“Калмар ўйини 2” ижодкорлари инсон қалбининг иллатлари ва қора томонларини тадқиқ этишда давом этмоқда. Синчковлик билан танланган актёрлар эса образларни очиб беради ва одамзот пул учун нималарга рози бўлиши мумкинлигини кўрсатади. Бу сафар томошабинларни қандай синовлар, сирлар ва топишмоқлар кутмоқда?
Ли Жонже (Сон Ги Хун)
Актёр янги мавсумда ҳам бош қаҳрамон ролини ижро этади, бироқ унинг образи энди аввалгидек содда эмас. Барча даҳшатли синовлардан ўтган қаҳрамон кучли ички ўзгаришларга учрайди ва қонли ўйинга барҳам бериш учун ўйинда яна қатншишга аҳд қилади. Кореянинг энг юқори маош олувчи актёрларидан бири учун бу биринчи серқирра рол эмас. Узоқ йиллик фаолияти давомида у ўзини турли жанрлар ва амплуада синаб кўрган. Унинг ижодий меросида триллерлар, 90 йилларнинг шафқатсиз воқелигини акс эттирувчи драмалар, детективлар ва “Денгиз бўйидаги уйча” (2000) каби фантастик мелодрамалар мавжуд. Айтганча, бу фильм шунчалик муваффақиятли бўлганки, “Кўл бўйидаги уй” (2006) номи остида Голливуд версияси ҳам суратга олинган.
Ли Бенхон (Фронтмен)
2021 йилда мухлислар сўнгги қисмгача: “Асосий ёвуз ниқоб остида ким яширинган?” деб тахмин қилишди ва ҳақиқат ошкор бўлгач, Осиё шоу-бизнеси билан оз бўлса-да таниш бўлганлар ҳақиқатан ҳам машҳур юлдуз Ли Бенхонни кўриб ҳайратда қолишди. Актёр фаолияти давомида нафақат Корея кинофильмларида, балки кўплаб халқаро лойиҳаларда суратга тушган, масалан, “Ажойиб еттилик” (2016) ва “Терминатор: Генезис” (2015).
Ви Хажун (Хван Жун Хо)
Биринчи мавсумда актёр “Калмар ўйини” ўтказиладиган жойга яширинча кириб, у ерда йўқолган акасини топиш умидида бўлган полициячи ролида пайдо бўлди. Актёр Вандо оролида туғилган, денгиз моллюскаларини етиштирадиган фермада ўсган. Аммо тақдир тақозосига кўра у корейс шоу-бизнесига кириб қолади. Бу Ви Хажуннинг дунёга машҳур қилган ва истеъдоди муносиб баҳоланган биринчи муҳим роли бўлди. Ҳозир юлдузни энг талабгир машҳурлар иштирокидаги лойиҳаларга чақиришмоқда.
Т.О.П (Танос)
“Калмар ўйини 2” актёрлари таркибидаги энг “муаммоли” шахсни эътибордан четда қолдириб бўлмайди. BIGBANG гуруҳининг собиқ аъзоси янги мавсумда иштирок этиши маълум бўлиши биланоқ, Корея жамоатчилигида сериалга нисбатан норозилик тўлқини бошланди. Гап шундаки, унгача Чхве Син Хен (ҳақиқий исми) билан боғлиқ кўплаб оммавий жанжаллар ва қонун билан боғлиқ муаммолар бўлган. Шу сабабдан ҳам уни сериалнинг бош постерига қўшишмайди, ҳатто унинг исми актёрлар рўйхатидан чиқарилади. Бироқ уни трейлерда кўриш мумкин ва бу унинг кўп йиллардан бери йирик лойиҳа устидаги биринчи иши бўлди.
Лим Сиван (Мен Ги)
Лим Сиван нотўғри сармояси катта молиявий йўқотишларга олиб келган ютубер ролини ўйнайди. Қарз олган одамларидан яшириниш учун у ўйинга қўшилади. Актёр ва ЗЕ: А гуруҳи аъзоси романтик драмалардаги роллари билан ҳам танилган. Масалан, унинг “Шафқатсиз” (2017) криминал драмасидаги роли Лим Сиван ўз ишининг устаси эканлигини исботлайди. Ушбу фильм учун актёр ўша йили Канн кинофестивалига таклиф қилинади.
Чо Юри (Жун Хи)
Актриса криптовалюта билан боғлиқ фирибгарликка тортган собиқ йигити туфайли қийинчиликларга дуч келган қиз ролини ўйнайди. Тақдир тақазоси билан улар ўйин пайтида тасодифан тўқнаш келади. Чо Юри — хонанда ва IZ*ONE гуруҳининг собиқ аъзоси. Актёрлар таркибида аёллар унчалик кўп эмас, шунинг учун танлов узоқ ва пухта ўтказилган, деб тахмин қилиш мумкин.
Эҳтимолий қайтиш
Биринчи мавсумда томошабинлар ёқтириб қолган топ-модел Чон Хоэн (Кан Се Бек) ҳақиқий шов-шувга сабаб бўлганди. Афсуски, у якуний синовдан олдин ҳалок бўлади. Бироқ бу режиссёр Хван Дон Хекнинг супермоделнинг экранларга қайтиши эҳтимоли ҳақида томошабинлар қизиқишини оширишга тўсқинлик қилмайди: “Эҳтимол, унинг эгизак синглиси бордир, кўрамиз”.
Изоҳ (0)