Xabaringiz bor, Olmaliq kon-metallurgiya kombinatida bir qator investitsiya loyihalari amalga oshirilmoqda. Ulardan biri O‘zbekiston Respublikasi Prezidentining 2017-yil 1-martdagi “Yoshlik I” koni negizida “Olmaliq KMK” AJning ishlab chiqarish quvvatlarini kengaytirish chora-tadbirlari to‘g‘risida»gi PQ 2807-sonli qarori asosida “Yoshlik I” konini o‘zlashtirishdir.
Ushbu investitsiya loyihasi doirasida yiliga 60 million tonna rudani qayta ishlash quvvatiga ega bo‘lgan 3-mis boyitish fabrikasi ham barpo etilmoqda. Yangi sanoat korxonalarining uzluksiz texnologik jarayonini ta’minlash uchun qo‘shimcha elektr energiyasi bilan ta’minlovchi stansiyalar zarur bo‘ladi. Aynan shu maqsadda “Yoshlik I” konini hamda yangi barpo etilayotgan 3-mis boyitish fabrikasining elektr energiyasiga bo‘lgan ehtiyojini qondirish uchun yangi nimstansiya qurilishi boshlandi.
Mazkur yo‘nalishda zamonaviy 550/110/10kV kuchlanishli “Texnologik”(Tukket) pasaytirib beruvchi elektr nimstansiyasi barpo etilmoqda.
Nimstansiyani qurish ishlari joriy yilning mart oyida boshlangan. Qurilish ishlariga bosh pudratchi tashkiloti sifatida EPC tayyor holda topshirish sharti bilan JSC O‘zelektroapparat-Electroshield kompaniyasi jalb etilgan. Ayni kunlarda ORU-500 kv ochiq taqsimlash uskunani o‘rnatish ishlari boshlab yuborilgan. Hozirda nistansiyaning transformator tarmog‘i kuchlanishli transformatorlari uchun temir beton poydevorini montaj qilish ishlari amalga oshirilmoqda. Shuningdek, 500 kv kuchlanishli elektr uzatish havo liniyalar uchun tayanchlarni yig‘ish va montaj qilish ishlari ham bajarilmoqda.
Qurilish ishlariga ayni paytda pudrat tashkilotining 80 nafarga yaqin mutaxassislari jalb etilgan. Bundan tashqari, 20 dona maxsus qurilish texnika vositalari va yuk mashinalari safarbar etilgan.
“Texnologik”(Tukket) nimstansiyasi 2023-yilning 1-choragida foydalanishga topshirilishi rejalashtirilgan.
Pirovardida mazkur zamonaviy nimstansiya ishga tushishi bilan yangi istiqbolli kon sifatida e’tirof etilayotgan “Yoshlik-1” koni OKMK elektr tarmoqlariga ulanadi, shuningdek, hozirda foydalanib kelinayotgan kombinat nimstansiyalarining yuklamasi qisman kamayadi.
3-MBF bilan birgalikda uning faoliyatini barqaror ta’minlash maqsadida, suv ta’minoti obyektlari hamda yangi ohak zavodi qurilishlari belgilangan.
Ma’lumot o‘rnida yana shuni aytish mumkinki, “Yoshlik-I” konini o‘zlashtrish loyihasi amalga oshsa, yiliga 105 million tonna ruda qazib olish quvvatiga ega bo‘lgan kon, 60 million tonna ruda qayta ishlash imkoniyatga ega bo‘lgan yangi 3-sonli mis boyitish fabrikasidan tashqari, keyingi bosqichlarda 50 million tonna ruda qayta ishlash imkoniyatiga ega bo‘lgan yangi 4-sonli mis boyitish fabrikasi, 400 ming tonna mis ishlab chiqarish quvvatiga ega mis elektrolizi sexi, 1 million 800 ming tonna sulfat kislotasi ishlab chiqarish sexi, 110 ming kub metr kislorod ishlab chiqarish quvvatlari quriladi.
Bundan tashqari, yangi 2 va 3-sonli eritish (Vanyukov) pechlari, yangi anodlash va uzluksiz konvertorlash bo‘limlarining qurilishi amalga oshiriladi hamda 6000 ta yangi ish o‘rinlari yaratiladi.
OKMK axborot xizmati
Izoh (0)