Joriy yildan boshlab Buxoro shahrida har ikki yilda bir marta xalqaro zamonaviy sanʼat biyennalesi o‘tkaziladi. Bu bo‘yicha prezident qarori imzolandi.
Qarorga ko‘ra, biyennale sentyabr-noyabr oylarida bo‘lib o‘tadi. Birinchi Biyennale 2025-yil 5-sentyabrdan 20-noyabrgacha tashkil etiladi.
Hujjatda mazkur tadbirni o‘tkazish orqali O‘zbekistonni jahon madaniy xaritasidagi nufuzini oshirish ko‘zlangani qayd etilgan. Shu bilan birga, zamonaviy sanʼat, tarixiy meros, kreativ iqtisodiyot va turizm uyg‘unligini taʼminlash reja qilingan.
Biyennalening asosiy maqsadlari etib quyidagilar belgilangan:
- mamlakatda zamonaviy va amaliy sanʼat, hunarmandchilikni qo‘llab-quvvatlash hamda global madaniy makonga integratsiya qilish;
- kreativ sanoatda taʼlim, tadqiqot va kasbiy mahoratni rivojlantirish, O‘zbekistonlik ijodkorlarni jahonga mashhur usta-ijodkorlar bilan hamkorligini yo‘lga qo‘yish orqali xalqaro darajaga olib chiqish;
- mamlakat sayyohlik jozibadorligini oshirish, madaniy meros obyektlarini sanʼat namoyishi maydonlariga aylantirish, muntazam qayta tashrif buyurishga bo‘lgan qiziqishni shakllantirish.
Qarorga asosan, Madaniyat va sanʼatni rivojlantirish jamg‘armasi tashkiliy qo‘mitaning ishchi organi hisoblanadi.
Birinchi biyennale o‘tkaziladigan 14 ta madaniy meros obyektini ko‘rgazma va tadbirlar, taʼlim va tadqiqot, ijodiyot va ishlab chiqarish jarayonlari uyg‘unlashgan kreativ klasterga aylantiriladi.
Jahonga mashhur usta-ijodkorlar tomonidan 60 tadan ko‘p art-obyekt, shu jumladan, installyatsiyalarni yaratish, ulardan Biyennale o‘tkaziladigan joyni badiiy bezashda foydalanish va ularning eng munosiblarini dunyo bo‘ylab ko‘rgazmalarda namoyish etiladi.
Dunyoga taniqli ijodkor, mutaxassis va oshpazlar ishtirokida keng jamoatchilik uchun 10 haftalik ilmiy-maʼrifiy, madaniy-ko‘ngilochar, sayyohlik va gastronomik dasturlarni tashkil etiladi.
Birinchi Biyennale maxsus katalogi va o‘zbek milliy taomlari retseptlar kitob-albomini chop etish, ulardan xalqaro miqyosdagi targ‘ibot vositasi va sovg‘alar to‘plami sifatida keng foydalanish rejalashtirilmoqda.
Qarorda Buxoro biyennalesi haqida hujjatli film yaratish, shuningdek, undan foydalanib mamlakat sayyohlik salohiyatini targ‘ib qilish ham belgilangan.
O‘z navbatida maxsus taʼlim dasturi asosida xalqaro darajadagi kuratorlarni tayyorlash hamda ularning jahonning yetakchi sanʼat maydonlarida O‘zbekiston nomidan ishtirok etishini taʼminlash ko‘zda tutilgan.
Tadbir doirasida 30 nafardan ortiq xalqaro ekspert, kurator va sanʼatshunoslar ishtirokida xalqaro akademik simpoziumni o‘tkaziladi.
Izoh (0)