyasiga o‘qishga kiritib qo‘yish evaziga 22 ming dollar olgan vaqtida ashyoviy dalillar bilan ushlandi. 

Qashqadaryo viloyatida kuzatilgan holatda, Qarshi innovatsion taʼlim universiteti mutaxassisi 3 nafar fuqaroni Toshkent axborot texnologiyalari universitetining Qarshi filialiga mazkur oliy taʼlim muassasasidagi tanishlari orqali har birini 4 ming dollardan, jami 12 ming dollar evaziga 2-kursdan o‘qishga kiritib qo‘yishni vaʼda qiladi. 

O‘tkazilgan tezkor tadbirda, u 11 700 dollar olgan vaqtida ushlandi. 

Qashqadaryo viloyatining Qamashi tumanida yashovchi, 1987-yilda tug‘ilgan shaxs Sirdaryo viloyatining Boyovut tumanida istiqomat qiluvchi fuqaroni Toshkent davlat pedagogika universitetiga o‘qishga kiritib qo‘yish evaziga 10 ming dollar talab qilib, oldindan 5 ming dollar olgan vaqtida ashyoviy dalillar bilan ushlandi. 

Olmaliq shahar bolalar va o‘smirlar sport maktabi murabbiyi o‘zining yuqori lavozimda ishlovchi tanishlari orqali O‘zbekiston davlat jismoniy tarbiya va sport universitetiga o‘qishga kiritib qo‘yish evaziga Olmaliq shahrida yashovchi fuqarodan 3500 dollar olgan vaqtida ushlandi. 

Urganch davlat universitetining fakultet dekani Gurlan tumanida yashovchi, 1990-yilda tug‘ilgan fuqaroning ishonchiga kirib, uning qarindoshini mazkur oliy taʼlim muassasasiga o‘qishga kirishda bo‘ladigan ijodiy imtihonlardan o‘tkazib berish evaziga 2600 dollar va 2,5 mln so‘m olgan vaqtida ushlandi.

Boshqa holatda esa Urganch ixtisoslashtirilgan sanʼat maktabining bo‘lim boshlig‘i Bog‘ot tumanida yashovchi fuqaroga tanishlari yordamida Yunus Rajabiy nomidagi O‘zbek milliy musiqa sanʼati institutiga o‘qishga kirishi uchun yo‘llanma olib berish va amaliy imtihonda ko‘maklashish evaziga 4 ming dollar talab qiladi.

Ammo u so‘ralgan pul mablag‘ini olgan vaqtida ushlandi.

Hozirda mazkur shaxslarning barchasiga nisbatan jinoyat ishlari qo‘zg‘atilgan.