“Tuyaning dumi yerga tegganda beradi”. Olmaliqdagi 3-mis boyitish fabrikasini qurayotgan ishchilar Mustaqillik bayramini maoshsiz o‘tkazdi

Olmaliq kon-metallurgiya kombinati tarkibidagi 3-mis boyitish fabrikasi qurilishida ishlayotgan ishchilar O‘zbekiston mustaqilligining 33 yilligini pulsiz kutib oldi. Bu fabrika Enter Engineering kompaniyasi tomonidan qurilmoqda. Bu haqda “Daryo”ga murojaat qilgan ishchilar ma’lum qildi. 

Ism-familiyasini ochiqlasa, ishdan bo‘shatilishi yoki bosimga uchrashidan qo‘rqqan xodimlarning aytishicha, ularga 2024-yilning may oyi uchun “avans” berilgan xolos. 

Balki, ishonmassiz, 2024-yilning sentyabr oyi keldi. Lekin biz may oyi uchun “avans” olganimizcha ishlab yuribmiz. Oylikni berishmayapti. O‘zbekistonliklarning barchasi mustaqilligimizning 33 yilligini o‘z vaqtida olingan maosh va mukofot pullari bilan yaxshi kayfiyatda kutib olishgan bo‘lsa, biz bir tiyinsiz, muammolar bilan qarshi oldik, deydi “Daryo” jurnalisti bilan suhbatlashgan ishchi. 

“Daryo”ga shikoyat qilib, turmush o‘rtog‘i to‘rt oydan beri maoshsiz ishlayotganini, xonadoniga bir necha oydan beri go‘sht kirmaganini aytgan ayol mis fabrikasida ishlayotgan quruvchilardan boshliqlar bazmi uchun pul yig‘ilishini aytmoqda. 

Xo‘jayinim Olmaliq kon-metallurgiyaga qarashli mis boyitish fabrikasi qurilishida ishlaydi. Mana to‘rt oydan beri oylik berishmaydi. Erim dam olish kunlari taksi qilib, ro‘zg‘or tebratadi. Har doim shu ahvol. Yana nimadir yo‘qolsa, ishchilardan pul yig‘ib, joyiga yangi qo‘ydirishadi. Uyam yetmaganidek, boshliqlarning yeb-ichishiga ham ishchilardan pul yig‘iladi. Bu tashkilot bilan hech kim shug‘ullanmaydi. Tekshirish kelsa, ishchilardan pul yig‘ib, tekshiruvchini mehmon qilib, qaytarib yuborishadi. Erim ishdan bo‘shab ketolmaydi. Boisi, hozirgi kunda ish topish muammo. Bizning ham go‘sht yegimiz keladi, lekin pulimiz yo‘qligi sababli olib yeyolmaymiz. Ish haqini so‘rab borishsa, ishdan bo‘shatib yuborishadi, deydi eri va o‘zining ism-familiyasi sir qolishini so‘ragan suhbatdosh. 

Yana bir suhbatdosh syomka davomida farzandlari uchun yangi o‘quv yili boshlanayotganini, hali maktab forma va o‘quv qurollari sotib olmaganini aytdi. 

Yangi o‘quv yili ham boshlandi. Oyliklarni o‘z vaqtida olmaganimiz uchun maktab forma ham, o‘quv qurollari ham sotib ololmadik. Bolalarim bu yil maktabga eski formasida chiqishadigan bo‘lyapti, deydi suhbatdosh. 

Telegram’da ishchilarning axborot almashishi uchun tashkil etilgan guruhda maoshini ololmayotgan ishchilar bir-biridan yangilik haqida so‘rar ekan “Maoshimiz tuyaning dumi yerga tegganda, qizil qor yog‘ganda beriladi”, deya kinoya qilmoqda. 

Olmaliq kon-metallurgiya kombinati axborot xizmatining “Daryo”ga bildirishicha, kombinat tarkibidagi 3-mis boyitish fabrikasi qurilishi Enter Engineering kompaniyasi tomonidan bajarilmoqda. Ishchilariga maoshini o‘z vaqtida bermasligi bilan jamoatchilikka yaxshi tanish bo‘lgan mazkur kompaniya axborot xizmati “Daryo” so‘roviga javob berar ekan, maoshlar sekin-asta berilayotganini aytib, shu mavzuni hozircha olib chiqmaslik haqida maslahat berish bilan cheklandi.