2025 йилнинг бошида франциялик аёл сохта Бред Питт учун эри билан ажрашиб, 850 минг доллар пулини йўқотган аёл ҳикояси бутун дунё бўйлаб тарқалди. Аёл узоқ вақт давомида интернетда сўзлашиб юрган ва “даволаниш учун” минглаб доллар пул жўнатган одам фирибгар бўлиб чиққан. Аслида, шунга ўхшаш ҳолатлар реал ҳаётда жуда кўп учрайди. Шунчаки, қаллоблар тузоғига тушиб қолганини тан олишга журъат эта оладиганлар камдир.
Бред Питт
2023 йил бошида 55 ёшли француз аёлига ўзини Бред Питтнинг онаси деб таништирган аёл қўнғироқ қилган. У Бред учун Энн (жабрланувчи) муносиб жуфт бўлишини айтган. Кейинчалик “Питт”нинг ўзи Энн билан боғланган. Улар деярли бир йил давомида мулоқот қилишган ва бу вақтда Энн сохта Бредни севиб қолган. Сўнг фирибгар ўзининг оғир касал эканлиги ва даволаниш учун пулга муҳтож эканлигини айтган. Натижада, Энн унга катта миқдорда пул юборишга рози бўлган.
Том Ҳенкс
Актёр Том Ҳенкснинг номидан жуда кўп жиноятчилар фойдаланади. Аммо сўнгги ҳолатда унинг образини реклама мақсадида ишлатишган:
“Интернетда менинг исмим, юз ифодам ва овозимдан менинг рухсатимсиз фойдаланган ҳолда “мўжизавий” дори воситаларини тарғиб қилиш учун ишлатишди. Буларнинг барчаси менинг ижозат сўралмай сунъий интеллект ёрдамида яратилган. Машаққат билан топган пулингизни беҳуда сарфламанг”, дея мурожаат қилди актёр ўзининг Instagramи’да.
Женнифер Энистон
Ўзини машҳур санъаткор сифатида кўрсатадиган одамларнинг нишонига кўпинча кексалар тушади, чунки улар жуда ишонувчан бўлади. “Женнифер Энистон” га пул жўнатган 71 ёшли эркак ҳам шулар жумласидандир. Исми ва ёшини яширган яна бир алданган шахснинг сўзларига кўра, сохта Женнифер Энистон ўзининг туғилган кунига таклифнома юборган. Бечора қурбон тадбир учун ҳатто алоҳида кийим-кечак сотиб олган.
Киану Ривз
“Мен ўзимдан бошқа ҳеч кимни айбламайман”, дейди ўз машинасида яшашга мажбур бўлган аёл. Ушбу воқеа қурбони бева аёлдир. У бор пулини ўзини Киану Ривз деб таништирган эркакка юборган. Эркак узоқ вақт телефонда сўзлашиб, уни ўзига ром этган. Ҳатто шахсини тасдиқловчи ҳужжат сифатида унга ҳайдовчилик гувоҳномасининг расмини ҳам юборган, албатта, у қалбаки эканлигини аёл билмаган.
Жонни Депп
Сунъий интеллектнинг ривожланиши билан фирибгарлик ҳолатларининг сони ҳам ортиб бормоқда. Сўнгги йилларда аёллар ўзини Жонни Депп сифатида кўрсатган эркакларга минглаб доллар жўнатгани ҳақида ҳикоялар кўпайиб бормоқда. “Бугунги кунда СИ менинг юзим ва овозим иллюзиясини яратиши мумкин. Лекин мен ҳам, менинг жамоам ҳам сиздан пул ёки шахсий маълумотларингизни ҳеч қачон сўрамаймиз”, дея мухлисларини огоҳлантирди Депп.
Изоҳ (0)