Joriy yilning 29—30-sentabr kunlari Toshkentda bo‘lib o‘tgan “Iqtisodiy islohotlar sarhisobi va istiqboli” mavzusidagi 1-xalqaro iqtisodiy forumida yirik sanoat korxonasi bo‘lgan Olmaliq kon-metallurgiya kombinati va dunyoning yetakchi kompaniya hamda banklari o‘rtasida bir qator manfaatli shartnomalar imzolandi.
Jumladan, ERP tizimini qo‘llash konsepsiyasini ishlab chiqish uchun “KPMG Taks end Edvayzori” mas’uliyati cheklangan shirkati bilan shartnoma imzolandi.
ERP tizimlari korxona va tashkilotlarning zamonaviy rivojlanish bosqichida axborot maydonida keng qamrovli o‘rin egallaydi.
Enterprise Resource Planning (ERP) — bu korxona resurslarini rejalashtirish, ishlab chiqarish, sotish, xaridlarni amalga oshirish va ishlab chiqarish, xizmatlar sohalarida mijozlar buyurtmalarining bajarilishini hisobga olish uchun zarur bo‘lgan barcha korxona resurslarini samarali rejalashtirish va boshqarish metodologiyasi.
“Olmaliq KMK” AJ faoliyatida ERP tizimini joriy etish loyihasi “Raqamli O‘zbekiston — 2030” milliy strategiyasi doirasida amalga oshirilayotgan “Raqamli OKMK — 2030” konsepsiyasiga asosan ishlab chiqilmoqda.
KPMG va OKMK mutaxassislarining hamkorlikdagi ishlari natijalari asosida ERP tizimini qo‘llash konsepsiyasi ishlab chiqiladi. Yani bir hamkorlik shartnomasi Kanadaning HACh kompaniyasi bilan imzolandi. HACh boshqaruv, loyiha va ishlab chiqish bo‘yicha xalqaro konsalting kompaniyasi hisoblanadi.
Hamkorlik shartnomasi mis sanoati klasterini tashkil etish va rivojlantirish konsepsiyasini ishlab chiqishda mis mahsulotlari va kon mashinalari ishlab chiqarish bo‘yicha tajriba almashish, ilg‘or texnologiyalarni joriy qilish maqsadida tuzildi.
Ma’lumot o‘rnida shuni aytish joizki, joriy yilning 24-iyun kuni “Kon-metallurgiya sanoati va unga bog‘liq sohalarni rivojlantirish bo‘yicha qo‘shimcha chora-tadbirlar to‘g‘risida”gi prezident qaroriga muvofiq mis sanoati klasteri tashkil etilishi belgilanib, ushbu strategik vazifani amalga oshirish chora-tadbirlari ko‘rsatib o‘tildi.
Mis sanoati klasterini tashkil etish maqsadida, rangli va noyob metallar uchun geologiya-qidiruv ishlarini kengaytirish bo‘yicha 5 yillik dastur ishlab chiqilishi, sohada loyiha va muhandislik xizmatlarini rivojlantirish uchun yetakchi xalqaro kompaniyalarni jalb etgan holda, zamonaviy loyiha institutini tashkil qilish, respublikamizda tog‘-kon uskunalari va jihozlarini ishlab chiqarishni hamda ularga servisni yo‘lga qo‘yish kabi vazifalari belgilangan.
Bugungi kunda OKMK mamlakatimizda 90 foiz mis ishlab chiqaradi. HACh kompaniyasi bilan imzolangan hamkorlik shartnomasini ham prezidentning qarori ijrosi sifatida baholash mumkin.
Iqtisodiy forumda kombinat va bir qator banklar o‘rtasida ham hamkorlik aloqalari yo‘lga qo‘yildi.
Xususan, OKMK va Rossiya Federatsiyasining “Moskva kredit banki” OAJ o‘rtasida hamkorlik bitimi imzolandi.
Ushbu bitim kon-metallurgiya sanoatidagi bir qator iqtisodiy asosli loyihalarni moliyalashtirish sohasidagi hamkorlikni kengaytirish va bank tomonidan OKMK investitsiyaviy loyihalarini moliyalashtirishni tashkil etish imkoniyatlarini o‘rganish maqsadida tuzildi.
Shuningdek, OKMK va Rossiya Federatsiyasining “Sovkombank” OAJ o‘rtasida kredit berishning dastlabki shartlari bo‘yicha hujjat ham imzolandi.
Unga ko‘ra, investitsiya loyihalarini moliyalashtirish uchun 200,0 million dollar miqdoridagi mablag‘ 2 yil imtiyozli davr bilan 5 yil muddatga investitsiyaviy loyihalar, shu jumladan, “Yoshlik-1 konini o‘zlashtirish” loyihasi, shuningdek, boshqa umumkorporativ maqsadlar uchun kredit berishning dastlabki shartlari belgilandi.
Xulosa qilib aytadigan bo‘lsak, 2 kun davom etgan iqtisodiy forum kombinat va hamkorlar uchun samarali bo‘ldi.
Ma’lumot sheriklik huquqi asosida tayyorlandi.
Izoh (0)