Франциялик 53 ёшли Энн ўзини Бред Питт деб таништирган фирибгарнинг қурбони бўлди. Бу ҳақда TV.Mail.ru хабар берди.
Аёл 2023 йилда ижтимоий тармоқларда янги аккаунт очган. Маълум вақтдан сўнг унга Питтнинг номидан бир эркак хатлар ёза бошлаган. Аввалига “актёр” у билан хушмуомала бўлган ва ширин суҳбатлар олиб борган. Сўнг сумка ва тақинчоқлар кўринишида турли совғаларни жўната бошлаган. Бироқ уларни қабул қилиб олишдан аввал гўёки божхона харажатлари учун аёл ҳар сафар 5 минг доллардан ортиқ пул тўлаши керак бўлган.
Мавзуга доир: Испанияда ўзини Бред Питт деб таништирган ва аёллардан 360 минг доллар олган фирибгарлар қўлга олинди
Энн ўзининг фирибгар сўзларига ишониб қолганини тан олди. Унинг сўзларига кўра, эркак аёллар психологиясини ва улар билан қандай гаплашиш кераклигини билган. Ўша вақтда аёл миллионер турмуш ўртоғи билан оғир даврни бошдан кечирган ва эрининг унга етарлича эътибор бермаганидан ранжиган. Натижада аёл сохта Бред Питт учун эридан кечган.
Энн сўзларига кўра, аввалига у Голливуд юлдузи билан гаплашаётганига шубҳа қилган. Бироқ сунъий интеллектдан фойдаланиб ясалган сохта суратлар уни ишонтирган. Кўп ўтмай, “Бред Питт” ўзида буйрак саратони аниқланганини айтиб, даволаниш учун пул сўраган. У Анжелина Жоли билан ажрим жараёни туфайли ҳисоб рақами музлатилганини айтган ва шу сабабли касалхона харажатларини ўзи тўлай олмаслигини иддао қилган. Содда аёл “муваффақиятсиз ўтган операциялар” учун жиноятчига бир неча марта минглаб евро юборган. Энн жами 855 минг АҚШ долларидан ортиқ пули берган.
Энн ўша даврда нафақат турмуш ўртоғи билан ажрашганини, балки қизи билан жанжаллашиб қолгани, кўплаб дўстларини йўқотгани ва руҳий касалликлар шифохонасига ётқизилганини ҳам сўзлаб берди. У Питт ва Инес Де Рамон ўртасидаги муносабат ҳақидаги янгиликларни ўқигач, фирибгарнинг қурбони бўлганини тушунган ва полицияга мурожаат қилган.
Фото: The Telegraph
Изоҳ (0)