Faoliyatini 2012-yilda boshlab, regiondagi eng taraqqiy etayotgan kompaniyalardan biri deya o‘ziga ta’rif bergan Enter Engineering kompaniyasi minglab ishchilariga o‘z vaqtida maosh bermayotgani xabar berilgandi. Mazkur muammoga Kambag‘allikni qisqartirish va bandlik vazirligi ham e’tibor qaratdi. Ishchilarning “Daryo”ga ma’lumot berishicha, kompaniyaning Toshkent viloyati Olmaliq shahridagi mas’ullari ishchilari bilan uchrashib, vaziyatni izohlagan.
Manbaga ko‘ra, mas’ullar va kompaniya ishchilari bugun, 28-noyabr kuni uchrashgan.
Kompaniyaning uch nafar mas’uli bilan suhbatlashgan ishchilarning aytishicha, ishchilar maoshi kechikishiga tayyor bo‘lgan obyektni qabul qilmayotgan va bajarilgan ish uchun pul to‘lamagan Olmaliq kon-metallurgiya zavodini aybdor qilib ko‘rsatgan.
Olmaliq kon-metallurgiya zavodi qabul qilmayapti, qabul qilishsa keyin pul bo‘ladi deyishyapti, — deydi mas’ullar izohini tinglagan ishchilardan biri.
Ism-familiyasini ochiqlashdan qo‘rqqan ishchining aytishicha, mas’ullar bilan 200 nafarga yaqin xodim ko‘rishgan.
Qolganlar ishini yo‘qotishdan qo‘rqyaptimi, hatto oyligini talab qilishga ham cho‘chib qolishgan, — deydi u.
Rahbariyati bilan ko‘rishgan ishchilar kompaniya mas’ullari ishchilarga xohlasangiz ishlang, xohlamasangiz o‘zingiz bilasiz, degan mazmunda bildirish qilgan.
Maoshimizni ololmay qolishdan qo‘rqyapmiz. Millionlab pulimiz yotibdi ularda. O‘zbekistonda mehnat qonunchiligi hamma uchun birdek bo‘lsa, nega bizning kompaniya bu qonunlarga bo‘ysunmaydi. Shartnomamizda ham oylik maosh 45 kungacha kechikishi mumkin deyilgan. Lekin biz uch-to‘rt oydan beri maosh olmayapmiz. Kechikkan har bir kun uchun maoshimizga qo‘shimcha penya ham to‘lab berishadimi?, — deydi ishchi.
Eslatib o‘tamiz, avvalroq “Daryo” jurnalisti bilan suhbatlashgan ishchilar minglab xodimlar maosh bilan bog‘liq muammoga duch kelganini bildirgandi.
Sentyabr oyidagi maoshimizni ham olganimiz yo‘q. Hali oktyabr oyi turibdi. Oylik ikki yarim, uch oygacha kechikyapti, — degandi shaxsi sir qolishini so‘ragan murojaatchi.
Murojaatchining aytishicha, shikoyatchi kimligi aniqlansa, rahbariyat uni ishdan bo‘shatadi. Va xodimning ishsiz qolish ehtimoli katta. Shu sabab ular muammoni baralla aytishdan qo‘rqadi.
Sentyabr oyi uchun maoshimning 30 foizini plastikka tashlab berishgan, qolgan 70 foizini naqd shaklda olishim kerak. Lekin mana noyabr oyi tugayaptiki, sentyabr oyining maoshini ololganim yo‘q. Oylikka qarab reja qilamiz, qo‘shnilardan qarz olaverib, qarzga botib ketdik, — degandi yana bir ishchi maoshini ololmayotganini aytar ekan.
Izoh (0)