Сўнгги йилларда ҳиндистонлик актёрлар, режиссёрлар ва кино соҳасидаги бошқа юлдузлар Голливуд эътиборини кўпроқ жалб қилмоқда. Улар фильмларда рол ўйнаш билан чекланмай, халқаро кино саноатининг муҳим қисмига айланиб, маданиятлар алмашинувини тарғиб қилмоқда ва узоқ йиллар давомида қолиб кетган стереотипларни бузмоқда. Қуйида Голливудда ҳам катта мавқега эга бўлган энг машҳур ҳиндистонликлар ҳақида сўз боради.
Приянка Чопра
Голливудда ҳам улкан муваффақият қозонган энг машҳур ҳинд актрисаларидан бири бу Приянка Чопрадир. У 18 ёшида “Дунё гўзали-2000” танловида ғолиб бўлгач, карьерасига биринчи қадамни қўйди. Ғалабасидан уч йил ўтиб, Приянка Болливудда иш бошлади ва бугунги кунда у Ҳиндистондаги энг кўп маош олувчи актрисалардан бири ҳисобланади. Чопра “Mалибу қутқарувчилари”, “Матрица: Қайта туғилиш” ва “Қўрғон” каби Голливуд фильмларида суратга тушган.
Унинг Голливудда энг катта шуҳрат олиб келган роли бу “Куантико” (2015–2018) сериали бўлиб, актриса унда Федерал тергов бюросининг агенти — Алекс Перриш ролини ижро этган. Сўнг Чопра ўзининг харизмаси ва истеъдоди туфайли америкалик томошабинларнинг севимли ҳинд актрисасига айланди.
Чопра актрисаликдан ташқари продюсерлик билан ҳам шуғулланади ва UNICEFнинг эзгу ният элчиси ҳисобланади.
Дев Пател
Гарчи Пател “Харобадан чиққан миллионер” фильми чиқишидан олдин Британиянинг “Гўдаклар” ўсмирлар сериалида кичик рол ўйнаган бўлса-да, унинг катта экрандаги дебюти оламшумул машҳурлик келтирди. Фильм саккизта номинация бўйича Оскар мукофотини қўлга киритди. Лойиҳа муваффақиятидан сўнг Дев Пател Голливудда ишини давом эттирди.
Кейинчалик ёш актёр кўплаб машҳур лойиҳаларга таклиф қилинди, уларнинг орасида “Аватар: Аанг афсонаси” мультфильми асосида суратга олинган “Тўрт унсур ҳукмдори” картинаси ҳам бор.
Пателнинг навбатдаги ажойиб роли Сара Браерлининг “Арслон” фильмидаги Никол Кидман ва Руни Мара билан биргаликдаги иши бўлди. Фильм олти номинация бўйича Оскар мукофотига лойиқ кўрилди. 2021 йилда эса у “Яшил рицарнинг афсонаси” фильмида рол ўйнади ва унинг актёрлик доираси анча кенг эканлигини исботлади.
Айшвария Рай Баччан
Айшвария Рай ҳам Приянка Чопра сингари ўз фаолиятини гўзаллик танловида ғолибликдан бошлади ва 1994 йилда “Дунё гўзали” бўлди. Сўнг қисқа фурсат ичида унга йирик реклама шартномалари бўйича таклифлар тушди. У ҳатто Vogue журнали муқовасида пайдо бўлди.
Айшвария ўзининг Голливуддаги дебютини Жейн Остеннинг классик романи асосида суратга олинган “Келин ва хурофот” (2004) фильмидан бошлади. Шунингдек, у Голливуд фильмларидан “Пушти пантера-2”, “Зираворлар маликаси” ва яна бир нечта фильмларда суратга тушган. Актрисага Бред Питт билан “Троя” фильмида рол ижро этиш таклифи берилган, аммо у таклифни рад этган.
Ҳозирда Айшвария Рай бир қатор халқаро брендларнинг, жумладан L'Оréаl брендининг юзи ҳисобланади ва мунтазам равишда Канн кинофестивалида иштирок этади.
Ирфон Хон
2020 йилда 53 ёшида вафот этган Ирфон Хон Голливудда муваффақият қозонган энг ҳурматли ҳинд актёрларидан бири эди. Унинг истеъдоди ва кўп қиррали инсон эканлиги нафақат Ҳиндистонда, балки хорижда ҳам қадрли инсонга айлантирган эди.
У “Пи ҳаёти” (2012), “Юра даври дунёси” (2015) ва “Дўзах” (2016) каби фильмлардаги роллари билан ёдда қолди. 2008 йилда суратга олинган “Харобадан чиққан миллионер” фильмида Ирфон Хон полициячи ролини ўйнаган, бу рол унга халқаро миқёсда машҳурлик келтирган. Шунингдек, актёр 2016 йилда суратга олинган “Да Винчи коди: Инферно давоми” фильмида Гарри Симс концорциуми раҳбари образини яратган.
Фрида Пинто
Фреида Пинто актёр Дев Пател сингари “Харобадан чиққан миллионер” туфайли бутун дунё бўйлаб шуҳрат қозонди. Шундан сўнг унинг Голливуддаги карьераси бошланди. Актриса Болливуддан кўра Британия ва Америка лойиҳаларида иштирок этишни афзал кўради. У “Маймунлар сайёраси” (2011) ва “Кубок рицарлари” (2015) каби фильмларда суратга тушган.
Пинто хайрия ишларида ҳам фаол. У камбағал мамлакатларда яшайдиган аёллар ва болаларни қўллаб-қувватлашга қаратилган лойиҳаларда иштирок этади.
Найт Шямалан
Ҳиндистонда туғилиб ўсган М. Найт Шямалан халқаро миқёсда машҳур режиссёр ва сценарий муаллифига айланди. Унинг фильмларида кўпинча кутилмаган сюжетли бурилишлар ва жиддий мавзулар кўтарилади. Шямаланнинг “Олтинчи ҳиссиёт” (1999) фильми ҳақиқий классикага айланди ва олтита карра “Оскар” мукофотига номзод бўлди.
Шямаланнинг бошқа муваффақиятли лойиҳалари орасида “Метин одам” (2000), “Белгилар” (2002), “Қишлоқ” (2004) ва “Сплит” (2016) бор.
Мира Наир
Мира Наир Голливуддаги энг машҳур ҳинд режиссёрларидан бири. Унинг “Ёмғирли мавсумдаги тўй” (2001) фильми танқидчиларнинг кўплаб олқишига ва турли мукофотларга сазовор бўлди. Кейинчалик у “Нью Йорк, сени севаман” (2008) ва “Катве маликаси” (2016) каби лойиҳалар устида ишлади.
Унинг фильмлари миллий анъаналар ва муҳожирлар дуч келган қийинчиликларни ёрқин акс эттириши билан ажралиб туради. Шунингдек, Наир ривожланаётган мамлакатлардаги ёш кино ижодкорларини қўллаб-қувватловчи ташкилотга асос солган.
Изоҳ (0)