Germaniyaning bir qator kompaniyalari va Olmaliq kon-metallurgiya kombinati o‘rtasida bir necha yo‘nalishlarda hamkorlik o‘rnatilgan.
Jumladan, Frayberg texnika universiteti Konchilik akademiyasi bilan hamkorlikda ta’lim va mutaxassislarni tayyorlash bo‘yicha samarali ishlar olib borilyapti.
Ana shu hamkorlik aloqalari doirasida bugun Frayberg texnika universiteti Konchilik akademiyasi Tog‘-kon institutining direktori, professor Karsten Drebenshtedt boshchiligidagi bir guruh professor va aspirant, talabalardan iborat delegatsiya OKMKga tashrif buyurdi.
OKMK rahbariyati va mehmonlar o‘rtasida tashkil etilgan uchrashuvda yaqin istiqboldagi o‘zaro manfaatli hamkorlik aloqalari muhokama etildi. Nemis delegatsiyasi 10 kun davomida kombinatda bo‘ladi.
Tashrif davomida oliygoh professorlari kombinat tarkibiy bo‘linmalari va ishlab chiqarish jarayonida qo‘llanilayotgan texnologiyalar bilan tanishadi. Bundan tashqari, oliygoh talabalari kombinatning Kovuldi koni, Qalmoqqir va Angren kon boshqarmalari, Mis eritish zavodi, Mis boyitish fabrikasi, Rux zavodi, Nodir metallar va qattiq qotishmalar ishlab chiqarish bo‘yicha ilmiy birlashmasi, Markaziy ta’mirlash mexanika zavodi kabi bo‘linmalarda o‘quv amaliyotini o‘taydi.
Izoh (0)