Amerika Qo‘shma Shtatlari Federal qidiruv byurosi (FQB) Donald Trampning milliy xavfsizlik bo‘yicha sobiq maslahatchisi Jon Boltonning uyida tintuv o‘tkazgan. Bu haqda The New York Post nashri xabar berdi.
Manbaga ko‘ra, Boltonning uyida tintuv FQB direktori Kesh Patel tomonidan boshlangan tergov doirasida o‘tkazilgan. Patel o‘zining X (Twitter)dagi postida shunday yozdi: “Hech kim qonundan ustun emas. FQB agentlari topshiriqni bajarmoqda”.
Fox News va CNN kanallari ham sobiq amaldorning uyida tintuv o‘tkazilganini tasdiqladi. Bolton 2020-yilda “The Room Where It Happened: A White House Memoir” (“Bu sodir bo‘lgan xona: Oq uy xotiralari”) nomli memuarini chop etgan. Siyosatchining kitobida bir qator maxfiy ma’lumotlar oshkor qilingani sababli unga nisbatan tergov boshlangan.
Prezident Donald Tramp kitobning chop etilishiga qattiq qarshilik qilgan. Trampning aytishicha, agar kitob chop etilsa, Bolton o‘zi imzolagan maxfiylik kelishuvini buzgan bo‘lardi. Biroq AQSH yetakchisi kitobning chop etilishiga to‘sqinlik qila olmadi. Boltonga qarshi tergov bir necha yil avval boshlangan bo‘lsa-da, Prezident Jo Bayden uni siyosiy sabablarga ko‘ra to‘xtatib qo‘ygan edi.
Donald Trampning birinchi prezidentlik davrida Jon Bolton 2018-yil aprelida milliy xavfsizlik bo‘yicha maslahatchi lavozimini egallagan. Tramp uni 2019-yil sentyabrida lavozimidan ozod qilgan. Prezident bunga sabab sifatida Boltonning ayrim takliflariga qat’iyan qo‘shilmasligini ko‘rsatgan. Maslahatchi Rossiya, Eron va Shimoliy Koreyaga nisbatan qattiq siyosat olib borish tarafdori bo‘lgan.
Jon Bolton Donald Trampning ikkinchi prezidentlik muddati boshlangach, uning Ukraina bo‘yicha pozitsiyasini va Rossiyaga muzokarachi sifatida Stiv Vitkoffning yuborilishini keskin tanqid qilib kelmoqda. U Tramp va Vladimir Putinning Alyaskadagi uchrashuvidan so‘ng shunday degan: “Tramp yutqazmadi, biroq Putin aniq yutdi”. Tramp esa Boltonning bunday gaplari ommaviy axborot vositalarida tarqalayotganidan norozi bo‘lgan.
Izoh (0)