Фильмни суратга олиш пайтида турли жароҳат олмасликни ҳеч ким кафолатламайди. Голливуд юлдузлари, айниқса, жангари фильмларда ишлай бошлаганда буни жуда яхши англайди. Ҳатто баъзилари дублёр ва каскадёрлардан фойдаланишни рад этиб, қатъиятли ва журъатли шахс эканини исботлайди.
Леонардо Ди Каприо
Кўпчилик Квентин Тарантинонинг “Озод Жанго” фильмидаги ушбу саҳнани эсласа керак. Унда бош қаҳрамон ғазаб билан муштини столга уради ва шиша синиқлари унинг қўлини кесиб юборади. Аммо бу лавҳа импровизация эканлигини кўпчилик билмайди. Ди Каприо ўша вақтда тасодифан жароҳат олган, аммо қон оқишига қарамай ўз ролини ижро этишда давом этган.
Силвестр Сталлоне
Каскадёрлар ёрдамисиз турли трюкларни мустақил бажариб келгани билан машҳур бўлган Сталлоне кўп бор касби туфайли касалхонага тушиб қолган. “Чегарасиз” фильмини суратга олиш чоғида Стив Остин образи билан бўлган муштлашув саҳнасида актёрнинг елкаси чиқиб кетган ва бўйни синган. Сталлоне бир нечта операцияларни бошидан ўтказди. Айна шу воқеадан сўнг у ҳамкасбларини дублёр ёрдамидан бош тортмасликка чақирди.
Дэниэл Крейг
Дэниэл Крейг Жеймс Бонд ролини қабул қилиб олгандан сўнг, кўплаб трюкларни бажаришга имзо чеккан. Бир эпизодни суратга олишда Крейг зарбадан қутула олмаган ва иккита тишини йўқотган. Бироқ регби мактабида таҳсил олган актёр бундай жароҳатлардан қўрқмайди:
“Отам спортчи бўлишимни орзу қиларди. Мен регбини жуда яхши ўйнардим, деярли профессионал даражада эдим ва кейинчалик футбол билан шуғулландим. Ўша ерда елкамни жароҳатлаб олдим, бу ҳамон мени безовта қилмоқда”, дейди актёр.
Сўнг Крейг учун “Раҳмдиллик кванти” лойиҳаси ҳақиқий синов бўлди — суратга олиш жараёнида унинг мушаклари ёрилиб, бир нечта қовурғалари синди, юзига шу қадар кўп шикаст етдики, унга саккизта чок қўйилди.
Маргарет Куолли
“Оскар” га номзод бўлган таниқли “Субстанция” фильмида ёш актриса жиддий муаммоларга дуч келди. Ҳар куни бажарилиши керак бўлган мураккаб гримм туфатли унинг юзида турли тошмалар ва ҳуснбузарлар пайдо қилди. Вақт ўтиб Куоллининг териси шу қадар қизариб кетдики, режиссёр охирги саҳналарда уни қоронғу кадрда суратга олишга мажбур бўлди. Унинг соғлиғи тикланиши учун эса қарийб бир йил керак бўлди.
Ченнинг Татум
“Тулкилар овчиси” драмасини суратга олиш чоғида Ченнинг Татум ўз образига шунчалик қизиқиб қолдики, саҳналарнинг бирида у бор кучи билан бошини ойнага урди. Тан жароҳати олган Татум касалхонага ётқизилган ва ажойиб кадрлар фильмга киритилган.
“Тўққизинчи легион бургути” картинаси устида ишлаётганда қаҳрамонлар муздек дарёга шўнғиш саҳнада актёрларнинг костюмига илиқ сув қуйишар эди. Улардан бири тасодифан Татумни қайноқ сув билан куйдириб юборган.
Ума Турман
Квентин Тарантино ва унинг илҳом париси Ума Турман ўртасидаги дўстлик барчага абадийдек туюлган эди, аммо 2010 йилларнинг ўрталарида актриса “Биллни ўлдириш” фильмини суратга олиш майдончасида юз берган нохуш ҳодиса ҳақида очиқ гапириб чиққан. Маълум бўлишича, кабриолетда олинган машҳур саҳна давомида Турман жиддий автоҳалокатга учраган — у соатига 65 км тезликда ҳаракатланаётиб, бошқарувни йўқотган ва дарахтга урилган.
Машина бутунлай яроқсиз ҳолга келган, Турманнинг ўзи эса оғир тан жароҳатлари, мия чайқалиши, бўйин ва оёқ синиши билан шифохонага ётқизилган. Эътиборли томони шундаки, аввалига у ушбу саҳнада суратга тушишни хоҳламаган ва каскадёрдан фойдаланишни талаб қилган. Бироқ Тарантино ва фильм продюсери Ҳарви Вайнштейн Турманнинг ўзи кадрда бўлишини талаб қилган. Квентин бундан жуда афсусда эди, аммо актриса ва режиссёр ўртасидаги муносабатлар ёмонлашди.
Том Круз
Машҳур Голливуд актёри суратга олиш майдончасида бир неча марта ўзини хавф остига қўйган. “Уддалаб бўлмас топшириқ” франшизасининг олтинчи қисми устида ишлаётганда Том Круз бир томдан иккинчи томга сакраётган эди, бироқ узоқликни нотўғри ҳисоблаган актёр бино деворига урилиб, тўпиғини синдириб олган. Жароҳатига қарамай, Круз ўзининг каскадёрлик трюкини якунлади, аммо ушбу бахтсиз ҳодиса студияга жуда қимматга тушди. Суратга олиш ишлари эса икки ойга тўхтатилди.
Никол Кидман
Интервьюларидан бирида Никол Кидман “Мулен Руж”нинг суратга олиш жараёнида дуч келган қийинчиликлари, икки марта қовурғасини синдириб олганини айтиб берган. Маълум бўлишича, бунга актёр Юен Макгрегор сабабчи бўлган.
“Юен мени тушириб юборган ва мен қовурғамни синдириб олганман. Энди битишни бошлаганида корсет кийсам, қовурға барқарорлашади ва яхшироқ бўлади. деб ўйлаганман. Аксинча бўлиб чиққан: корсет янада зўриқтириб юборган. Мен тик турганча уни иккинчи марта ҳам синдириб олдимов деб ўйлаганимни яхши эслайман”, деган актриса.
Ҳолли Берри
“Мушук аёл” ва “Ғаройиб одамлар” фильмлари юлдузи Холли Беррига ҳам ўз кабига садоқати қимматга тушган. Турли фильмларда суратга тушиш учун актриса жанг санъатларини, жумладан, жиу-жицу, тай бокси, кикбоксинг ва таэквондони ўрганган, шунингдек, ўқотар қуроллардан фойдаланиш бўйича ҳам сабоқлар олган. Аммо шунчалик кенг тайёргарлик билан ҳам у жароҳатлардан қочиб қутула олмаган. Берри “Зарбалар” фильмида қўлини, думғаза суягини, икки бармоғини ва бир нечта қовурғасини синдириб олган. Барча жароҳатларга қарамай Ҳолли фильм сёмка жараёнларини ортга сурмаган ва лойиҳани ўз вақтида якунлаган.
Изоҳ (0)