Ота-она эгаллаган касбни танлаш ва уларнинг изидан бориш доим ҳам осон эмас. Атрофдагилар кўпинча фарзанд отасидан ҳам ўзиб кетишини ва ўз соҳасида кўпроқ ташаббус кўрсатишини кутади.
Қуйидаги ёш актёр ва актрисалар буни яхши тушунади ва ўз маҳорати ва истеъдодини намоён қилишга ҳаракат қилади.
“Лакрицали пицца” — Купер Ҳоффман
“Ҳаёт-мамот ўйинлари”, “Энг хавфли одам”, “Уста” фильмлари билан машҳур бўлган марҳум актёр Филипп Сеймур Ҳофманнинг ўғли ҳам санъат соҳасида ишлайди. 200 йилда туғилган ёш Купер Ҳоффман “Лакрицали пицца” фильмида бош ролни ижро этган ва “Олтин глобус” мукофоти учун номинацияга қўйилган.
“Ўргимчак хоним” — Дакота Жонсон
Дакота Жонсон актёр Дон Жонсон ва актриса Мелани Гриффитнинг қизидир. Унинг отаси “Озод Жанго” ва “Қинидан чиққан пичоқлар” фильмларидаги иштироки билан машҳур. Аммо ота ва қиз камдан-кам кўришиб туради:
“Қизим менга бирор маслаҳат сўраш учун эмас, балки суратга тушиш ишлари кўпайиб кетгани сабабли кела олмаслигини айтиш учун қўнғироқ қилади”, дейди Жон Жонсон.
Яқинда Дакота Жонсон ижросида Marvel’нинг “Ўргимчак аёл” фильми намойиш этилди.
“Астероидлар шаҳри” — Майя Ҳоук
Ёш актрисанинг онаси Ума Турман “Биллни ўлдириш” ва “Жиноий асар” фильмларидаги роли билан машҳур, отаси Итан Хоук эса “Ўлик шоирлар жамияти”, “Гаттака” каби лойиҳаларда иштирок этган. Ума Турман фикрига кўра, унинг қизи ота-онасидан сабоқ олишга тўғри келмаган, чунки Майя болалигидан иқтидорли қиз бўлган:
“У жуда ажойиб актриса, бошқачасига бўлиши ҳам мумкин эмас”, дейди Турман.
“Космик курсант” — Эмма Робертс
Эрик Робертс ва Келли Каннингем фарзанди айнан кино соҳасини танлаганидан мамнун.
“Шу кунларда қизимнинг фаолиятидан ва ишидан жуда хурсандман. Унинг нақадар ажойиб актрисага айланганидан фахрланаман”, дейди мағрур ота.
Эрик Робертс “Фавқулодда ҳолат”, “Грэй анатомияси" ва бошқалар телесериалларида иштирок этган.
“Бетмен” — Зои Кравиц
Зои Кравицнинг отаси Ленни Кравиц нафақат машҳур мусиқачи, балки актёр ҳам бўлган. У “Ҳаёт-мамот ўйинлари”, “Қароқчилар тўйи” каби фильмларда рол ўйнаган. Отанинг фикрича, Зои Кравиц бежизга санъат соҳасини танламаган:
“У ҳаётдан ўзига нима керак эканлигини аниқ биладиган инсон. Қизим ҳар ишини катта масъулият билан бажаргани учун ғоят фахрланаман”, дейди Кравиц.
“Бетмен” фильмининг янги талқинида Зои Кравиц Роберт Паттинсон билан биргаликда ишлаган.
“Қарға” — Билл Скарсгард
“Дюна”, “Кариб денгизи қароқчилари”, “Чернобил” каби лойиҳалар орқали машҳур бўлган Стеллан Скарсгарднинг ўғли Билл ҳам таниқли лойиҳаларда иштирок этишга улгурган. Масалан, “Жон Уик 4”, “Қарға” каби фильмлар мухлислар томонидан яхши баҳоланган.
“Субстанция” — Маргарет Коулли
Ҳозирда Маргарет Коулли “Суғур куни” фильмида бош ролни ижро этган онаси Энди Макдауэлл билан биргаликда бир фильмда суратга тушмоқда. Энди сўзларига кўра, у ҳеч қачон болаларини бирор ишга жойлаштиришга ҳаракат қилмаган. Маргарет барча нарсага ўз меҳнати билан эришган. Шу сабабли “Субстанция”, “Бир куни Голливудда” фильмида суратга тушишга муваффақ бўлган.
“Бўри” — Лили Роуз Депп
Голливуд юлдузи Жонни Депп унинг фарзанди ҳеч қачон кино карьерасини танлашини истамаган, аммо Лили Роуз ўз сўзида туриб оладиган қатъиятли қиз чиқди. У “Бўри” фильмида бош ролни ижро этган.
“Питер Пен ва Венди” — Эвер Андерсон
Эвер Габо Андерсон — машҳур актриса Мила Ёвович ва режиссёр Пол Андерсоннинг қизи. Эвер онасининг изидан борган ва тўққиз ёшида Vogue Бамбини журналининг муқоваси учун суратга тушган.
“Сени қайтаришни истайман” — Скотт Иствуд
Актёр Клинт Иствуд иштирокидаги “Сирли дарё”, “Гран Торино” фильмлари севиб томоша қилинади. Унинг ўғли Скотт отаси қандай тарбия берганини шундай эслайди:
“Дадам учун мен сантехник бўламанми ёки актёрми, бунинг аҳамияти йўқ эди. У доим қайси соҳани танласам ҳам уни яхши бажаришим лозимлигини таъкидлар эди. Шунингдек, камтар ва доим ростгўй бўлишим кераклигини уқтирар эди”, дейди Скотт Иствуд.
“Сени қайтаришни истайман” фильмида у севган қизини қайтариш учун бел боғлаган тарбияли йигит ролини ўйнайди.
Изоҳ (0)