49 ёшли актриса Анжелина Жоли онаси Маршелин Бертраннинг вафотидан кейин фильмларда рол ўйнаш унга қийин кечаётгани ҳақида сўзлаб берди.
W Магазине нашрига берган интервьюсида Жоли онаси иккиси доимо бир жамоадек яшагани, ишлагани, аммо 2007 йил бошида волидасини йўқотганидан сўнг карьерасига қизиқиши сўнгани ҳақида айтди. Маршелин Бертранд 56 ёшида оғир касалликдан вафот этган. 1999 йилда унга тухумдон саратони, бир неча йилдан кейин эса кўкрак саратони ташхиси қўйилган.
“Онам вафотидан кейин актрисалик фаолиятимни давом эттиришим қийинроқ бўлди, чунки карьерам у учун қанчалик муҳим эканлигини англар эдим” деди Жоли.
Анжелинанинг сўзларига кўра, у болалигидан онасини бахтли кўришни истаган, шу сабабли Маршелин истагига кўра санъат соҳасини танлаган. Жолининг кинога кириб келиши унинг шахсий танлови бўлмаган:
“Мен киноларга чиқишни жуда эрта бошлаганман, чунки бу, авваламбор, онамнинг орзуси эди”, дейди интервьюда.
Аслида Маршелин хоним кино соҳасида ишлашни истаган, у ўсмирлигидан доимий равишда Чикаго ва Лос Анжелесдаги тингловларга борган, аммо 25 ёшида икки фарзанди билан ажрашган. Оқибатда бутун эътибори ва ҳаётини фарзандларига бахш этган ва орзусини оила учун қурбон қилган.
Фото: Reddit
“Онам эрта турмушдан ажрашгач, уй бекаси бўлиб қолишга қарор қилди. У менинг актриса бўлишимни жуда хоҳларди. Ҳа, бу соҳага ўз истагим билан эмас, балки онамни хурсанд қилиш учун келиб қолганман” деди Жоли.
1982 йилда 6 ёшли Жоли отаси билан бирга ўзининг биринчи фильми — “Чиқиш йўлини излаб”да рол ўйнаган. Кейинроқ Жоли актрисалик карьераси рўзғор харажатларини яхши қоплашини тушунган ва ишга шўнғиб кетган:
“Мен онамга керакли барча нарсаларни сотиб олгим, уй харид қилгим келарди. Ва ҳаммаси айнан шу лаҳзада бошланди”, деб эслади актриса.
Фото: People
Онасининг ўлимидан бир йил ўтгач, Жоли оилапарварлик бўйича ўрнакни айнан волидасидан олиш кераклигини англаб етган:
“Онам бу дунёни тар этганидан кейингина мен уни оиласи учун энг садоқатли ва олийжаноб инсон бўлганини англадим. Унинг ўлими менга ҳаётда айнан нималар муҳимлигини ёдга солди”, деди Анжелина.
Изоҳ (0)