Shavkat Mirziyoyev 22-dekabr kuni Toshkent viloyati Olmaliq shahriga tashrif buyurib, Olmaliq kon-metallurgiya kombinati (OKMK)da “Yoshlik 1” konini o‘zlashtirish investitsiya loyihasi bo‘yicha olib borilayotgan ishlar bilan tanishdi, deb xabar bermoqda “Daryo” muxbiri.
Qayd etilishicha, ushbu loyiha qiymati 5 milliard 122 million dollar bo‘lib, shundan 1 milliard 633 million dollari o‘z mablag‘lari hisobiga, 1 milliard 217,1 million dollari esa Tiklanish va taraqqiyot jamg‘armasi krediti va ustav fondi qo‘yilmasi hisobiga amalga oshiriladi.
Hududi 11 ming gektar bo‘lgan kon yiliga 65 million tonna ma’dan qazib olish quvvatiga ega. Bu konda oltin, mis, kumush, molibden, selen kabi 13 turdagi qimmatli va nodir metallar bor. Ularni qayta ishlash uchun Olmaliq kon-metallurgiya kombinatida 3-mis boyitish fabrikasi qurilmoqda.
Prezidentga shu boradagi ishlar haqida axborot berildi.
Bu yerda ish boshlangan 2017-yilda yiliga 3 million kub metr kon ishlari bajarilar edi. 415 million dollarlik 570 dan ziyod zamonaviy texnikalar olib kelingach, samaradorlik o‘n karra oshdi. Endilikda ish hajmi yiliga 40 million kub metrni tashkil etmoqda.
“Bu kon — katalizator. Uni samarali o‘zlashtirish bilan birga kichik konlar bo‘yicha ham yangi yo‘nalish qilish kerak. Bu ham qo‘shimcha ish o‘rinlari, katta eksport, degani”, — dedi Shavkat Mirziyoyev.
Loyiha doirasida, shuningdek, ohak zavodi, 650 megavattli elektr tarmog‘i va boshqa infratuzilma obyektlari barpo etiladi. Jami 6 ming kishi ish bilan ta’minlanadi.
Davlat rahbari ushbu kombinat, umuman, kelgusida har bir sanoat korxonasi o‘zini o‘zi muqobil elektr energiyasi bilan ta’minlashi zarurligini ta’kidladi. Ilmiy tadqiqotlarni va maqsadli aspiranturani kengaytirish, Toshkent davlat texnika universitetining Olmaliq filiali salohiyatini oshirish bo‘yicha topshiriqlar berildi.
Eslatib o‘tamiz, Shavkat Mirziyoyev 29-iyul kuni Olmaliq shahriga tashrif buyurib, kon-metallurgiya kombinati konlari negizida rangli va qimmatbaho metallar ishlab chiqarishni kengaytirish borasidagi ishlar bilan tanishgandi. O‘sha kuni davlat rahbati Olmaliq kon-metallurgiya kombinatining 3-mis boyitish fabrikasi qurilishiga tamal toshini qo‘ygandi.
