Olmaliq kon-metallurgiya kombinati 2023-yilda qancha sof foyda ko‘rgani va 2024-yilda rejalashtirilgan ishlar bo‘yicha maʼlumot berildi. Bu haqda Milliy matbuot markazida Olmaliq kon-metallurgiya kombinati boshqaruvi raisi o‘rinbosari Ravshan Maqsumov, bosh muhandisning texnologiyalar bo‘yicha o‘rinbosari Abduqahhor Saynazarov ishtirokidagi OAV vakillari uchun tashkil etilgan matbuot anjumanida so‘z bordi.
Unda so‘z olgan masʼullar kombinat 2023-yilda 31,7 trillion so‘mlik sanoat mahsuloti ishlab chiqarganini, 1 milliard 128 million 200 ming dollarlik investitsiya loyihalarini amalga oshirib, 661,9 million dollarlik mahsulotlar eksport qilinganini ochiqladi.
Taʼkidlanishicha, kombinatda mahalliylashtirish dasturi bo‘yicha 429 milliard so‘mlik mahsulot tayyorlangan. Mahsulot tannarxini tushirish bo‘yicha 404,7 milliard so‘mlik natija qayd etilgan.
14,95 trillion so‘m mablag‘ esa byudjetga to‘lab berilgan. 6,7 trillion so‘m sof foyda olingan. 163,5 milliard so‘mlik geologiya-qidiruv ishlari bajarilgan.
OKMKda investitsiyaviy loyihalar ham muvaffaqiyatli amalga oshirib kelinmoqda. Xususan, “Yoshlik-1” loyihasining tog‘-kon majmuasi bo‘yicha 6 ta obyekt, 3-mis boyitish fabrikasi bo‘yicha 6 ta obyektning qurilishi yakunlangan. Yangi metallurgiya majmuasining qurilishi bo‘yicha dastlabki loyiha ishlari boshlangan.
2024-yilda ham mazkur yo‘nalishlarda olib borilayotgan ishlar jadallashtiriladi. Jumladan, 32,2 trillion so‘mlik sanoat mahsulotlari ishlab chiqarilib, 2 136,4 million dollarlik investitsiyaviy loyihalar amalga oshiriladi. 1 016,6 milliard so‘mlik mahalliylashtirilgan mahsulotlar ishlab chiqariladi. 15,73 trillion so‘m mablag‘ byudjetga yo‘naltirilishi ko‘zda tutilgan”, — deydi matbuot anjumanida so‘z olgan Abduqahhor Saynazarov.
Bildirilishicha, “Raqamli OKMK — 2030” konsepsiyasi bo‘yicha kombinatda o‘tgan yilda 34 ta loyiha amalga oshirilgan.
“Ishlab chiqarish jarayonlarini avtomatlashtirish va zamonaviy axborot tizimlarini joriy qilish yo‘nalishida mis boyitish fabrikasi, mis eritish zavodi, xondiza kon boshqarmasi, issiqlik elektr markazida bir qator ishlar amalga oshirildi. MBFda amalga oshirilgan ishlar natijasida rudadan mis ajratish darajasi 85 foizga chiqarilishi taʼminlandi. Shuningdek, fabrikada texnologik jarayonlarda ishtirok etuvchi asosiy qurilmalari diagnostika tizimi (avariya holatlarini erta oldini olish evaziga to‘xtashlar sonini kamaytirish) hamda ruda-suv jarayonini avtomatlashtirish tizimi sinov tarzda ishga tushirildi. Bu yiliga 1,8 million metr/kub suvni tejaydi”, — deydi Ravshan Maksumov.
Qo‘shimcha qilinishicha, kon-transport kompleksi faoliyati samaradorligini oshirish hamda axborot texnologiyalari infratuzilmasini rivojlantirish doirasida “Qalmoqqir” va “Yoshlik-1” konlarida kon-transport boshqaruv tizimining 1-navbati yakuniga yetkazilib, 99 ta avtosamosval, 20 ta ekskavator va 9 ta burg‘ulash texnikalardan maxsus apparat vositalari orqali maʼlumotlarni “onlayn” shaklda jamlash va qayta ishlash yo‘lga qo‘yilgan.
Temir yo‘l transporti sohasida amalga oshirilgan raqamlashtirish ishlari natijasida xarajatlar yiliga 4,8 milliard so‘mga qisqardi. 2023-yilda biznes va texnologik jarayonlarni raqamlashtirish hamda ularni maqbullashtirish evaziga 224 milliard so‘m iqtisod qilindi. 2024-yil davomida biznes va texnologik jarayonlarini raqamlashtirishni jadallashtirish maqsadida 18 ta loyiha amalga oshirilishi rejalashtirilgan. Xususan, “Qalmoqqir” va “Yoshlik-1” konlarida ishlarni bajarishda tezkor boshqaruv tizimini joriy etish yakuniga yetkaziladi. Mis boyitish fabrikasida asosiy uskunalarning diagnostika qilish va tegirmonlarni ruda va suv bilan avtomatik taʼminlash “Ruda-suv” boshqarish tizimlari joriy etiladi. Olmaliq kon-metallurgiya kombinati faoliyati samaradorligini yanada oshirish, jumladan raqamlashtirishning asosiy qismlaridan biri bu — moliya, g‘aznachilik, ishlab chiqarish va savdo faoliyatini, shuningdek biznes jarayonlarini yagona ERP tizimi orqali avtomatlashtirish (mahsulot tannarxini 3 foizga pasaytirish, daromadlarni 2 foizga oshirilishi taʼminlanadi), ishlab chiqarishni real vaqt rejimida nazorat qilish va tezkor boshqarish maqsadida MES tizimini ishga tushiriladi. Bu esa uskunalarning foydali ish samaradorligini 5 foizga oshirib, rejadan tashqari to‘xtash vaqti 15 foizgacha qisqartiriladi. Yangi qurilayotgan 3-mis boyitish fabrikasi va mis eritish zavodini kengaytirish loyihalari doirasida texnologik jarayonlarini to‘liq avtomatlashtirish tizimlarini joriy etish istiqbollari belgilangan, — deydi masʼul.
Matbuot anjumani davomida mas’ullar jurnalistlarni qiziqtirgan barcha savollarga batafsil javob berishdi.
Reklama huquqi asosida.
Izoh (0)