Ijtimoiy tarmoqlarda Olmaliq kon-metallurgiya kombinati (OKMK) aksiyadorlik jamiyati binosi oldida ko‘plab odamlar to‘plangani aks etgan video tarqaldi. Ma’lumotlarga ko‘ra, yuzlab kishilar kombinatga ishga qabul jarayoni ketmoqda deb o‘ylab shu yerga kelgan. OKMK binosi oldida nafaqat olmaliqliklar, balki Ohangaron, Piskent, Bo‘ka va Bekobod tumanlaridan ham kelganlar borligi aytilmoqda.
Kombinat axborot xizmatining yozishicha, 4-noyabr kuni “Metallurg” madaniyat saroyi hududida Olmaliq shahri hokimligi tomonidan shahardagi korxona va tashkilotlar ishtirokida “Bo‘sh ish o‘rinlari mehnat yarmarkasi” tashkil etilgan. Yarmarka o‘tkazish uchun “Metallurg” madaniyat saroyi tanlangan. Biroq talabgorlarning ko‘pligi, xususan, OKMKga ishga kirish istagida yaqin hududlardan (Piskent, Ohangaron, Bo‘ka, Bekobod) ham kelgan fuqarolar hisobiga mo‘ljallangan joyda tiqilinch yuzaga kelgan.
Shundan so‘ng zudlik bilan shahar hokimligi, OKMK mas’ullari tomonidan “Mehnat yarmarkasi” mazkur madaniyat saroyiga yondosh hududda joylashgan “Yoshlar bog‘i”ga ko‘chirilgan. Ayni paytda “Yoshlar bog‘i”da Olmaliq shahar sektor rahbarlarining sayyor qabuli ham bo‘lib o‘tmoqda.
Ma’lumot uchun, 2019-yilda kombinatga 2500 nafardan ortiq fuqaro ishga qabul qilingan bo‘lib, ularning 1805 nafarini yoshlar tashkil etadi (shundan 321 nafari qizlar). Shu jumladan, 660 nafari aholi bandligiga ko‘maklashish markazi kvota yo‘llanmasiga asosan ijtimoiy himoyaga muhtoj aholi qatlamiga kiruvchi shaxslardir. 2020-yil boshidan bugungi kunga qadar 787 kishi ishga qabul qilingan bo‘lib, ularning 738 nafarini yoshlar tashkil etadi (shundan 158 nafari qizlar).
Shuningdek, 31-oktabr kuni “Metallurg” madaniyat saroyida yoshlar bilan bo‘lib o‘tgan uchrashuvdan so‘ng 142 kishi kombinatga ishga qabul qilingan. Ta’kidlanishicha, “Yoshlik-1” konini o‘zlashtirish loyihasi doirasida yangi obyektlar, xususan, 3-MBF qurilishi munosabati bilan kombinatda 10 mingta ish o‘rni bosqichma-bosqich ochiladi.
Izoh (0)