Shavkat Mirziyoyev 29-iyul kuni Toshkent viloyati Olmaliq shahriga tashrif buyurib, kon-metallurgiya kombinati konlari negizida rangli va qimmatbaho metallar ishlab chiqarishni kengaytirish borasidagi ishlar bilan tanishgani, Olmaliq kon-metallurgiya kombinatining 3-mis boyitish fabrikasi qurilishi haqida xabar berilgan edi. Davlat rahbari ushbu fabrika qurilishiga tamal toshini qo‘ydi.
Prezident matbuot xizmatining xabar berishicha, “Yoshlik-1” koni negizida qurilayotgan 3-mis boyitish fabrikasi shu boradagi ulkan qadamlardan biridir. Qiymati 2 milliard dollar bo‘lgan ushbu korxona birinchi bosqichda yiliga 60 million tonna rudani qayta ishlash imkonini beradi.
Ikkinchi bosqichda quvvat 160 million tonnaga yetadi yoki bugungi ko‘rsatkichdan 3 barobarga ko‘payadi. Ushbu ikki bosqich amalga oshirilishi natijasida korxona 2028-yilga borib yiliga 400 ming tonna mis, 50 tonna oltin va 270 tonna kumush ishlab chiqarish quvvatiga ega bo‘ladi. Shu tariqa Olmaliq kombinati tog‘-kon metallurgiyasi sohasida dunyodagi eng yirik sanoat majmualaridan biriga aylanadi.
Shuningdek, qo‘shimcha qilinishicha, kelgusida kombinat ishlab chiqaradigan mahsulotlar hajmi 3-martadan ziyod ko‘payib, uning qiymati hozirgi 2,5 milliard dollardan qariyb 8 milliard dollarga yetadi. 11 mingta yangi, yuqori texnologik ishchi o‘rinlari yaratiladi.
Davlat rahbari Olmaliq kon-metallurgiya kombinatining 3-mis boyitish fabrikasi quruvchilari uchun yaratilgan sharoitlarni ham ko‘zdan kechirdi.
Ma’lum qilinishicha, korxona yaqinida 3 ming kishiga mo‘ljallangan yotoq majmuasi barpo etilgan. Ishchilarning yashashi, dam olishi, sport bilan shug‘ullanishi uchun barcha sharoitlar yaratilgan.
Prezident bu yerda yotoq o‘rinlarini ko‘paytirish, bunday ixcham, shinam majmualarni boshqa zavodlarda ham tashkil etish bo‘yicha topshiriqlar berdi.
Mavzuga doir:
Izoh (0)