So‘nggi choraklarda O‘zbekistonda real ish haqi o‘sishi mintaqadagi davlatlar bilan solishtirganda pastroq shakllanmoqda. Bu haqda Markaziy bank “Mehnat bozori sharhi”da maʼlum qildi.
Joriy yil yanvar-mart oylarida Markaziy Osiyo davlatlarida real ish haqining o‘rtacha o‘sishi 9,8 foizni, ayrim Kavkaz davlatlarini hisobga olganda esa 9,1 foizni tashkil etgan. Mazkur davrda O‘zbekistonda real ish haqi o‘sishi 7,2 foizga teng bo‘lgan.
“Iqtisodi o‘xshash mamlakatlarga nisbatan mazkur tafovutning uzoq muddat saqlanib qolishi kelgusida O‘zbekiston mehnat bozori ishtirokchilarining xarid qobiliyati pasayishiga va talabning susayishiga olib keladi”, deyiladi sharhda.
2025-yil II choragida O‘zbekistonda mehnatga haq to‘lashning eng kam miqdori 91 dollarni tashkil etgan. Eng yuqori minimal ish haqi miqdori Belarus (243 dollar), Ozarbayjon (235 dollar) va Mongoliya (222 dollar) davlatlariga to‘g‘ri kelgan.
“O‘zbekistonda yillik minimal ish haqining aholi jon boshiga yalpi ichki mahsulot hajmiga nisbati 35 foizga teng bo‘lgan. Ushbu ko‘rsatkichning yuqoriligi mamlakatda daromadlar boshqa davlatlarga nisbatan tengroq taqsimlanganini ko‘rsatsa, nisbatning pastligi aksincha daromadlar notekis taqsimlanganidan dalolat beradi. Mintaqa davlatlari orasida Qozog‘iston (14 foiz), Qirg‘iziston (14 foiz) va Gruziya (12 foiz) davlatlarini hisobga olmaganda, boshqa davlatlar, jumladan O‘zbekistonning ushbu ko‘rsatkichlari yuqoriroq va bir-biriga yaqin shakllangan”, deya qayd etgan Markaziy bank.
O‘zbekistonda 2025-yil II choragida ish haqining nominal o‘sish surʼati yillik 17,2 foizni, real o‘sishi esa 7,3 foizni tashkil etgan. Bunda o‘rtacha oylik ish haqi 6 million so‘mga teng bo‘lgan. Sohalar kesimida moliya va sug‘urta (million so‘m), axborot va kommunikatsiya xizmatlarida (14,8 million so‘m) o‘rtacha ish haqi boshqa sohalarga nisbatan yuqoriligicha qolgan.
O‘z navbatida II chorak davomida axborot, transport va ijtimoiy xizmatlar xodimlari ish haqi qolgan tarmoqlar ishchilarinikiga nisbatan real va nominal qiymatlarda yuqoriroq o‘sgan. Ish haqining eng kam o‘sishi qurilish sohasida kuzatilib, nominal qiymatda yillik 6,1 foizga oshgan, real qiymatda esa 2,8 foizga kamaygan.
2025-yil 1-iyul holatiga ko‘ra, mamlakat iqtisodiyotida ish bilan band aholi soni 14,6 million nafardan, ishsizlar soni 800 ming kishidan iborat. Mehnat bozorida qamrab olinmagan aholi, jumladan bolalar, talabalar, nafaqaxo‘rlar va boshqalar soni 22,5 million kishini tashkil etadi. Shundan mehnatga layoqatli yoshgacha bo‘lgan aholi 12 million nafardan iborat.
Izoh (0)