Davlat aktivlarini boshqarish agentligi tegishli xususiylashtirish dasturlariga muvofiq O‘zbekistonning yirik kompaniyalari aksiyalarini fuqarolarga ommaviy taklif etishning yangi bosqichi boshlanganligini eʼlon qildi.
Avvalroq Davlat aktivlarini boshqarish agentligi direktori Akmalxon Ortiqov “Daryo” muxbiriga bergan qisqacha intervyusida Davlat ulushi bor korxonalarning aksiya paketlari jismoniy shaxslarga sotilishi haqida aytib o‘tgandi.
"Mazkur “Xalqchil IPO” dasturi mamlakatda aholining barcha qatlamlari orasida keng mulkdorlar sinfini – aksiyadorlarni shakllantirish maqsadida o‘tkazilmoqda. Bu uchun mazkur bosqichda “birlamchi/ikkilamchi ommaviy taklif etish” tamoyili asosida “Olmaliq KMK”, “O‘zbektelekom”, “O‘zbekiston Respublika tovar-xomashyo birjasi” va “O‘ztemiryo‘lkonteyner” kabi yirik kompaniyalarni aksiyalari savdoga chiqarilmoqda.
Avval xabar berilganidek, ushbu jarayonni o‘tkazishda:
— KPMG xalqaro konsalting kompaniyasi Strategik konsultant sifatida va jarayonni muvofiqlashtirish uchun jalb etilgan;
— Mosaic Financial va Lightman PR konsorsiumi keng qamrovli targ‘ibot va tashviqot ishlarini tashkillashtirish uchun PR-konsultant sifatida jalb etilgan;
— 6 ta investitsion vositachilari – “Toshkent” RFB aʼzolari, salohiyatli anderrayterlar ro‘yxati (“g‘oliblar ro‘yxati”)ga kiritilib, ular bilan bosh kelishuvlar imzolangan.
Bunda “Xalqchil IPO”ni muvaffaqiyatli tashkillashtirish uchun Strategik konsultant bilan kelishgan holda bir yoki bir nechta anderrayterlar “Xalqchil IPO” o‘tkaziladigan muayyan kompaniyalarga alohida shartnomalar orqali biriktiriladi.
Strategik konsultant bilan hamkorlikda aksiyalar muomalasi va “Xalqchil IPO”ni tashkillashtirish uchun zarur hujjatlar va ushbu kompaniyalarning moliyaviy-iqtisodiy ko‘rsatkichlari kompleks tahlil qilinib, uning natijalariga ko‘ra dastlab “O‘zbekiston Respublika tovar-xomashyo birjasi” AJning aksiyalarini joylashtirish taklifi ishlab chiqildi.
O‘z navbatida, Strategik konsultant tomonidan qolgan jamiyatlar kompleks tahlil qilinmoqda va ularning aksiyalarni birlamchi joylashtirishga tayyorligi, ommaviy joylashtirish standartlari va talablarini mos kelishi yuzasidan tavsiya ishlab chiqilmoqda.
“O‘zbekiston Respublika tovar-xomashyo birjasi” AJning aksiyalarini “Xalqchil IPO” doirasida ommaviy joylashtirishni amalga oshirish maqsadida:
Biznes-rejasi/strategiyasi va investitsion jozibadorlik tarixi (equity story) ishlab chiqish;
bukrannerning standart xizmatlari, shu jumladan joylashtirilgan qimmatli qog‘ozlarni sotib olish uchun salohiyatli investorlarning arizalarini qabul qilish, talabnomalarning jamlangan reestrini yuritish va aksiyalarning “Xalqchil IPO”sini tashkil etishni amalga oshirish uchun Kapital-Depozit, Satori IB Group va Satori Capital anderrayter sifatida jalb qilindi.
“O‘zbekiston Respublika tovar-xomashyo birjasi” AJning aksiyalarining ommaviy taklifini o‘tkazish jarayonida mahalliy investorlarning buyurtmalarini qabul qilish “Toshkent” RFB savdo maydonchasida amalda bo‘lgan jarayonga qo‘shimcha ravishda, “E-auksion” elektron savdo platformasi, shu jumladan uning mobil ilovasidan foydalangan holda amalga oshiriladi.
“O‘zbekiston Respublika tovar-xomashyo birjasi” AJ aksiyalarini “Xalq IPO”sini muvaffaqiyatli tashkillashtirishda anderrayterlar zarur mobil ilovalarga ega bo‘lgan tijorat banklari bilan holda hamkorlik qilish imkoniyatiga ega.
Eslatib o‘tamizki, “bitta aksiya – bitta lot” tamoyili asosidagi “Xalq IPO”sida ishtirok etish uchun aholining barcha qatlamlariga keng imkoniyat yaratish maqsadida, fuqarolar o‘rtasida ommalashishga ulgurgan va foydalanuvchilarga qulay bo‘lgan “E-auksion” platformasining joriy imkoniyatlaridan foydalaniladi hamda jarayonga qiziqish bildirgan O‘zbekiston Respublikasining barcha rezidentlari (jismoniy va yuridik shaxslar)ning arizalari jumladan mazkur platforma orqali qabul qilinadi.
Bunda, platforma orqali 24/7 onlayn rejimida:
- talabgorlarni qimmatli qog‘ozlar bozori qonunchiligi talablariga asosan identifikatsiya qilish (ERI, One ID va Mobile-ID);
- professional brokerni tanlab, ular bilan shartnoma tuzish;
- depo hisob raqam (aksiya/obligatsiya uchun hisob raqam) ochish;
- mahalliy investorlar tomonidan aksiyalarni sotib olish bo‘yicha buyurtmalarni yuborish imkoniyatlari yaratiladi.
Aksiyalarni joylashtirish parametrlari (narx diapazoni), “O‘zRTXB” AJ aksiyalarining investitsiya salohiyati to‘g‘risidagi materiallar, shuningdek arizalarni topshirish tartibi va muddatlari haqidagi maʼlumotlar “KapDepo” konsorsiumi, Davaktiv agentligi, “O‘zRTXB” AJ rasmiy aloqa kanallari, OAV va ijtimoiy tarmoqlar orqali qo‘shimcha tarzda yetkaziladi.
Bu orqali, jarayonning har bir bosqichi to‘g‘risida jamoatchilik xabardor qilinishi taʼminlanadi, jalb qilingan PR konsultantlar esa ommabop targ‘ibot-tashviqot jarayonlarini va marketing kampaniyasini amalga oshiradi.
Yurtdoshlarimizni respublikadagi eng yirik kompaniyalarning aksiyadorlari – egalari bo‘lish va ularni boshqarishda ishtirok etish imkoniyatidan foydalanishga chorlaymiz", — deyiladi Davlat aktivlarini bosharish agentligi xabarida.
Maʼlumot uchun: O‘zbekiston Respublikasi Prezidentining 2024-yil 19-apreldagi qaroriga asosan “Olmaliq kon-metallurgiya kombinati” AJ (2%), “O‘zbektelekom” AK (2%), “O‘zbekiston pochtasi” AJ (5%), “Elektron onlayn-auksionlarni tashkil etish” AJ (5%), “O‘zbekiston Respublika tovar-xomashyo birjasi” AJ (2,4%), “O‘zbek geologiya qidiruv” AJ (2%), “O‘zbekgeofizika” AJ (2%), “O‘zbekgidroenergo” AJ (2%), “O‘ztemiryo‘lkonteyner” AJ (4%), “Temiryo‘lkargo” AJ (4%), “UzAuto Motors Powertrain” AJ (5%), “Toshkent” RFB» AJ (5%) aksiyalarining mahalliy fond bozorida birlamchi (IPO) va (yoki) ikkilamchi (SPO) ommaviy taklifi o‘tkazilishi belgilangan.
Izoh (0)