“Olmaliq kon-metallurgiya kombinati” AJ tomonidan amalga oshirilayotgan “Yoshlik I” konini o‘zlashtirish investitsiya loyihasi doirasida “Razvyazka–Yoshlik” stansiyalarini bog‘lovchi ikki izli temir yo‘llar qurib bitkazildi. Shu munosabat bilan kon hududida tantanali ochilish marosimi bo‘lib o‘tdi. Tadbirda kombinat rahbariyati va xodimlari, faxriylar hamda ommaviy axborot vositalari vakillari ishtirok etdi.
Mazkur temir yo‘llarning foydalanishga topshirilishi “Yoshlik I konini o‘zlashtirish” loyihasini amalga oshirishda muhim bosqichdir. Jumladan, yangi temir yo‘llar “Qalmoqqir” koni tog‘ jinslarini “Olmaliqsoy” bo‘sh tog‘ jinslari zahira koniga “Yoshlik I” konidagi ishlar uzluksizligiga ta’sir qilmagan holda tashish imkonini beradi.
Tantanali tadbirda “Olmaliq KMK” boshqaruv raisi, senator Abdulla Xursanov nutq so‘zlab, barcha ishtirokchilarni qutladi.
“Yoshlik konini o‘zlashtirish naqafat yurtimizdagi, balki dunyodagi eng yirik loyihadir. Loyiha doirasida ishga tushayotgan temir yo‘lning ahamiyati ham nihoyatda katta hisoblanadi. Yangi temir yo‘l uzunligi 7,4 kilometr bo‘lib, uni loyihalash, qurish ishlari juda katta muhandislik bilimini talab qiladi. Shuni alohida ta’kidlash kerakki, temir yo‘l muddatidan avval qurib bitkazildi. Bunda, albatta, temir yo‘lchilarimizning tabiat injiqliklari, ishning murakkabligiga qaramay o‘z vazifasini samarali bajargani muhim o‘rin tutadi. Eng muhimi, ishga tushayotgan temir yo‘lda yuk tashish xarajatlari avtomobil transportiga qaraganda 8 baravar arzon tushadi”, – dedi jamiyat rahbari.
Yangi temir yo‘lning qurilish-montaj ishlari joriy yilning yanvar oyida boshlangan edi. Joriy yilning o‘tgan davri davomida Kombinatning Sanoat temir yo‘l transporti boshqarmasi, “Olmaliqmetallurgqurilish” tresti va “Yoshlik I” direksiyasi tomonidan jadal sur’atlarda amalga oshirilgan qurilish ishlari natijasida ushbu obyekt qurib bitkazildi. Mazkur loyiha doirasida 7,4 kilometr elektrlashtirilgan temir yo‘llar, 9 komplekt strelkali o‘tkazgichlar qurildi. Yangi mikroprotsessorli markazlashtirish uskunalari o‘rnatilib, jami 51,2 milliard so‘m mablag‘ yo‘naltirildi.
Ikki izli temir yo‘llarning qurilishi “Qalmoqqir” konining ustki qatlam jinslarini tashish masofasini 2,9 kilometrga qisqartirishi va lokomotiv tarkibi harakatlanishi vaqtini taxminan 8,42 daqiqa kamayishi hamda stansiya o‘tkazish quvvatini 35-40 foizga oshishi natijasida yiliga qo‘shimcha ravishda 1 ming 200 metr kub (jumladan “Qalmoqqir” konidan 500 ming metr kub, “Yoshlik I” konidan 700 ming metr kub) tog‘ jinsini tashish imkonini beradi.
“Yangi temir yo‘lning ishga tushirilishi yuk tashish hajmini 1,5–2 barobarga oshiradi. Jumladan, yiliga hozirgi miqdordan 4 million tonnadan ko‘proq tog‘ jinslarini tashish imkoniyati yaratadi”, – deydi OKMK Sanoat temiryo‘l transporti boshqarmasi mashinist yo‘riqchisi Nurali Otaboyev.
Mazkur loyiha “Qalmoqqir” konida amaldagi tashish sxemasi bilan taqqoslaganda yiliga 12,8 milliard so‘m mablag‘ tejash imkonini beradi. Avtomobil transportida tashish xarajatlari bilan solishtirilganda yiliga taxminan 153 milliard so‘m iqtisod qilinishi kutilmoqda.
Bugungi kunda “Yoshlik I” koni obyektida tog‘-kon ishlari olib borilayotgan bo‘lib, 1 ming 727 nafar ishchi-xodimlar va 400 dona texnika ishlamoqda. “Yoshlik I” ruda qatlamiga yetish va uni qazib olish maqsadida tuproq ishlari jadallik bilan olib borilmoqda. Jumladan, 2022-yil 1-sentabr holatiga jami bajarilgan kon qazish ishlari 127,9 million metr kubni tashkil etmoqda. Shu jumladan, 2021-yil davomida 40,3 million kub metr, yil boshidan 23,9 million kub metr tuproq ishlari bajarildi.
Kon ishlarini bajarish uchun bugungi kungacha umumiy qiymati 415 million dollardan ziyod bo‘lgan 593 donadan ortiq texnika yetkazib berildi. Loyiha doirasida kombinat Sanoat temir yo‘l transporti boshqarmasi tomonidan 27,8 kilometr temir yo‘l izlari yotqizildi.
Eslatib o‘tamiz, O‘zbekiston prezidentining 2017-yil 1-martdagi PQ–2807-sonli hamda “Olmaliq KMK” AJ konlari negizida rangli va qimmatbaho metallar ishlab chiqarishni kengaytirishga doir qo‘shimcha chora-tadbirlar to‘g‘risida” 2020-yil 26-maydagi PQ–4731-son qarorlariga muvofiq, ushbu loyihani amalga oshirish natijasida:
I-bosqich – 2021-2025-yillarda 290 ming tonna mis katodi, 38 tonna oltin va 203 tonna kumush;
II-bosqich – 2024-2028-yillarda 400 ming tonna mis katodi, 50 tonna oltin va 270 tonna kumush metallari ishlab chiqarishga erishiladi.
Eng muhimi 6 mingdan ziyod yangi ish o‘rinlari yaratiladi.
Ma’lumot sheriklik huquqi asosida tayyorlandi
Izoh (0)