Mamlakatimizning iqtisodiy salohiyatini rivojlantirish va mustahkamlashda kon-metallurgiya sanoatining ahamiyati muhim hisoblanadi. Sohaga oid korxonalarda mehnat qilayotgan ko‘p ming kishilik jamoalarining kon-metallurgiya sanoatini rivojlantirish hamda kadrlar tayyorlashga qo‘shgan hissalarini qayd etgan holda, may oyining uchinchi yakshanbasi O‘zbekiston Respublikasining Kon-metallurgiya sanoati xodimlari kuni etib belgilangan. Yaxshi an’anaga ko‘ra, mazkur sana Olmaliq kon-metallurgiya kombinatida ham katta tantanalar bilan kutib olindi.
Jumladan, 13-may kuni OKMK sport majmuasida katta bayram tadbiri tashkil etildi. Tadbir avvalida O‘zbekiston Respublikasi Bosh vazirining kombinat mehnat jamoasiga yo‘llagan tabrigi o‘qib eshittirildi. Shundan so‘ng OKMK boshqaruvi raisi Abdulla Xursanov barcha kombinat ishchi xodimlarini samimiy muborakbod etdi.
Tadbir davomida kombinat tarkibiy bo‘linmalarida mehnat qilib kelayotgan ishchi xodimlar “Konchilik shuhrati” ko‘krak nishoni bilan taqdirlandi. Bayram tadbiri mashhur san’atkorlar ishtirokida katta konsert dasturi bilan yakunlandi.
14-may kuni esa katta xalq sayli tashkil etildi. Tadbirlar “Metallurg” madaniyat saroyi binosi oldida, “Yoshlar” va “Bolajon” bog‘lari hududida bo‘lib o‘tdi. Unda kombinat tarkibiy bo‘linmalari o‘z pavilyonlarini tashkil etib, eksponatlar, mahsulotlar va maketlar ko‘rgazmasini namoyish etishdi. Shuningdek, sayl davomida turli xil ko‘ngilochar dasturlar tashkil etildi.
Bayram sayli so‘ngida O‘zbekistonda xizmat ko‘rsatgan artist Kamoliddin O‘rinboyev boshchiligidagi O‘zbekiston davlat simfonik orkestri ijrosidagi konsert dasturi bo‘lib o‘tdi.
Ta’kidlab o‘tish lozimki, kombinatda kasb bayrami barcha ishlab chiqarish vazifalarini uddalagan holda qarshi oldi. Xususan, tovar mahsulotlari ishlab chiqarish bashorat ko‘rsatkichlari o‘tgan to‘rt oy davomida 121,8 foizni tashkil qildi. Mis, polimetall, oltin tarkibli rudalarni qazib olish, uni qayta ishlash, katodli mis, sulfat kislotasi, mis quvurlari, molibden va boshqa ko‘plab ko‘rsatkichlar yil boshidan beri ortig‘i bilan bajarildi.
Shu bilan birga investitsiyaviy loyihalar ham jadal sur’atlarda davom ettirilmoqda. “Yoshlik I” konini ochish ishlari olib borilayapti. 3-mis boyitish fabrikasining bo‘lajak korpuslari bugun birin-ketin qad rostlamoqda.
Ma’lumot uchun, “Olmaliq kon-metallurgiya kombinati” aksiyadorlik jamiyati mamlakatimizda ushbu yo‘nalishdagi eng yirik va istiqbolli korxonalardan biri bo‘lib, uning ishlab chiqarish quvvatlari Toshkent, Jizzax, Namangan va Surxondaryo viloyatlari hududlarida joylashgan mis-porfir, qo‘rg‘oshin-rux va oltin-kumush konlari guruhi zaxiralariga asoslangan. “Qalmoqqir”, “Kovuldi” konlari, “Sari-Cho‘qqi” karyeri, Angren va Chodak kon boshqarmalari, “Xondiza” konining boy zaxiralari mavjudligi ushbu kombinatning iqtisodiy quvvatini jadal oshirish, mahsulot turlarini kengaytirish imkonini beradi. Hozir “Olmaliq KMK” tomonidan yuzdan ortiq nomdagi mahsulotlarning 54 foizi tashqi bozorga yetkazilmoqda.
Eksport ko‘rsatkichlari korxona iqtisodiy salohiyatining yil sayin o‘sib borayotganidan dalolat beradi. Agar 2017-yilda korxona tashqi bozorga qariyb 643,1 million dollarlik mahsulot yetkazib bergan bo‘lsa, 2021-yilda eksport 1 124,2 million dollargacha ko‘tarildi va o‘sish sur’ati 136,8 foizni tashkil etdi.
O‘zbekistonda kumush ishlab chiqarishning taxminan 90 foizi va oltin ishlab chiqarishning 20 foizi mazkur kombinat ulushiga to‘g‘ri keladi. Shuningdek, u nafaqat O‘zbekistonda, balki butun Markaziy Osiyo mintaqasida eng yirik mis ishlab chiqaruvchisi va undan tayyorlangan mahsulotlarni ichki-tashqi bozorlarga yetkazib beruvchi hisoblanadi.
Hozirgi vaqtda kombinat 18 turdagi eksportbop, yuqori likvidli mahsulotlarni sotmoqda. Ular ichida mis asosiysidir. Bugungi kunda OKMK mis ishlab chiqarish hajmi bo‘yicha Rossiya va Qozog‘istondan keyin uchinchi o‘rinda turadi.
Ma’lumot sheriklik huquqi asosida tayyorlandi.
Izoh (0)