Olmaliq kon-metallurgiya kombinati tarkibidagi 3-mis boyitish fabrikasi ishga tushsa, yiliga 1 million tonna mis konsentrati ishlab chiqiladi. Amalga oshirilayotgan loyiha dunyodagi eng yirik loyihalardan biri hisoblanadi. Bu haqda kombinat masʼullari OAV vakillari va blogerlar uchun tashkil etilgan press-turda maʼlum qildi, deya xabar berdi “Daryo” muxbiri.
Bildirilishicha, ushbu konsentratdan mis va boshqa qimmatbaho metallarni ajratib olish, ulardan turli xil qotishma hamda sof metallar ishlab chiqarish uchun yangi metallurgiya obyektlarini barpo etish lozim bo‘ladi.
“Yangi metallurgiya majmuasini qurish uchun misni eritish va konverterlash bo‘yicha eng ilg‘or va yetakchi texnologiyalar o‘rganib chiqildi. Kombinat tomonidan tanlab olingan texnologiya bu mis konsentratidan misni ajratib olish darajasi 98,4 foizni tashkil etishi bilan ahamiyatli hisoblanadi. Eng muhimi, yangi quriladigan metallurgiya majmuasi atrof-muhitga mutlaqo zararsiz hisoblanib, barcha texnologik jarayonlar to‘liq yopiq bo‘ladi. Hosil bo‘lishi mumkin bo‘lgan zararli sharoitlar minimal darajada bo‘lib, zararli gazlarni ushlab qolish 99,2-99,7 foiz bo‘lishi belgilangan”, — deydi OKMK boshqaruv raisi A.Xursanov
Loyihani amalga oshirish uchun Kanadagi dunyoning yetakchi “HATCH” mustaqil konsalting kompaniyasi jalb qilingan.
Shuningdek, Olmaliq kon-metallurgiya kombinati AJ metallurgiya majmuasi obyektlarini qurish direksiyasi direktori Alisher Shonosirovning maʼlumot berishicha, yangi metallurgiya majmuasida yiliga 300 ming tonna mis va 1,8 million tonna sulfat kislotasi ishlab chiqariladi.
Sulfat kislotasi kimyo, uran sanoati, yangi sanoat korxonalari ishlab chiqarish quvvatlarini yanada oshirishga zamin yaratadi.
“Mis ishlab chiqarish quvvatlarining oshirilishi o‘z navbatida, mis xomashyosini respublikaning o‘zida qayta ishlab, yuqori qo‘shimcha qiymatga ega yangi turdagi mis mahsulotlar ishlab chiqarilishiga zamin yaratadi. Bundan tashqari, mis konsentratlari tarkibidan olingan oltin va kumush respublika oltin-valyuta zaxiralari ko‘payishiga, zargarlik sanoati korxonalarining rivojlanishiga xizmat qiladi”, — deydi u.
Masʼullarning qo‘shimcha qilishicha, buning yana bir muhim jihati ushbu loyihaning amalga oshirilishi natijasida minglab yangi ish o‘rinlari yaratiladi.
Bu loyiha shubhasiz Olmaliq kon-metallurgiya kombinatini jahondagi eng yirik mis eritish korxonalaridan biriga aylantiradi.
Olmaliq kon-metallurgiya kombinati axborot xizmatining qayd etishicha, hozirda “Yoshlik-1” konini o‘zlashtirish va 3-mis boyitish fabrikasini qurish doirasida yiliga 60 million tonna maʼdanni qazib olishga kon to‘liq tayyorlangan. Buning uchun 183 million kub metr bo‘sh tog‘ jinslari qazib olingan. Natijada, hozirda kon uzunligi 4,0 km, eni 3,5 km va chuqurligi 90 metrga yetgan. Boshqa fabrikalardan farqli o‘laroq, konning o‘zida maʼdanlarni birinchi maydalash-yuklash qurilmasi barpo etilgan.
Ayni paytda 3-mis boyitish fabrikasining ishlab chiqarish bo‘linmalari uchun zarur bo‘lgan barcha texnologik uskunalar qurilish maydoniga olib kelinib, montaj ishlari olib borilmoqda. Yoshlik-1 koni va 3-mis boyitish fabrikasi ishga tushsa, yana olti mingta ish o‘rni yaratiladi, byudjetga yiliga qo‘shimcha 300 million dollardan ortiq soliq tushadi. Eksport 300 million dollarga ortadi.
Press tur ishtirokchilari 3 mis boyitish fabrikasi qurilish jarayoni yangi raqamli nimstansiya bilan tanishtirildi.
Reklama huquqi asosida.
Izoh (0)