Olmaliq kon-metallurgiya kombianti rahbariyati tomonidan bir qator xorij davlatlarining muhandislar tayyorlash markazlari faoliyatini o‘rgangan holda hamda kombinatning kadrlarga bo‘lgan ehtiyojidan kelib chiqib zamonaviy muhandislik maktabi tashkil etilmoqda.
Mazkur maktab binosini qurish uchun Olmaliq shahar Mirzo Ulug‘bek ko‘chasi hududidan 1,5 gektar yer maydoni ajratib berildi va ayni paytda qurilish ishlari jadal surʼatlarda olib borilmoqda.
Muhandislik maktabida geologiya, marksheyderlik ishi, konchilik ishi, boyitish, metallurgiya, mexanika, energetika, kon sanoati transportlari, avtomatlashtirish kabi taʼlim yo‘nalishlari bo‘yicha tinglovchilar o‘qitiladi.
Mashg‘ulotlarda davomida tinglovchilar “Serpo Mineral Systems”, “Thyssenkrupp”, “Metso Outotec”, “UZTM-Karteks”, “BelAZ” kabi dunyoning yetakchi kompaniyalarining texnologiyalarini o‘rganishadi.
Nazariy taʼlim yangi pedagogik texnologiyalar asosida amaliyotga yondashgan holda tashkil etiladi. Muhandislik maktabida mutaxassislar 6-10 oy muddatda qayta tayyorlanadi. Bir o‘quv kursiga 160 nafar tinglovchilar qabul qilish rejalashtirilgan.
Yana bir ahamiyatli jihati shundaki, mazkur maktabda tinglovchilarga darslarni dunyoning sanoati rivojlangan davlatlari olimlari va o‘qituvchilari o‘tishadi.
Muhandislik maktabi Germaniyaning, xususan, “Aurubis AG” kompaniyasi trening markazi namunasi asosida tashkil etilayapti.
Hozirda maktabda o‘qitish uchun 2020-2022-yillarda kon-metallurgiya yo‘nalishida bakalavrni tamomlagan, o‘z sohasi bo‘yicha ishlamayotgan yoshlar ro‘yxati shakllantirilmoqda.
Maktabga Finlyandiya, Kanada, Rossiya, Belarus, Germaniya, Janubiy Koreya, Xitoy, AQSH kabi davlatlardan kon-metallurgiya, geologiya, sanoat, marksheyderlik yo‘nalishlarda mutaxassislar jalb etilishi ko‘zda tutilgan.
Maʼlumot o‘rnida: OKMK va Germaniyaning Frayberg texnika universiteti Konchilik akademiyasi bilan o‘zaro memorandum imzolangan. Mazkur hamkorlik doirasida shu kunlarda akademiyaning Tog‘-kon institutining direktori, professor Karsten Drebenshtedt boshchiligida delegatsiya kombinatda bo‘lib turibdi.
Delegatsiya tarkibidagi talabalar kombinat korxonalarida o‘quv amaliyotini o‘tashmoqda.
- Talabalarga nazariy bilimlardan tashqari amaliyot ham o‘ta muhim hisoblanadi, Ayniqsa, tog‘-kon yo‘nalishida. Chunki, dunyodagi barcha konlar bir biridan farq qiladi. Geologiya sohasida ham yangiliklar ko‘p.
Bizning talabalarimiz har bir konni o‘rganib farqlay olishini xohlaymiz, buning ortidan ularning bilim, malaka va tajribalari ortadi. Shu o‘rinda aytib o‘tishim kerakki biz biror konni tanlashdan olidin talabalarga u yerda yashash va ilm olishlariga sharoit yaratib bera oladigan mamlakatni tanlaymiz. O‘zim ham bir vaqtlar talaba bo‘lganman va 1980-yil Angrendagi konlarda amaliyot o‘taganman. O‘sha davrda ham barcha imkoniyatlarni hozirlab berishgan edi.
Yana bir jihat Yevropada bu kabi konlar yo‘q, misol uchun Germaniyaning o‘zida Qalmoqqir konida ishlayotgan katta hajmidagi avtosomasvallar va ekskavatorlarni topish qiyin. Shuning uchun ham O‘zbekistonni tanladik.
Bugungi kunda davlatingiz rivojlanib borayabti. Bu juda quvonarli albatta, har bir sohada yangiliklar bisyor. Misga bo‘lgan talab dunyoda kundan kunga oshib bormoqda. Kombinatning istiqbolli loiyhalari esa mis metallini hajmini oshirishga qaratilgan. Bu juda to‘g‘ri va zarur tanlov. O‘ylaymanki, yaqin kelajakda mamlakatingiz bundanda yuqori marralarni egallaydi, - deydi Karsten Drebenshtedt.
OKMK va Frayberg akademiyasi hamkorligi doirasida hozirda oliygohning doktoranturasida ikki nafar kombinat mutaxassislari tahsil olishmoqda. Kombinatning umidli yoshlaridan biri bo‘lgan O‘ktam Norenov bu xaqda o‘z fikr mulohazalarini bildirib o‘tdi.
- OKMK va akademiya o‘rtasida imzolangan memorandum asosida hozirda Texnika universitetining doktoranturasida o‘qiyapman. O‘qish jarayonida konchilik sohasini yangi texnologiyalarni o‘rganish asosida ilmiy izlanishlar olib borayapman. O‘zaro tajriba almashish asnosida biz ulardan yangi zamonaviy texnologiyalarni o‘zlashtirish imkoniyatiga ega bo‘lsak, Germaniyalik talabalar kombinatda qazib olishdan tortib tayyor mahsulotgacha bo‘lgan jarayonni o‘rganish imkoniga ega bo‘lishmoqda.
Har qanday soha rivoji zamonaviy texnologiya, ilg‘or ishlab chiqarish tizimi, xalqaro aloqalar kabi muhim omillarga bog‘liq bo‘lsa-da, bilimli, malakali, jahon standartlari talablariga javob beradigan mutaxassislar bunda asosiy o‘rin egallaydi. Shu bois, OKMKda bugun ana shunday iqtidorlarni tayyorlash ustuvor vazifa sifatida belgilangan.
OKMK axborot xizmati
Reklama huquqi asosida.
Izoh (0)