Toshkent shahrida bo‘lib o‘tayotgan Xalqaro investitsiya forumining birinchi kunidan o‘ndan ortiq investitsiya va savdo bitimlarini imzolandi. Shuni alohida ta’kidlab o‘tish kerakki, investorlarning geografiyasi kengayib bormoqda. “Daryo” ularning ba’zilariga alohida to‘xtalib o‘tdi.
Uch viloyatda arablar
O‘zbekistonda bir nechta elektr stansiyalar qurib kelayotgan Birlashgan Arab Amirliklarining Masdar kompaniyasi forum davomida Samarqand, Jizzax va Navoiy viloyatlarida energiya saqlash tizimlarini qurish (elektr energiyasini sotib olish) bo‘yicha “O‘zbekiston milliy elektr tarmoqlari” aksiyadorlik jamiyati bilan bitim imzoladi.
Toshkent shahar Yashnobod tumanida ko‘p tarmoqli shifoxonani loyihalash, qurish, jihozlash, moliyalashtirish va boshqarish to‘g‘risida — Sog‘liqni saqlash vazirligi hamda Inter Health Medical kompaniyasi o‘rtasida qo‘shma hamkorlik shartnomasi imzolandi.
“Uchquloch”da turklar
Konchilik va geologiya sohasidagi 8 ta istiqbolli yo‘nalish bo‘yicha — Tog‘-kon sanoati va geologiya vazirligi, O‘zbekiston Respublikasi tiklanish va taraqqiyot jamg‘armasi hamda Schlumberger Oil and Gas Technologies B.V o‘rtasida o‘zaro anglashuv memorandumi imzolandi.
“Olmaliq kon-metallurgiya kombinati” AJ esa “Uchquloch” koni maydonida geologik qidiruv ishlarini tashkil etish bo‘yicha Esan Eczacibasi (Turkiya) kompaniyasi bilan shartnoma imzoladi.
Lavlagidan eksportgacha
Forum ishi qishloq xo‘jaligi uchun ham omadli bo‘ldi. Jumladan, qishloq xo‘jaligi mahsulotlarini yetishtirish, qayta ishlash, saqlash va eksport qilishga ixtisoslashgan agrokompleks tashkil etish bo‘yicha — Sirdaryo viloyati xokimligi hamda Minessi A.S (Turkiya) memorandumga erishdi.
Qishloq xo‘jaligi vazirligi esa Nile Sugar kompaniyasi bilan qand lavlagi yetishtirish va shakar ishlab chiqarish bo‘yicha hamkorlik qiladigan bo‘ldi
Shirinda ispanlar
Ispaniyaning Almar Water Solutions kompaniyasi Samarqand viloyatidagi Shirin shaharchasida ichimlik va oqova suv inshootini qurilishidagi asosiy shartlarni kelishish bo‘yicha “O‘zsuvta’minot” AJ bilan bir qarorga keldi.
Yangi Toshkent xitoyliklar
Ko‘lami jihatidan yirik hisoblangan Yangi Toshkentni barpo etish loyihasiga investorlar katta qiziqish bilan qaramoqda. Bular orasida Chine State Construction Engineering Corporation International Construction kompaniyasi yangi shaharda innovatsion va barqaror ma’lumotlar markazlarini tashkil etish bo‘yicha ishlaydigan bo‘ldi.
Yangi Toshkent shahar infratuzilmasini qurishda esa Data Volt Information Technology kompaniyasi ham o‘z hissasini qo‘shadigan bo‘ldi.
Izoh (0)