Калифорниядаги ўрмон ёнғинлари 12 мингдан ортиқ оилани бошпанасиз қолдирди. Аҳолининг кўпгина қисми уйларини шу қадар тез тарк этишга мажбур бўлдики, улар фақатгина керакли ҳужжатларини олишга улгуриб қолди. Ҳозирда ушбу офат қурбонлари учун кийим-кечак, пойабзал, шахсий гигиена воситалари ва бошқа зарур буюмларни йиғиш учун махсус марказлар ташкил этилган. Аҳолига ёрдам беришда кўплаб Голливуд юлдузлари ҳам жонбозлик кўрсатмоқда.
Хусусан, хонанда ва актриса Женнифер Лопес Голливуддаги кўп йиллик фаолияти давомида тўплаган гардеробини юк машинасида гуманитар ёрдам сифатида юборди. Кийимлар Лос Анжелесдаги мактаб округи ва Пасадена мактаблари ўқувчилари учун мўлжалланган. Бундан ташқари, 55 ёшли хонанда JLO номли шахсий косметика маҳсулотларини ҳамда турли аксессуарларни ҳам хайрия қилди. Керакли буюмларнинг бари The А-List ташкилотига юборилган.
Бундан ташқари, Женнифер Лопес табиий офатлар пайтида оилалар ва уларнинг фарзандлари учун хавфсиз бошпана ва биринчи ёрдам берувчи Boys & Girls Club’ни ҳам молиявий қўллаб-қувватлади. Актрисанинг ўзи бир вақтлар болалигида Bronksдаги бошпаналарда кун кўрган:
“Ушбу ёнғин уйидан айрилган ва қўрқув остида қолган болалар учун қанчалик травма бўлишини тасаввур ҳам қила олмайман. Бундай пайтларда Лос Анжелесдаги Boys & Girls Club жамоаси ёрдамга муҳтож болалар ва оилалар учун хавфсиз жой тақдим этишга тайёр туради. Бу ерда болалар ўзларини хавфсиз ҳис қилишлари ва ҳатто энг оғир дамларида ҳам куч топа олишлари мумкин”, деди Лопес.
-ab2l8r2j.jpeg)
Голливуднинг яна бир машҳур актёри Леонардо Ди Каприо ҳам катта миқдорда хайрия ишларини амалга оширди. У давом этаётган ёнғинлардан жабр кўрганларга ёрдам бериш учун 1 миллион доллар хайрия қилди.
“Лос Анжелесдаги ўрмон ёнғинлари шаҳримизни вайрон қилмоқда. Мен гуманитар ёрдам бериш бўйича ҳамкорлик дастури орқали шошилинч эҳтиёжлар ва ёнғинни бартараф этиш бўйича саъй-ҳаракатларни қўллаб-қувватлаш учун 1 миллион доллар ажратаман”, деди Ди Каприо.
Бундан аввал Лос Анжелесдаги ёнғинлар бошланганининг эртаси куни “Титаник” фильми юлдузи қаллиғи Витториа Черетти ҳамда ота-онаси билан хусусий самолётда Мексикага етиб келганида аэропортда папарацсига тушиб қолган эди. Катта талафотлар фонида актёрнинг АҚШни тарк этиши кўплаб хорижий нашрларда салбий қабул қилинган эди.
Изоҳ (0)