Poytaxtimizdagi Milliy matbuot markazida “Olmaliq KMK” AJ masʼullari ishtirokida matbuot anjumani tashkil etildi.
Tadbirda mamlakatimizning eng yirik sanoat korxonalaridan biri hisoblangan “Olmaliq kon-metallurgiya kombinati” AJning o‘tgan 2022 yil yakunlari hamda ishlab chiqarilgan mahsulotlarning eksporti bo‘yicha amalga oshirilgan ishlar, kombinatning eksport salohiyati haqida maʼlumot berildi.
Maʼlum qilinishicha, 2022 yil yakunlari bo‘yicha Olmaliq kon-metallurgiya kombinatining moliyaviy-iqtisodiy faoliyati bo‘yicha barcha prognoz ko‘rsatkichlar bajarilgan. Xususan, tayyor mahsulotlar sotishdan tushgan tushum 30,5 trln so‘mni tashkil etib, Biznes-reja 108,2%ga bajarilgan.
Soha mutaxassislarining taʼkidlashicha, korxona iqtisodiy salohiyati bilan birga eksport ko‘rsatkichlari ham yildan-yilga o‘sib bormoqda. Jumladan, hisobot davrida 947,5 mln dollarlik mahsulotlar eksport qilinib, prognoz 110,8 foizga bajarilishi taʼminlandi.
Bundan tashqari, 2022 yilda OKMKda ishlab chiqarilgan mis konsentratlari iborat birinchi konteyner blok poyezdi Bolgariyaning Burgas shahriga yuborildi.
O‘tgan yil yakuni bo‘yicha sof foyda 6,7 trln so‘mni yoki prognozga nisbatan 114,6%ni tashkil etdi. Bunda mahsulot ishlab chiqarish rentabelligi 21,8%ni tashkil etdi.
2022 yilda yer qaʼridan foydalanganlik uchun soliq stavkasini 15%dan 10%gacha, foyda solig‘i stavkasini 75%dan 50%gacha pasaytirilishiga qaramasdan, davlat byudjetiga 18,4 trln so‘m yoki o‘tgan yilga nisbatan 2,6 trln so‘mga ko‘proq to‘lovlar amalga oshirildi. Shu jumladan 8,5 trln so‘m dividend to‘landi.
- Olmaliq kon-metallurgiya kombinati tomonidan 2023 yilga belgilangan barcha ustuvor vazifalar bajarilishi taʼminlanmoqda. Xususan, joriy yilning yanvar oyida kuzatilgan anomal sovuqlarga qaramay, I choragi yakunlari bo‘yicha hajmi 6,8 trln so‘mlik tovar mahsuloti ishlab chiqarilib, prognoz 100,0%ga bajarildi, - deb ma’lumot berdi «Olmaliq KMK» aksiyadorlik jamiyati boshqaruvi raisining iqtisodiyot, moliya va transformatsiya bo‘yicha o‘rinbosari Feruza Hamidova
Qayd etish joizki, Kombinat tomonidan soliq to‘lovlari davlatimiz byudjetining qariyb 10%ni tashkil etib, soliq to‘lovchi korxonalar ro‘yxatida 2-o‘rinni egallaydi. Shu bilan birga byudjetdagi ulushi yildan-yilga ortib bormoqda.
I chorak yakunlari bo‘yicha sof foyda 1,4 trln so‘mni yoki prognozga nisbatan 100,1%ni tashkil etadi. Byudjetga 2,6 trln so‘m to‘lovlar amalga oshirilib, prognoz 144,8%ga bajariladi.
O‘zbekiston Respublikasi Prezidentining 2023 yil 24 martdagi “Iqtisodiyotda davlat ishtirokini qisqartirishning qo‘shimcha chora-tadbirlari to‘g‘risida” PQ-102-son qarori asosida “Olmaliq KMK” AJning 2 foiz aksiyalari sotilishi belgilangan. Prezident qaroriga muvofiq jamiyat aksiyalari “Xalqchil IPO” orqali “bitta aksiya – bitta lot” tamoyili asosida elektron platformasida savdoga chiqarilishi rejalashtirilgan.
Qarorga muvofiq, kombinatning o‘rtacha 2 foiz aksiyalari aholiga taklif etiladi. Bunda aholiga aksiyalarni to‘g‘ridan-to‘g‘ri sotib olish imkoniyati yaratiladi. Aksiyalari sotilgan korxonalar besh yil davomida sof foydasining kamida 30 foizi dividend to‘lashga yo‘naltiradi.
Taʼkidlash kerakki, 2022 yil boshida elektr taʼminoti tizimida blekaut tufayli 25 yanvardan 28 yanvargacha to‘liq to‘xtalishi, yarim mahsulot ishlab chiqarishga salbiy taʼsir ko‘rsatdi.
- Tezkor ravishda ko‘rilgan choralar evaziga, birinchi navbatda eng muhim uchastkalarga elektr tokini yetkazish, shuningdek, ichki zaxiralarning ishga tushirilishi hisobiga sotiladigan mahsulotlar ishlab chiqarish taʼminlandi, – dedi «Olmaliq KMK» aksiyadorlik jamiyati bosh muhandisining texnologiyalar bo‘yicha o‘rinbosari Abduqahhor Saynazarov. – Jumladan, mis katodi ishlab chiqarish rejasi 100 foizga, mis simi, emallangan sim, mis kuporosi rejasi 100 foizga bajarildi. Qimmatbaho va nodir metallar bo‘yicha reja ko‘rsatkichlari ortig‘i bilan bajarilishiga erishildi.
Shuningdek, tadbir ishtirokchilariga ijtimoiy sohani qo‘llab-quvvatlash borasida olib borilayotgan ishlar haqida ham ma’lumot berildi.
Jumladan, 2022 yil mart oyida kombinat homiyligida Toshkent viloyati Shovg‘oz qishlog‘ida 120 o‘rinli yangi maktabgacha taʼlim obyekti qurildi. Ushbu obyekt qurilishiga 5,7 mlrd so‘m mablag‘ sarflandi.
May oyida esa “BAHOR” mehmonxonasining 102 kishilik yangi korpusi foydalanishga topshirildi. Ushbu obyektning qurilishiga 31,4 mlrd so‘m mablag‘ yo‘naltirildi. Iyul oyida 6,8 mlrd so‘mga 290 o‘rinli maktabgacha taʼlim obyekti mukammal taʼmirlandi.
Oktyabr oyida Namangan viloyati Chodak qishlog‘ida 250 ish o‘rniga ega yangi tikuv fabrikasi foydalanishga topshirildi.
Shu oyda kombinat ishchi-xodimlari va ularning oila aʼzolari dam olishlari uchun Toshkent viloyatidagi 126 o‘rinli “Moviy tog‘lar” dam olish sihatgohi foydalanishga topshirildi
- Hozirda kombinat homiyligida Olmaliq shahridagi Tibbiyot birlashmasi qoshidagi shartnomaviy poliklinika va tug‘ruq kompleksining rekonstruksiya ishlari olib borilmoqda. Ushbu obyektlarning rekonstruksiya ishlariga umumiy hisobda kombinat tomonidan 23 milliard so‘m mablag‘ yo‘naltirilgan, – dedi «Olmaliq KMK» aksiyadorlik jamiyati ijtimoiy obyektlar boshqarmasi boshlig‘I v.b. Kamola Umaraliyeva
Ta’kidlab o‘tish lozimki, OKMK Ijtimoiy obyektlar boshqarmasi tarkibida 16 ta maktabgacha taʼlim tashkiloti, 5 ta bolalar sog‘lomlashtirish oromgohlari, “Metallurg” madaniyat saroyi, Sanatoriy-profilaktoriy,“Oltin olma” pansionati, “Bolajon” bolalar bog‘i, Delfin” akvaparki, “Bahor” mehmonxonasi, “Nuroniy” pensionerlar uyi, OKMK sport majmuasi, “Moviy tog‘lar” dam olish maskani, Sport texnik klubi va boshqa obyektlar faoliyatlari yo‘lga qo‘yilgan
Tadbirda jurnalistlar o‘zlarining qiziqtirgan savollarga mutaxassislardan batafsil javoblar olishdi.
Reklama huquqi asosida.
Izoh (0)