OKMK Navro‘z ayyomini keng nishonladi

Sanoat shahri bo‘lgan Olmaliqda ham xalqimizning sevimli bayrami Navro‘zi olam keng nishonlandi. Jumladan, Olmaliq kon-metallurgiya kombinatida bayram ayyom tadbirlari o‘zgacha ruhda o‘tkazildi.

Kombinat tarkibiy bo‘linmalarida bo‘lib o‘tgan bayram tadbirlarida bahoriy milliy taomlar tanlovlari, qiziqarli sport musobaqalari tashkil etildi.

Shuningdek, Olmaliq kon-metallurgiya kombinati hamda Olmaliq shahar hokimligi hamkorligida o‘tkazilgan Navro‘z bayrami xalq sayliga aylanib ketdi.

Tadbir avvalida so‘z olgan Olmaliq kon-metallurgiya kombinati boshqaruvi raisi, senator Abdulla Xursanov hamda Olmaliq shahar hokimi Qobil Hamdamov barchani Navro‘z umumxalq bayrami bilan qutlab, samimiy tilaklarini bildirishdi.

“Har kuning Navro‘z bo‘lsin, jonajon O‘zbekistonim” shiori ostida o‘tkazilgan bayram tadbirida “Metallurg” madaniyat saroyi atrofi va “Yoshlar bog‘i” hududida kombinat tarkibiy bo‘linmalari tomonidan O‘zbekiston Respublikasi viloyatlarining milliy qadriyatlari va urf-odatlarini aks ettirgan ko‘rgazmalar namoyish etildi.

Shuningdek, bayram tadbirida shahar taʼlim muassasalari tomonidan tashkil etilgan badiiy ijodiy namunalarni aks ettiruvchi ko‘rgazmalarini ham alohida taʼkidlash joiz.

“Yoshlar bog‘i”da arqon tortish, tosh ko‘tarish, uzunlikka sakrash, boks, kurash, shaxmat, shashka, stol tennisi kabi sport turlari bo‘yicha sport musobaqalari olmaliqliklarda katta taassurot qoldirdi. Ayniqsa, qarabtep(lanka), chillik kabi xalq o‘yinlarining tashkil etilishi bolajonlarga olam olam zavq bag‘ishladi.

Ayniqsa, “Yoshlar bog‘i”da tashkil etilgan milliy taomlarni tayyorlash bo‘yicha tanlovlar barchaga haqiqiy bayramona kayfiyat ulashdi.

“Metallurg” madaniyat saroyi badiiy jamoalarining konsert dasturi hamda O‘zbekiston Respublikasi va Qoraqalpog‘iston Respublikasi xalq artisti Jenisbek Piyozovning xonishlari barchaga manzur bo‘ldi.

Tadbir davomida viloyatlarning milliy urf-odatlarini aks ettiruvchi ko‘rgazmalar hamda milliy taomlar tanlovining g‘oliblari aniqlanib, qimmatbaho sovg‘alari tuhfa etildi.

Reklama huquqi asosida.