Toshkent viloyatida joylashgan Olmaliq kon-metallurgiya kombinati Telegram’dagi “Effekt Makarenko” kanalida poytaxtdagi changlarning asosiy sababi “Yoshlik-1” koni ekani aytilgan xabarlarga munosabat bildirdi.
“Toshkentdagi changlarning asosiy sababi — bu OKMK yangi ‘Yoshlik-1’ konida ishlarini boshlaganidir. U yerda har kuni portlash ishlari amalga oshirilmoqda. Bir necha yuz ming tonna tog‘ massasi havoga ko‘tarilmoqda, asosan quruq tuproq va gips. Va shamol bularning barchasini Toshkentga uchiryapti”, — deyiladi Nikita Makarenkoning postida.
Qayd etilishicha, “Yoshlik-1” konida ustki qatlam ishlarini amalga oshirish va ruda qazib olish maqsadida burg‘ilash va portlatish ishlari meʼyoriy talablarga muvofiq amalga oshirilmoqda.
“Shu bilan birga, kon ochish ishlari tog‘ jinslarini, dioritlar va siyenito-dioritlar tub joylashuvlari, shuningdek, rudalarni qazib olish uchun amalga oshirib boriladi. Shu o‘rinda taʼkidlab o‘tish zarurki, tub jinslarining qattiqligi Protodyakonov shkalasi koeffitsiyenti bo‘yicha kon maydonida IX dan XIV gachani tashkil qiladi”, — deyiladi OKMK xabarida.
Bundan tashqari, korxona bayonotida keltirilishicha, SanPinning №0350-17-sonli “O‘zbekiston Respublikasining aholi yashaydigan hududlarida atmosfera havosini muhofaza qilishning sanitariya normalari va qoidalari”, “Rangli metallarni qazib olish uchun chiqindi to‘plash omborlari va shlamyig‘gichlar” (6.1.3-band) nizomlariga muvofiq, 500 metrlik sanitariya muhofazasi zonasiga rioya qilinishi taʼminlangan.
“‘Yoshlik-I’ koni Olmaliqning janubiy qismida, Toshkent shahridan 61,4 kilometr masofada (azimut yo‘nalishi 333 gradus), undan shimolroqda joylashgan. Shamolning o‘rtacha yillik tezligi hududda 1,2 metr/sekundga teng, uning ortib ketish ehtimoli 5 foiz va 5 metr/sekundgacha teng bo‘lishi mumkin. Shamolning asosiy yo‘nalishi — ustunligi sharqda (azimut 90 daraja) va janubiy-sharqda (azimut 120-135 daraja)ni ko‘rsatishi Toshkent shahri geografik jihatdan shamol esadigan hududda joylashmaganini isbotlaydi”, — deyiladi kombinat munosabatida.
Ta’kidlanishicha, konlarni o‘zlashtirish uchun loyiha oldi loyiha hujjatlarida ekologik xavflarning yuzaga kelishi va atrof-muhitga taʼsirining oldini olish choralari hisobga olingan va bajarilayotgan ishlarning atrof-muhitga taʼsirining oldini oluvchi choralar ko‘rilgan.
Eslatib o‘tazmi, 2022-yil oktabrda O‘zbekistonda atmosferaga zararli tashlanmalarning 58 foizi (1,4 million tonna) avtotransport vositalariga to‘g‘ri kelishi ma’lum qilingandi. O‘shanda Toshkent shahrida bu ko‘rsatkich 93 foiz (397 ming tonna)ni tashkil etishi aytilgan edi.
Izoh (0)